Read njo YERIMIA 36 Bible Online

YERIMIA 36 - njo bible

YERIMIA 36

¹ Yosia jabaso Yehoiakim, Yihuda chuba küm pezübuba nung iba O ya KIBUBA nungi Yerimia dangi aru;

²“Shiküp talep ka bena arung aser iba manung ni ne dang Israel aser Yihuda aser kin ajak anema jembiba o ajak züluang, ni ne dang jembiba anogo nungi tanü tashi, Yosia tendak nungi tanü tashi.

³Ashiko Yihuda kidongi ni parnok dak inyaktsü aliba tamajung ajak angashitsü südi, yangji nisung shia pei tamajung nungi meyiptsü, aser ni parnok tai aser temenen toktettsüsa alitsü.”

⁴Idangji Yerimiai Neria jabaso Baruk aja, aser KIBUBAi Yerimia dang jembiba o ajakji Yerimiai shia Baruki shiküp manung zülu.

⁵Yerimiai Baruk dang mela-a ashi, “Ni KIBUBA kidangi aitsü noktanga lir;

⁶anungji na oang, aser telumiba anogo nung nisung ajaki angashia KIBUBA kidang KIBUBA otemji ni tebang agi shia nai züluba shiküp nungi züngang. Nai ano itemji Yihuda nenok shirnok pei yimtitem nungi adoker, parnoki angashia züngang.

⁷Ashiko parnok temepishiba KIBUBA dangi arutsü, aser oda nisung shia pei tamajung lenmang nungi meyiptsü, kechiyong iba nübur anema KIBUBAi kazükba mit aser terasabaji tulu lir.”

⁸KIBUBA kidang KIBUBA otem shiküp nung züluba nungi azüngtsü Yerimia ainkari melaba ajak Neria jabaso Baruki inyak.

⁹Yihuda chuba, Yosia chir Yehoiakim küm pungububa ita tukububa nung, Yirusalem nung nisung ajak aser shirsa Yihuda yimtitem nungi Yirusalemi aru, KIBUBA madang lumitsü sangdong.

¹⁰Idangji nisung ajaki angashia, Baruki Yerimia otem tezüluba shiküp nungi azüng, KIBUBA kidang, tezülur Shafan chir Gemaria taktang nung, koba ki temaba nung KIBUBA ki süngkhüm Taseni ailen liasü.

¹¹Kodang Shafan chir Gemaria aser pa chir Mikaiai KIBUBA O ajak tezüluba shiküp nungi angashi,

¹²pai chubar kidangi alu, tezülur taktang jagi ai; aser tongtipur ajak yangji mena; Elishama tezülur, Shemaia chir Delaia Akbor chir Elnathan, Shafan chir Gemaria, Hanania chir Zedekia, aser tongtipur ajak.

¹³Baruki nisungtemi angashia tezüluba shikepji azüngdang, Mikaiai pai angashiba o ajak parnok dang ashi.

¹⁴Idangji tongtipur ajaki Kushi chir Shelemia jabaso Nethania chir Yehudi yoka Baruk dang ashi, “Nisungtemi angashia nai azüngba shiküpji ne ket nung am-ang aser arung.” Anungji Neria chir Baruki tezüluba shiküpji pa ket nung am aser parnok dangi aru.

¹⁵Parnoki pa dang ashi, “Menang aser aji züngang.” Anungji Baruki parnok dang azüng.

¹⁶Kodang parnoki o ajakji angashi, parnok tetsübu agi kati ka den reprangtep aser parnoki Baruk dang ashi, “Asenoki item o ajak chuba dang osang agütsütsü tim.”

¹⁷Idangji parnoki Baruk dang asüngdang, “Item ajak nai koda zülu onok dang shiang? Pai tebang agi shia zülu asü?”

¹⁸Baruki parnok dang langzü, “Item o ajak pai tebang agi ola adoka kü dang ashi aser ni shiai agi shiküp nung zülu.”

¹⁹Idangji tongtipurtemi Baruk dang ashi, “Oang aser atsükang, na aser Yerimia; aser nenok kong ali shinga nema temetetdaktsü.”

²⁰Anungji tezüluba shiküpji Elishama tezülur taktang nung yur parnoki chuba kidangi ao; aser parnoki o ajakji chuba dang osang agütsü.

²¹Idangji tezüluba shiküpji bener arutsü chubai Yehudi yok, aser pai Elishama tezülur taktang nungi bener aru; aser aji Yehudi-i chuba dang aser tongtipur chuba anasa noktaka alirtem dang azüng.

²²Aji ita tukububa aser chubaji asükwa ki nung mena liasü aser pa jakdang mijang susa nung mi jangrua liasü.

²³Yehudi-i taren asem pezü ka azüngdang, chuba jagi kotari agi itemji rangsa aser itemji mijang susa nung enoktsü, mijang susa nung mi jagi tezüluba shiküp ajongaji mi nung merongtok tashi enoktsü.

²⁴Aji saka chuba süshia pa tenzükertem süshia shingai item o ajak angashir metsübu mesüra parnoki pei süoshi meshisa.

²⁵Kodang Elnathan, Delai aser Gemarai tezüluba shiküpji marongtsü junger ta chuba dang mepishi, pai parnok dang manga.

²⁶Chubai chubar chir Yerameel, Azriel chir Seraia, Abdeel chir Shelemia, dang tezülur Baruk aser Yerimia ainkar aputsü mela, saka KIBUBAi parnok miim.

²⁷Tang, tezüluba shiküp koba nung Yerimiai shia Baruki zülu aji chubai rongtoker külen, KIBUBA oji Yerimia dangi aru;

²⁸Tezüluba shiküp tanga bena arung aser mezüng tezülutsü shiküp koba Yihuda chuba Yehoiakimi rongtok, iba nung aliba ajak züluang.

²⁹Yihuda chuba Yehoiakim indang nai shiang, KIBUBAi yamai ashir, “Ya oda shia nai iba tezüluba shiküp chubai rongtokogo, kechiba Babilon chuba atangji arutsü aser iba lima samatsütsü aser iba nungi nisung aser shiruru lepdokadoktsü ta nai zülu?”

³⁰Anungji yamai Yihuda chuba Yehoiakim indang KIBUBAi ashir, “Dawid chuba menden nung mendaktsütsü pa meyong shinga malitsü, aser pa tasü mangji anüngdang tatsük nung aser aonung aon manung endoka toktsütsü.

³¹Pa aser pa dak jakzükbatem aser tenzükertem parnok tai asoshi merenshitsü; ni parnok madak aser Yirusalem alir madak aser Yihuda nunger madak ni parnok anema jembizükba lendong ajak arudaktsütsü, saka parnoki mangar.”

³²Idangji Yerimiai tezüluba shiküp tanga bena aru aser Neria chir tezülur Baruk nem agütsü, shibai iba manung Yerimiai ashiba o ajak koba Yihuda chuba Yehoiakimi mi nung rongtok, aji zülu; aser temesüktepba o aika iba nung züluok.