Read njo YERIMIA 37 Bible Online

YERIMIA 37 - njo bible

YERIMIA 37

¹ Yosia chir Zedekia shiba Babilon chuba Nebukadnezzari Yihuda lima chuba kümdaktsü, pai Yehoiakim chir Koina melen chuba.

²Saka pai süshia pa tenzükertemi süshia linük nung nüburi süshia KIBUBA O Yerimia ainkar ajanga jembiba manga.

³Zedekia chubai Shelemia chir Yehukal, Maaseia chir Zefania putir Yerimia ainkar dangi yoka ashi, “Onok asoshi KIBUBA asen Tsüngrem dang sarasademang.”

⁴Tang Yerimiai nübur rongnung ili adokli ta liasü, kechiyong pa ano tepuokdak meyui liasü.

⁵Farao temeranger telok Ijip nungi adoka liasü; aser kodang Kaldi nunger shirnoki Yirusalem lungbanga liasü parnok osang angashir külen parnok Yirusalem nungi atsünga ao.

⁶Idangji KIBUBA oji Yerimia ainkar dangi aru.

⁷KIBUBA Israel Tsüngremi yamai ashir, “Yihuda chuba shibai nenok kü dang nungi asüngdangtsü yok pa dang nenoki yamai shiang, ajiang, Farao temeranger telok koba na yaritsü aru pei lima Ijipi meyipa odi ta lir.

⁸Kaldi nunger meyipa arutsü aser iba yimti anema raratsü; parnoki ibai agitsü aser aji mi agi rongtoktsü.”

⁹KIBUBAi yamai ashir, “Kaldi nunger atangji aenshia oadoktsü ta shia nenok sasa tekülakokdaktsü,” kechiyong parnok aenshia maotsü.

¹⁰Kechiyong nai Kaldi nunger na anema rarar temeranger telok ajonga nai kokaka aser parnok rongnung nisung shia pei süki nung yiru-yibongertem dang anünga liaka parnok shishitsü aser iba yimti mi agi rongtoktsü.

¹¹Tang kodang Kaldi nunger temeranger telok Farao temeranger telok arudang Yirusalem nungi aenshir liasü,

¹²Yerimia Yirusalem nungi Benjamin limai nübur rongnung pa shilem agizüktsü apusoa ao.

¹³Kodang pa Benjamin Süngkhüm nung liasü idakji tanüker ka Hanania chir Shelemia par chir tenüng Irija, pai Yerimia ainkar pua ashi, “Na Kaldi nunger dangi jena odagi.”

¹⁴Yerimiai ashi, “Aji tiyazü; ni Kaldi nunger dangi jena maor.” Saka Irijai pa dang manga, aser Yerimia apu aser pa tongtipur dangi bener aru.

¹⁵Tongtipuri Yerimia dak ain adok aser parnoki pa dak azük aser Yonathan tezülur kidang pa puok, kechiyong aji tepuokdak yanglur liasü.

¹⁶Kodang Yerimia kangla taktang kati aru, aser anogo aika yangji ali.

¹⁷Zedekia chubai pa ajai yok, aser pa anitet. Chuba jagi par kidang miima pa dang asüngdanga ashi, “KIBUBA nungi o kar lir ma?” Yerimiai ashi, “Lir.” Idangji pai ashi, “Na Babilon chuba ket nung bendanga agütsütsü.”

¹⁸Yerimiai ano Zedekia chuba dang ashi, “Ni tepuokdak nenoki ayutsüsa ni kechi tai ne dang mesüra tenzüker, mesüra iba nübur dang inyak?

¹⁹Nenok ainkartem shirnoki ne dang Babilon chuba na aser iba lima anema marutsü ta shin, parnok kong ali?

²⁰Tang angang, ni ne dang mepishir, Oh kü chuba; kü ajemalu temepishiba ne madangi arudakjang, aser ni meyipa Yonathan tezülur ki jagi, yangji ni süa lir, teyokma.”

²¹Anungji Zedekia chubai ozüng agütsü, aser ki anüker nem parnoki Yerimia bendanga agütsü; aser yimti nung amtsük makai maküm tashi, am yanglur yimdong nungi anogo shia pa nem amtsük kaka agütsü. Anungji Yerimiai tanüker ki nung ali.