Read njo YERIMIA 38 Bible Online

YERIMIA 38 - njo bible

YERIMIA 38

¹Tang Mattan jabaso Shefatia, Pashpur jabaso Gedalia, Shelemia jabaso Yukal, aser Malakia jabaso Pashur parnoki Yerimiai nisungtem dang shia aliba angashi.

²KIBUBAi yamai ashir, “Shiba iba yimti nung lidir nok agi, ayawara agi, aser wara agi asütsü; saka shiba Kaldi nunger dangi oadokdir taküm alitsü; parnok takümji rara sempet ka ama asütsü, aser taküm alitsü.

³KIBUBAi yamai ashir, Iba yimti Babilon chuba temeranger telok ket nung agütsütsü aser agiadoktsü.”

⁴Idangji tongtipurtemi chuba dang ashi, “Iba nisung südakjang kechiyong iba ama o parnok dang jembiba agi iba yimti nung tokja aliba temerangertem, aser nisung ajak teka pai tashi maitdaktsüi lir. Kechiyong iba nisungi iba nübur ajungtsü bushi masü saka parnok majungtsüang bushir.”

⁵Zedekia chubai ashi, “Ajiang, pa nenok ket nung lir; kechiaser chubai nenok anema kecha meinyaktet.”

⁶Anungji parnoki Yerimia apu aser chubar chir Malkia meyong ongken nung enoktsü, koba tanüker ki nung liasü, lisü agi Yerimia ajungzüka yok. Aser ongken nungji tzü maliasü, saka lishitsüng dang, aser Yerimia lishitsüng nung asonga ai.

⁷Kodang Ethiopia nunger teyangluba nisung ka, Ebed-melek, shiba chuba kidang liasü Yerimia ongken nung parnoki enoktsüogo ta angashi, idangji chubaji Benjamin Süngkhüm nung mena liasü.

⁸Ebed-melek chubar ki nungi oa chuba dang ashi,

⁹“Kü kibur chuba, item nisungi Yerimia ainkar ongken nung enoktsüba agi parnoki inyakba ajak nung tai menaogo; aser pa yangji taya agi asütsü, kechiyong yimti nungji amtsük anünga mali.”

¹⁰Idangji Ethiopia nunger Ebed-melek dang chubai mela, “Ne den nisung asem yang nungi aniang, aser Yerimia ainkar pa masüdangsa ongken nungi ajungtetang.”

¹¹Anungji Ebed-meleki nisungtemji pa den ani, aser chuba kidangi terizüngdaki ki süoshi taktangi ao, aser idak nungjagi süjen aser süoshi tejen agi, koba pai lisü agi Yerimia dangi ongkeni yok.

¹²Idangji Ebed-melek Ethiopia nunger jagi Yerimia dang ashi, “Süjen aser süoshiji ne kikilaktsü o lisü tsüngda nungji enokang.” Yerimiai yamaji inyak.

¹³Idangji parnoki Yerimia lisü agi atsüket aser ongken nungi pa ajungtet. Aser Yerimia tanüker ki nung ali.

¹⁴Zedekia chubai Yerimia ainkar tajai yok, aser KIBUBA tenla kidangi ailen asembuba nung pa agizük. Chubai Yerimia dang ashi, “Ni ne dang tasüngdangba ka asüngdangdi kü dang nungi kecha temiimshi.”

¹⁵Yerimia Zedekia dang ashi, “Ni ne dang shira atangji nai ni mesüdaktsütsüa-ma? Aser ni ne nem shisa tajung agüjaka nai kü dang mangatsü.”

¹⁶Idangji Zedekia chubai miima Yerimia dang azüngashi, “KIBUBA shibai asen tanela yanglu, pa taküm likai, ni na mesüdaktsütsü mesüra ne taküm bushir item nisung ket nung ni na bendanga magütsütsü.”

¹⁷Idangji Yerimiai Zedekia dang ashi, KIBUBA Temeranger Telok Tsüngrem, Israel Tsüngremi yamai ashir, “Nai Babilon tongtipur ket nung bendanga agüjadokra, iba yimti mi agi marongtsü, aser na aser ner kibong kümzüktsü.

¹⁸Saka nai Babilon chuba tongtipur ket nung bendanga magütsüra, iba yimti Kaldi nunger ket nung agütsütsü aser parnoki aji mi agi rongtoktsü, aser parnok ket nungi na mejenbutsü.”

¹⁹Zedekia chubai Yerimia dang ashi, “Yihuda nunger shirnok Kaldi nunger dangi jena oa ali, parnoki ni parnok nem agütsür kü dak mashi-i amshia lir ta ni tsübur.”

²⁰Yerimiai ashi, “Na parnok nem magütsüdaktsütsü. Ni kechi ne dang ashir, iba nung tang nai KIBUBA ola angang, aser aji ne den junga alitsü aser ne taküm kümzüktsü.

²¹Saka nai bendanga magütsüli süra, KIBUBAi kü dang sayuba mangdangji ya,

²²Ajiang, Yihuda chuba kidang tetsürtem tokja aliba ajak Babilon chuba tongtipur dangi anir aotsü shia liasü, nai tamang akaba tembartemi na ashioktsü aser na anema takok angu; tangbo ne tsüng lishitsüng nung asong nung, parnoki na nungi meyipa oadoker.

²³Ne kibutsütem aser ne jabasotem Kaldi nunger dangi anir oadoktsü aser na ne sasa parnok ket nungi mejenbutsü, saka Babilon chubai aputsü; aser iba yimti mi agi rongtoktsü.”

²⁴Idangji Zedekiai Yerimia dang ashi, “Item oi shinga danga teshi mesüra na asütsü.

²⁵Tongtipurtemi ne den jembiogo ta angashira aser ne dangi arua nai chuba dang kechi ashi aser chubai ne dang kechi ashi; kecha onok nungi temiim aser onoki na mesüdaktsütsü ta shira;

²⁶idangji nai parnok dang shiang, ni chuba dang tanaben Yonathan kidangi yangji masütsü meyoktsü junger ta ni mepishi.”

²⁷Idangji tongtipur ajak Yerimia dangi aru aser pa dang asüngdang, aser chubai pa dang ashiba ama parnok dang langzü. Anungji parnoki pa den jembiba toktsü, kechiyong sensaksembaji parnoki mangazük.

²⁸ Yirusalem agiba anogo matong tashi Yerimia tanüker ki nung ali.