Read njo YERIMIA 39 Bible Online

YERIMIA 39 - njo bible

YERIMIA 39

¹Yihuda chuba Zedekia küm tukububa ita terbuba nung, Babilon chuba Nebukadnezzar aser pa temeranger telok ajak Yirusalem anema aru aser aji lungbang;

²Zedekia küm terkabuba ita pezübuba, anogo tukububa nung yimti atsüji rakpok.

³Kodang Yirusalem agi, Babilon tongtipur ajak aru aser süngkhüm tiyong nung amen: Nergal-sharezer, Samgarnebo, Sarsekim, Rabsaris, Nergal-sharezer Rabmag, Babilon chubar yimsüsür tanüngba ajak dena liasü.

⁴Kodang Yihuda chuba Zedekia aser temeranger ajaki parnok angu, parnok ajen, chubar atsüki jara ana tsüngda nungi süngkhüm ajanga aonung yimti nungi tugu; aser parnok Araba leni ao.

⁵Saka Kaldi nunger temerangertemi parnok aria ao, aser Yeriko lenten nung Zedekia menep; aser parnoki pa apu, Hamat lima nung Ribla nung Babilon chuba Nebukadnezzar dangi pa anir aru; aser pai pa madak o bendang agütsü.

⁶Babilon chubai Ribla nung Zedekia chuba jabasotem pa nükdang tepset; aser Babilon chubai Yihuda temeranger ajak tepset.

⁷Pai Zedekia tenük roktoktsü, aser Babiloni anir aotsü pa yinzü agi alen.

⁸Aser Kaldi nungeri chubar ki aser nüburtem ki rongdoktsü aser Yirusalem jara raksatsü.

⁹Idangji tanüker arkotong Nebuzaradani tanüngba nisungtem shirnok yimti nung tokja liasü, shirnoki pa dangi jena aru, aser nisung shirnok ata-a itemji Babiloni tepoukdaki bener ao.

¹⁰Tanüker arkotong Nebuzaradani, sensaker nisung kar shirnok kecha maka, parnokji Yihuda lima nung toktsü, aser parnok nem tsükmenatzü tsüki aser alu dena agütsü.

¹¹Babilon chuba Nebukadnezzari Yerimia indang tanüker arkotong Nebuzaradan, ajanga mela-a ashi,

¹²“Pa kong ali-ar bushiang, pa junga reprangang aser pa dak tamajung teinyak, saka pai ne dang ashiba ama pa dak inyakang.”

¹³Anungji tanüker arkotong Nebuzaradan, Nebushazban Rabsaris, Nergal-shrezer, Rabmag, aser Babilon chuba tongti yimsüsür ajaki,

¹⁴yok aser tanüker ki nungi Yerimia anir ao. Parnoki Shafanur semchir, Ahikam jabaso Gedalia nem pai pa par kidangi anir aotsü bendanga agütsü. Anungji pa nübur rongnung ali.

¹⁵KIBUBA O Yerimia dangi pa tanüker ki nung shibanga alidang aru.

¹⁶“Oang aser Ethiopia nunger Ebed-melek dang shiang, Temeranger Telok KIBUBA, Israel Tsüngremi yamai ashir, ajiang, ni iba yimti anema tajung asoshi masü tamajung asoshi atalokdaktsütsü aser iba anogo nung ne madang itemji inyaktsü.

¹⁷Saka nabo iba anogo ni kümzüktsü ta KIBUBAi ashir, aser nai shirnok tsübur parnok ket nung na magütsütsü.

¹⁸Kechiyong atangji ni na kümzüktsü, aser na nok agi melaotsü; saka na pei taküm rara sempet ama alitsü, kechiaser nai kü dak temulung alemba ayu” ta KIBUBAi ashir.