Read njo YERIMIA 4 Bible Online

YERIMIA 4 - njo bible

YERIMIA 4

¹“Na arudi süra, Oh Israel, na kü dangi meyipang” ta KIBUBAi ashir; “aser kü tsüngdang nungi ne tesempatsütem endokdi süra idangjibo na magientsü.”

²KIBUBA taküm ali nungji atangji nung, ochi nung aser tamayazü nung azüngashitsü, aser kintemi pa dak parnok sasa moatsütsü, aser pa dak parnok sentsü wangshitsü.

³ Kechiyong yamai KIBUBAi Yihuda aser Yirusalem nisungtem dang ashir, “Nenok pentok pen sepang, aser ai rongnung metsü teperok.

⁴Nenok sasa KIBUBA madang mejeptokang, aser nenok temulungjang temaba teküp endokadokang, nenok Yihuda aser Yirusalem nisungtem; aji mesüra nenok tamajung inyakba yong, kü ain mi ama adoktsü, aser shingaia aji meremseptettsüsa arongtsü.”

⁵Nenoki Yihuda nung sangdongang, aser Yirusalem nung metetdakjang; aser shiang, “Linük nung nenoki jangzü apuang; ayimtenang aser shiang. Atenshiang aser atsü atsüa aliba yimtitem jagi asenok idi arung.

⁶Zion tsütsü nisan ka yuang; tejenokdak bushiang, ata-a teli; kechiyong ni anüdoklentip nungi tamajung aser tesamatsü tulu bener arutsü.

⁷Molusongzü ka pa tamungdak nungi, kintem samatsür ka arudar; pa pei lenmang nung lir, pa pei talidak nungi adoka lir; ne lima, azüngmeyaka, oda ne yimtitem nisung meli-i jentoka kümdaktsütsü.

⁸Iba asoshi anemsü agi nangri kangang, aiatai ken tenang, aser jebtepang; kechiyong KIBUBA ain tesashi asenok nungi meyipa moi lir.”

⁹Iba anogo nungji KIBUBAi ashir, chuba aser tongtipurtem tasü pokdoktsü, aser putirtem bangka-a alitsü, aser ainkartemi süngmangtsü.

¹⁰Idangji ni ashi, “Aia KIBUBA Tsüngrem, nenok tesünep akatsü ta ashiba to nok agi taküm tonga ait nungji atangji nai iba nübur aser Yirusalem kanga ashioktsüogo.”

¹¹Iba mapang nung iba nüburtem dang aser Yirusalem dang ya oda ashitsü, “Mopung tatsük ka lisem lima nungi kü nübur jala tsütsüi arudar, apshitsütsüba mesüra merüktettsütsüba masü;

¹²Mopung onsara tashi tait ka ni nungi arutsü; ano tang ni parnok anema o bendang agütsütsü.”

¹³Ajiang, pa mepet ama atutsü, aser pa talungtsütem Tsüngrem mopung ama alitsü; par kortem mungzütem dang nungi tekaraba lir. Asenok asoshi aiatai! Kechiaser asenok makaka!

¹⁴Oh Yirusalem, na kümzüktettsü asoshi ne mulungjang temenen nungi shitokang. Kopiga ne tamajung tebilembatem ne dak munga alitsü?

¹⁵Kechiyong Dan nungi ola kati metetdaktsür aser Efraim tenem nungi tamajung sangoktsür.

¹⁶Kintem kümdangdakjang; ajiang, Yirusalem dang metetdakjang; alima talang nungi mitertem arudar, aser Yihuda yimtitem anema ola agütsüdar.

¹⁷Moapu anükertem ama parnok la anema meketa lir, kechiaser ni anema apuso ta KIBUBAi ashir.

¹⁸Ne sentong aser mapatem agi itemi adokdaktsü, ibai ne temenen mapa lir; atangji ibai taku lir, kechiyong iba yagi ne mulungjang tonga aiter.

¹⁹Kü tejashi, kü tejashi! Kü mulungjang nung ni tongtonglatsü atur, kü dak kü mulungjang süngjema mali; ni ajemajema melitet, kechiyong jangzü ola, raraba nisung ola ni angashir.

²⁰Teraksa madak teraksa, linük ajonga raksa-a lir. Ajungben kü sükitem, aser kü teyindangba sütem shisa-a lir.

²¹Kopiga ni nisan angutsü, aser jangzü ola angashitsü?

²²Kechiyong kü nüburtem tamashi lir, parnoki ni memetet; parnok tamachi chirtem aser parnok tangatetba kecha mali, tamajung inyaktsü parnok tesangra saka tajung inyaktsü parnoki memetet.

²³Ni alima dak reprang, aser ajiang, aji teraksa aser tazüng liasü; aser anüngtemji parnok tesangwa maliasü.

²⁴Ni tenemtem dak reprang, aser ajiang, parnok atenten, aser ungsem ajak külen küleni arakzü.

²⁵Ni reprang aser ajiang, yangji nisung maliasü, aser anüng ozü ajak jenshir liasü.

²⁶Ni reprang aser ajiang, süngjang atangba moapuji arem liasü, aser yangji yimti ajak KIBUBA madang aser pa tetsübutsü ain madang raksa-a liasü.

²⁷Kechiyong KIBUBAi yamai ashir, “Linük ajak azüngmeyakdak ka akümtsü, aji saka aji tatem makümtsü.

²⁸Iba asoshi alimai mang ayimtsü, aser temalen anüng tanak alitsü; kechiaser aji ni kazük, ni aji inyaktsü mulungtet, aser ni temulung memeyipi lir, mesüra iba nungi memeyiptsü.

²⁹Kor temerangertem aser lijak amertem ola agi yimti ajonga jena aor; parnoki munger bushia air, aser leprungki bushia atur; yimti ajak jentoka lir, aser nisung kata iba nung malir.

³⁰Aser na, kodang na raksadir, nai kechi inyaktsü? Nai ne sasa temerem agi sobuaka, nai ne sasa hon sobusolemtsü agi sobuaka, ne tenük mezüa ulua kümdakjaka, amajok nung nai ne sasa tobur jungdaktsür; na meimertemi na sensatsür, parnoki ne taküm bushir.

³¹Angang, nusodang tetsür ola ka amai mezüng asodang la kangshiba ama, Zion jala ola, sashimebanga, la teka mesanga yok. Ni aiatai! Kechiyong nisung tepsetertem madang ni lular, ta ashiba ola ni angashir.”