Read njo YERIMIA 40 Bible Online

YERIMIA 40 - njo bible

YERIMIA 40

¹Tanüker arkotong Nebuzaradani Rama nungi Yerimia odaktsür külen, pai pa yinzü agi alener Yirusalem aser Yihuda tepuoker ajak den anir Babiloni pur aoba mapang nung KIBUBA o Yerimia dangi aru.

²Tanüker arkotongi Yerimia ania aru aser pa dang ashi, “KIBUBA ne Tsüngremi iba talidak anema lendong ya kazük;

³KIBUBAi aji bener aruogo, aser pai jembiba ama inyakogo. Kechiaser nai KIBUBA anema temenen mena, aser pa ola manga nungji iba mapai ne madak arua lir.

⁴Tang ajiang, ne teka yinzü nungi ni na chioker. Babiloni na kü den arutsü junger ta nai bilemra, arung aser ni na junga reprangtsü; saka na kü den Babiloni arutsü tai ta bilemra taru. Ajiang, linük ajonga ne madang lir; nai kolenisa aotsü junger aser tim ta bilemer ilenjagi oang.

⁵Na moi lira, idangji Ahikam jabaso, Shafan semchir Gedalia dangi meyipang, shiba Babilon chubai Yihuda yimtitem nung governor shimtet, aser pa den nübur rongnung liang, mesüra nai koleni aotsü tim ta bilemer ilen jagi oang.” Anungji tanüker arkotongi pa nem chiyungtsü aser sempet agütsü, aser pa odaktsü.

⁶Idangji Yerimia Mizpa nung Ahikam chir Gedalia dangi ao, aser pa den linük nung tokja aliba nisungtem den ali.

⁷Moapu nung temeranger telok arkotong ajaki aser parnok nisungtemi Babilon chubai Ahikam chir Gedalia linük nung governor shimogo, aser pa nem tebur, tetsür, aser tanurtem, linük nung sensaktiba purtem shirnok Babiloni pur moi ali, pa nem bendanga agütsüogo ta kodang angashi,

⁸parnoki Mizpa nung Gedalia dangi Nethania chir Ishmael, Karea chir Yohanan, Tanhumeth chir Seraia, Netofat nunger Efai chirtem, Maakat chir Yezania, parnok aser parnok nisungtem ao.

⁹Ahikam jabaso Gedalia, Shafan semchiri parnok aser parnok nisungtem dang azüngashia ashi, “Kaldi nunger tenzüktsü tetsübu. Linük nungji liang, aser Babilon chuba tenzükang, aser nenok den aji junga alitsü.

¹⁰Ni asoshibo Mizpa nung alitsü, Kaldi nunger shirnok kü dangi arudir parnok madang nenok asoshi noktaktsü, saka nenokbo, yi aser mei süngjang aser totzü bendenang, aser nenok chipo nung itemji rizünga yuang, aser nenoki agia aliba yimtsüngtem nung liang.”

¹¹Yamaji kodang Yihuda nunger shirnok Moab aser Ammon nunger rongnung aser Edom aser tanga linük nung oda Babilon chubai Yihuda nung tanüngba tokja lir aser Ahikam chir Gedalia, Shafan semchir parnok madak governor shimteta lir ta angashi,

¹²idangji Yihuda nunger ajak parnok kolenisa aridoka liasü Yihuda lima Mizpa nung Gedalia dangi aru, aser parnoki yi aser mei süngjang jenti benden.

¹³Tang Karea chir Yohanan aser moapu nung temeranger telok tanishir ajak Mizpa nung Gedalia dangi aru,

¹⁴aser pa dang ashi, “Ammon nunger chuba Baalisi, Nathania chir Ishmael ne taküm agitsü yok ta nai meteter ma?” Saka Ahikam chir Gedaliai parnok dak mamang.

¹⁵Idangji Karea chir Yohanani Mizpa nung Gedalia dang miima jembi, “Ni odakjang aser ni Nethania chir Ishmael tepsettsü, aser shingaia aji memetettsü. Na anasa sentena aliba Yihuda nunger prokshitsüsa, Yihuda tanüngba samadoktsü, kechiba na taküm agitsü?”

¹⁶Saka Ahikam chir Gedaliai Karea chir Yohanan dang ashi, “Nai iba mapai meinyaktsü, kechiyong nai Ishmael indang tiyazü jembidagi.”