Read njo YERIMIA 41 Bible Online

YERIMIA 41 - njo bible

YERIMIA 41

¹ Ita tenetbuba nung Nethania chir Ishmael, Elishama semchir, chubar kinunger, chubar tongti yimsüsür rongnung ka, Mizpa nung Ahikam chir Gedalia dangi nisung ter den aru. Mizpa nung parnok külemi chiyungdang,

²Nethania chir Ishmael aser pa den nisung terji arameso aser Aikam chir Gedalia Shafan semchirji nok agi lepzüka yok, aser pa tepset, shiba Babilon chubai linük nung governor shimteta liasü.

³Ano Ishmaeli Mizpa nung Gedalia den alir Yihuda nunger ajak aser Kaldi nunger temeranger shirnok yangji lia ata, tepset.

⁴Gedalia tepseter külen tananü, shingaia aji memetetdang,

⁵Shekem, Shilo, aser Samaria nungi parnok bangsemo südoker aser süoshi teshisa abener, parnok temang lepsar, chiyungtsü tenla aser teronem menemtsü bener KIBUBA tenla ki nung agütsütsü nisung tir tonga aru.

⁶Nethania chir Ishmael Mizpa nungi, parnok den ajuruteptsü jeba adok. Pai parnok ajurudang, pai parnok dang ashi, “Ahikam chir Gedalia dangi aitang.”

⁷Kodang parnok yimti jagi ait, Nethania chir Ishmael aser pa den aliba nisungtemi parnok tepset, aser parnok ongken nung enoktsü.

⁸Saka idakji parnok rongnung nisung teri Ishmael dang ashi, “Onok tetepset, kechiyong onoki tsük, barley totzü, aser ninang mojitzü alu nung miima rizünga lir.” Anungji pai parnokji medemertem den metepseti toktsü.

⁹Tang ongken koba nung Ishmaeli tepsetba nisungtem temang ajak enoktsü, ibai Israel chuba Baasha anema Asa chubai tenokdangtsü yangluba ongken liasü. Nethania chir Ishmaeli aji tetepsetba agi süngdaktsü.

¹⁰Idangji Ishmaeli Mizpa nung tanüngba nisung ajak, chubar jalatem aser Mizpa nung tokja aliba nisung ajak tanüker arkotong Nebuzaradani, Ahikam jabaso Gedalia nem bendanga agütsü parnok apu; Nethania jabaso Ishmaeli parnok apu aser Ammon nunger dangi ajanga aotsü apuso.

¹¹Saka kodang Karea jabaso Yohanani aser pa den aliba temeranger telok tanishir ajaki Nethania jabaso Ishmaeli inyakba tamajung ajakji angashi,

¹²parnoki pei nisung ajak ani aser Nethania jabaso Ishmael anema raratsü ao. Gibeon nung aliba tzütu tulu jagi parnok pa madaki aru.

¹³Kodang nisung ajaki shirnok Karea chir Yohanan aser pa den temeranger telok tanishir ajak angu, parnok pelatep.

¹⁴Anungji nisung ajak shirnok Ishmaeli Mizpa nungi meyipa bener ao aser lepa meyipa aru, aser Karea chir Yohanan dangi ao.

¹⁵Saka Nathania chir Ishmael Yohanan nungi nisung ti anir jentet, aser Ammon nunger dangi ao.

¹⁶Idangji Karea chir Yohanan aser pa den temeranger telok tanishir ajaki Nethania chir Ishmaeli, Ahikam chir Gedalia tepseter külen tanüngba temerangertem shirnok Nethania chir Ishmaeli bener oa ali temerangertem, tetsürtem, tanurtem, aser teyangluba nisungtem shirnok Yohanani Gibeon nungi anir shilang, parnok ajakji agi.

¹⁷Parnoki Ijipi aotsü bilema apuso, aser Bethlehem anasa Gerut Kimham nung anen.

¹⁸Kechiaser parnoki Kaldi nunger tsübua liasü, kechiyong Nethania chir Ishmaeli Ahikam chir Gedalia shiba Babilon chubai linük madak governor kümdaktsü paji tepset.