Read njo YERIMIA 42 Bible Online

YERIMIA 42 - njo bible

YERIMIA 42

¹Idangji temeranger telok tanishir ajak, Karea chir Yohanan aser Hoshaia chir Azaria, aser nisung ajak tilatiba nungi tulutiba tashi, anasa aru,

²aser Yerimia ainkar dang ashi, “Onok temepishiba ne madangi arudakjang aser KIBUBA ne Tsüngrem dang onok asoshi mepishijang, iba tanüngba ajak asoshi kechiyong, ne tenüki anguba ama, aika nungi onok ishika dang tokja lir,

³oda KIBUBA ne Tsüngremi onok dang aotsüba lenmang, aser onoki inyaktsüba mapa sayutsüsa sarasademjang.”

⁴Yerimia ainkari parnok dang ashi, “Ni nenoki ashiba angashiogo; ajiang, ni KIBUBA nenok Tsüngrem dang nenok temepishiba ama sarasademtsütsü, aser kechisa KIBUBAi langzüdir ni nenok dang ashitsü; nenok nungi kecha miima mayutsü.”

⁵Idangji parnoki Yerimia dang ashi, “Koba o bener KIBUBA ne Tsüngremi na onok dangi yokdir ajak iba amaji onoki meinyakra onok anema atangji aser temulung alemba kuli KIBUBA sangma.

⁶Jungli mejungli, oda kodang KIBUBA Tsüngrem ola angashir aji onok den junga alitsüsa, KIBUBA ozü Tsüngrem shiba dangi onoki ya yokdagi pa ola onoki angatsü.”

⁷Anogo ter tatem nung KIBUBA oji Yerimia dangi aru.

⁸Idangji Karea chir Yohanan aser pa den temeranger telok tanishir ajak, aser nisung ajak tilatiba nungi tulutiba tashi aja.

⁹Parnok dang ashi, “KIBUBA, Israel Tsüngrem shiba dangi nenok temepishiba pa madang agütsütsü nenoki ni yok, pai yamai ashir.

¹⁰Nenoki iba lima nungi moi lira, idangji ni nenok mesoa yanglutsü aser matsüzüktsü; ni nenok atemtsü, aser matsütettsü; kechiaser ni nenok dang tamajung inyakba atemaji ni jashir.

¹¹Nenoki tsübua aliba Babilon chubaji nenoki tetsübu; pa tetsübu” ta KIBUBAi ashir, kechiyong ni nenok den lir, pa ket nungi ni nenok anizüktsü.

¹²Ni nenok madak taochi akatsü aser nenok pei lima nung lidaktsütsü ni nenok nem taochi melatsü.

¹³Saka nenoki iba lima nung onok malitsü ta shira KIBUBA ne Tsüngrem ola mangai,

¹⁴masü, onok Ijip limai aotsü, kong onoki rara mangutsü, mesüra jangzü ola mangashitsü, mesüra yaseta malitsü, aser onok yangji alitsü, ta shira,

¹⁵ajangla KIBUBA oji angang, Oh Yihuda tanüngba pur: Temeranger Telok KIBUBA, Israel Tsüngremi yamai ashir; nenoki Ijipi aitsü nenok tejak shia lira, aser yangji alitsü odi süra,

¹⁶idangji nai tsübuba nok agi yangji Ijip lima nung na meneptsü, aser ayawara koba nai tsübur Ijip tonga nepeta ne sülen anidaktsü; aser yangji na asütsü.

¹⁷Nisung ajak shirnoki Ijipi talitsü aotsü pei tejak ashir nok agi, ayawara agi, aser wara agi asütsü; lendong koba ni parnok madak bener arudir iba nungi parnok tanüngba mesüra taküm aliba malitsü.

¹⁸“Kechiyong Temeranger Telok KIBUBA Israel Tsüngremi yamai ashir, kü ain adokba aser terasaba Yirusalem alirtem madak shiloktsü ama, kodang nenok Ijipi odir kü terasaba nenok dak shiloktsütsü. Nenok tesempatsü ka taoksatsü ka, atakatem ka aser tetsübutsü ka akümtsü. Nenoki iba linük joko mangutsü.

¹⁹KIBUBAi nenok dang shiogo, Oh tanüngba Yihuda Ijipi to, ya jungjunga metetang, nenok pei taküm agi kuli mesüra mashileni oa lir ta ni tanü nenok nem tekümdangtsü agütsür.

²⁰Kechiyong nenok KIBUBA nenok Tsüngrem dangi ni ya oda shir yok, onok asoshi KIBUBA asen Tsüngrem dang mepishijang, aser KIBUBA asen Tsüngremi kechisa shidir onok dang metetdakjang aser aji onoki inyaktsü.

²¹Tanü aji ni nenok dang shiokogo, saka nenoki KIBUBA nenok Tsüngrem olaji pai nenok dang ashitsü ni yokba kecha nunga nenoki tashi manga.

²²Tang aji asünung atangji metetang oda nok agi, ayawara agi, aser wara agi nenoki oa alitsü jangraba linük nung nenok asütsü.”