Read njo YERIMIA 43 Bible Online

YERIMIA 43 - njo bible

YERIMIA 43

¹KIBUBA parnok Tsüngremi Yerimia parnok dangi KIBUBA parnok Tsüngrem otem bener yokba ajak pai nisung ajak dang jembitemer külen,

²Hoshaia chir Azaria aser Karea chir Yohanan aser nisung ajak tilatiba nungi tulutiba tashi arua Yerimia dang ashi, “Nai tiyazü shidagi, KIBUBA asen Tsüngremi yangji alitsü to ta ashitsü na meyok.

³Saka Kaldi nunger ket nung onok bendanga agütsütsü, oda parnoki onok tepsettsüsa mesüra onok Babiloni pur aotsü asoshi Neria chir Baruki na onok anema yuja lir.”

⁴Anungji Karea chir Yohanan aser temeranger telok arkotong ajak aser nisung ajaki, Yihuda lima nung alitsü, KIBUBA ola tashi manga.

⁵Saka Karea chir Yohanan aser temeranger telok arkotong ajaki Yihuda tanüngba ajakji agi, shirnok kin ajak nungi koba leni parnok aridoka aser Yihuda nung alitsü arua liasü.

⁶Teburtem, tetsürtem, tanurtem chubatsürtem aser nisung shia shirnok tanüker arkotong Nebuzaradani Ahikam chir Gedelia, Shafan semchir den tokja liasü, ano ainkar Yerimia aser Neria chir Baruk.

⁷Parnok Ijip limai aru, kechiyong parnoki KIBUBA ola tashi manga. Aser parnok Tahapanhes atong.

⁸Idangji Tahpanhes nung KIBUBA O Yerimia dangi aru,

⁹Ne ket nung lung tulutem am-ang, aser Tahpanhes nung Farao kidangi aiba lenmang nung, Yihuda nisung ajak madang lungru agi yanglua alidak semki nung itemji miimang;

¹⁰aser parnok dang shiang, Yamai Temeranger Telok KIBUBA Israel Tsüngremi ashir: “Ajiang, ni yoktsü aser Babilon chuba Nebukadnezzar, kü tenzüker anir arutsü, aser pai pei chuba menden item lung koba ni miima ali, temalen ayutsü, aser pai pei chuba sü item madak salatsü.

¹¹Pa arutsü aser Ijip lima dak azüktsü, wara agi samatsü pur nem wara, pur aotsü pur nem pur aoba, aser nok agi samatsü pur nem nok agütsütsü.

¹²Pai Ijip tsüngremtem tenla kitem nung mi ka tsükloktsü, aser pai itemji arongtsü aser parnok pua bener aotsü; aser sannükeri pei süoshi nungi atsük pudok ama pai Ijip meshidoktsü; aser pa yang nungjagi yimjung nung aotsü.

¹³Ijip nung aliba Heliopolis tongshitemji pai raksatsütsü; aser tsüngremtem tenla kitemji pai mi agi arongtsü.”