Read njo YERIMIA 44 Bible Online

YERIMIA 44 - njo bible

YERIMIA 44

¹Ijip lima, Migdol nung, Tahpanhes nung, Memfis nung, aser Pathros lima alir Yihuda nunger ajak indang Yerimia dangi aruba o;

²Yamai Temeranger Telok KIBUBA Israel Tsüngremi ashir, “Yirusalem madak aser Yihuda yimti ajak madak ni lendong bener aruba ajak nenoki nguogo, Ajiang, tanü parnok azüngmeyakdak küma lir, aser yangji shinga malir,

³kechiaser parnoki inyakba lendong mapa, parnoki liangmesen arongtsü aoba aser parnoki memetetba, parnoki saka, nenoki saka, mesüra nenok tsüraburi memetetba tangar tsüngremtem dangi aoba agi ni jashidakja ain adokdaktsü.

⁴Ano ne tenzükertem aser ainkar ajak maneni nenok dangi yoka ashi, ‘Oh, Iba tesempatsü mapa ni sempaba ya teinyak!’

⁵Saka parnoki tamajung nungi aser tangar tsüngremtem dang liangmesen arongba nungi meyiptsü nenoki manga mesüra tenarong magütsü.

⁶Aji asünung kü terasaba aser kü ain adokba Yihuda yimtitem nung aser Yirusalem yimdong nung shiloktsü aser jangrudaktsü; aser tanü tashi aliba ama, parnok tejendok aser azüngmeyakdak aliba ama, parnok tejendok aser azüngmeyakdak aküm.”

⁷Tang Temeranger Telok KIBUBA Tsüngrem, Israel Tsüngremi yamai ashir, “Kechiba nenoki iba tamajung tulu nenok pei anema, nenok nungi tebur aser tetsür, kinü aser tanur chanu, Yihuda rongnungi nenok asoshi tanüngba metoktsüi leptokadoktsüsa inyaker?

⁸Kechiba nenoki nenok teka mapa agi, Ijip lima kong nenok alitsü aru, yangji tangar tsüngrem nem liangmesen, ronga, oda nenok leptokadoktsüsa aser atakatem ka akümtsü aser alima kin ajak rongnung sensamasatsü ka küma ni ain adoktsüsa jashidaktsü?

⁹Nenok tsüraburtem tamajung mapa, Yihuda chubatem tamajung mapa, nenoki pei tamajung mapa, aser nenok kinungtsürtem tamajung mapa, koba parnoki Yihuda lima nung aser Yirusalem yimdong nung inyak aji nenoki amadok asü?

¹⁰Tanü tashia parnoki pei sasa ajemalu maküm, mesüra nenok madang aser nenok tsürabur madang ni toktsüba kü ozüng nung aser kü telatet ozüng nung mejaja.”

¹¹Anungji Temeranger Telok KIBUBA Israel Tsüngremi yamai ashir, “Ajiang, tamajung asoshi aser Yihuda ajak leptoktsü asoshi ni nenok anema kü tejak ashitsü.

¹²Yihuda tanüngba shirnoki Ijipi talitsü arutsü tejak shia ali ni parnok agitsü, aser parnok ajak samatsü; Ijip lima nung laotsü; nok agi aser ayawara agi parnok samatsü; tilatiba nungi tulutiba tashi parnok nok agi aser ayawara agi asütsü; aser parnok tetatatsü, taoksatsü, atakatem ka, aser sensamasatsü ka akümtsü.

¹³Ni Yirusalem nok agi, aya agi, aser wara agi merenshiba ama, shirnok Ijip lima alir itemji merenshitsü,

¹⁴yongji Yihuda tanüngba shirnok Ijip lima alitsü arua ali mejenbutsü mesüra mesüi taküm malitsü mesüra Yihuda limai kong parnok yangji alitsü meyiptsü jangrar, meyipa maotsü, kechiyong jena aor kar dak alaka parnok memeyiptsü.”

¹⁵Idangji tebur ajak shirnok kinungtsütemi tangar tsüngremtem nem liangmesen teronem tenla agütsüogo ta metet, aser anasa noktakba tetsür ajak, tesenteper telok tulu, Ijip lima Pathros nung alir nisung ajaki, Yerimia dang langzü;

¹⁶KIBUBA tenüng nung nai onok dang jembiba indangji, onoki ne dang mangatsü.

¹⁷Saka chubatsür dang liangmesen teronem arongtsü aser la dak tajemtsü tenla shiloktsütsü, onok aser onok tsüraburtemi onok chubatem aser onok tongtipurtem; Yihuda yimtitem aser Yirusalem yimdongtem, onoki inyakba ama; onoki atemzükba indang kechisarena onoki inyaktsü. Kechiyong idangji onok chiyungtsü teperi liasü, aser azükaru, aser tamajung mangu.

¹⁸Saka anüng chubatsür dang liangmesen teronem arongba aser la nem tajemtsü tenla shiloktsüba toktsür külenbo, onok kechisarena agi anüng, aser nok aser ayawara agi samaogo.

¹⁹Aser tetsürtemi ashi, “Kodang onoki anüng chubatsür dang liangmesen teronem arong aser la nem tajemtsü tenla shiloktsü, aji onoki amtsük la noksa keter yangluba aser la nem tajemtsü tenla shiloktsübaji onok kinungpurtemi mulungba medeni inyak asü?”

²⁰Idangji Yerimiai nisung ajak tebur aser tetsürtem aser pa nem iba telangzüba agütsür ajak dang ashi,

²¹“Nenoki Yihuda yimtitem nung aser Yirusalem yimdong nung liangmesen teronem arongba indangji, nenok aser nenok tsüraburtem, nenok chubatem aser nenok tongtipur aser linük nung alir nisungtem, KIBUBAi aji mebilemtet no?

²²KIBUBAi nenok tamajung inyakbatem aser tesempatsütem koba nenoki inyak aremzüktsü makok; anungji nenok lima azüngmeyakdak aser tejendokdak aser atakatem, nisung meli-i tanü tashi aliba amai, kümdakja lir.

²³Ibaji nenoki liangmesen teronem arongbayong, aser nenoki KIBUBA anema temenen mena aser KIBUBA ola manga mesüra pa ozüng aser pa telatet ozüngtem nung aser pa kulitem nung mejaja, yongji iba tamajung ya, tanü tashi aliba amai, nenok madak tonga lir.”

²⁴Yerimiai nisung ajak aser tetsür ajak dang ashi, “Nenoki KIBUBA oji angang, Ijip lima nung aliba nenok Yihuda ajak,

²⁵Temeranger Telok KIBUBA, Israel Tsüngremi yamai ashir: Nenok aser nenok kinungtsütemi nenok tebang agi jembiogo, aser ni nenok teka agi atalokdaktsüogo, aser ashi, ‘Onoki atangji onoki yangluba, onok tatemzükba inyaktsü, anüng chubatsür dang liangmesen teronem arongtsü aser la nem tajemtsü tenla shiloktsütsü.’ Ajangla nenok tatemzükba akangshiang aser nenok tatemzükba inyakang!

²⁶Anungji KIBUBA O angang, nenok Ijip lima alirtem; ajiang, KIBUBAi ashir, oda Ijip lima ajak nung Yihuda nisung shinga bang agi, KIBUBA Tsüngrem taküm likaji ta joko kü tenüng nung mejashitsüsa ni kü tenüng tulu agi azüngashiogo.

²⁷Ajiang, ni parnok tajung asoshi masü tamajung asoshi mita lir; Yihuda nisung ajak shirnok Ijip lima nung ali nok aser ayawara agi, parnok tatembang ka maküm tashi samatsü.

²⁸Shirnok nok nungi jenbur Ijip nungi Yihuda limai, yongsük ishika meyipa arutsü; aser Yihuda tanüngba ajak, shirnok Ijipi talitsü aru, parnoki kü o mesüra parnok o koba shitak aji metettsü.

²⁹Ibai nenok madang temaitsü asütsü ta KIBUBAi ashir, nenok anema tamajung asoshi kü otem atangji noktaktsü ta nenoki metettsüsa ni nenok iba talidak merenshitsü:

³⁰ KIBUBAi yamai ashir, Ni Yihuda chuba Zedekia, pa taküm bushiba pa tsükchir Babilon chuba Nebukadnezzar ket nung agütsüba ama, ni Farao Hofra Ijip chuba pa tsükchirtem aser pa taküm bushirtem ket nung agütsütsü.”