Read njo YERIMIA 46 Bible Online

YERIMIA 46 - njo bible

YERIMIA 46

¹Kintem indang KIBUBA O Yerimia ainkar dangi aruba.

² Ijip indang, Ijip chuba, Farao Neko temeranger telok indang, koba Karkemis nung Eufrata ayong anasa liasü aser koba Babilon chuba Nebukadnezzar, Yihuda chuba Yosia chir Yehoiakim küm pezübuba nung akok.

³Jongkok aser jong renemang, aser tongbang asoshi tejakleni oang!

⁴Kortem renemang; sangang, Oh kor temerangertem! Nenok merang korang semer noktakang, nenok nütem meyuang, aser nenok rara sobutsü sobuang!

⁵Kechiba ni aji angu? Parnoki aoksatepa süngmang aser tesüleni meyipogo; parnok temerangertem kokdaktsüogo, aser ilungtepa jenshiogo; parnoki meyipa merepranger; ajaklen tetsübu taoksa lir! ta KIBUBAi ashir.

⁶Terangrangeri jena aotsü makok, mesüra temerangeri mejenbutsü; anüdoklentip Eufrata ayong anasa parnok metsütak aser lao.

⁷Nile ama wanga atuba, ya shiba, tzü metsüngba ayongtem ama?

⁸Nile ama Ijip wanga atur, tzü metsüngba ayongtem ama. Pai ashi, “Ni atutsü, ni alima nembangtsü, ni yimtitem aser parnok yimti alirtem samatsütsü.”

⁹Tejakleni oang, Oh kortem, aser ain adokang, Oh talungtsütem! Temerangertem tejakleni odakjang; Ethiopia aser Put nisungtem shirnoki jong amer, lijak amtsü mongin, Lud nisungtem.

¹⁰Iba anogoji Temeranger Telok Tsüngrem KIBUBA anogo, mangyangba anogo lir, pei sasa pa tsükchirtem dak mang ayangtsü; noki meyoktsü aser jangra atemtsü, aser parnok zü nungi tzüratema ajemtsü. Kechiyong KIBUBA Temeranger Telok Tsüngremi anüdoklentip lima Eufrata ayong anasa tetepsetba tenla ka akatsü.

¹¹Gileadi tuang, aser tanebtsü mozü agiang, Oh tasüngtet aiür Ijip jala! Amajok nung nai mozü aika agiogo; na asoshi tanebtsü mali.

¹²Kintemi ne maksü indang angashiogo, aser alima na ayimtenba agi sünga lir kechiyong temerangeri temeranger anema metsütak.

¹³ Ijip lima dak azüktsü Babilon chuba Nebukadnezzar aruba indang Yerimia ainkar dang KIBUBAi jembiba o.

¹⁴Ijip nung metetdakjang, aser Migdol nung sangdongang; Memfis aser Tahpanhes nung sangdongang; shiang, “Renema noktangang aser renema liang, kechiyong noki na meketa meyoktsü.”

¹⁵Kechiba Apis ajen? Kechiba ne nashi pungchi menoktak? Kechiaser KIBUBAi pa nungokja laodaktsü.

¹⁶Ne telok metsüktak aser lao, aser parnok kati ka dang ashi, “Aramesoang, aser asenoki pei nübur dangi aser asen taso limai, rishikangshir aser nok nungi meyipa odi.”

¹⁷Ijip chuba, Farao ola dang tulu; shibai pei mapang süitemdaktsü.

¹⁸Ni taküm ali nungji, Chubai ashir, tenemtem rongnung Tabor ama, aser tzüyim anasa Karmel ama, ka arutsü.

¹⁹Bendangli tepuokdak alitsü asoshi nenok sasa khu renemang, Oh Ijip nung alirtem? Kechiyong Memfis tejenokdak, teraksa ka, nisung meli-i akümtsü.

²⁰Ijip tobur tajung nashi lamen lir, saka anüdoklentip nungi apung la madak arua lir.

²¹La dak taa anguba temerangertema tejebket nashi chanutem ama lir; hau, parnoki meyip aser külemi ajen, parnoki menoktak; kechiyong tamajung lendong anogo parnok madak arua lir; oda parnok merenshiba mapang.

²²Per jua aoba mesüka lai ola adoker; kechiyong tsükchirtem tejakleni temeranger telok aor, aser la anema, süngdong alenertem mesüka pu bener arur.

²³Nempoka meitettsüsa liaka, parnoki lar min alentsü ta KIBUBAi ashir; kechiaser süngkutem dang nungi parnok timba lir; parnok mezüngdangteti lir.

²⁴Ijip jala mak südaktsütsü, anüolentip len nungi nübur ka ket nung la bendanga agütsütsü.

²⁵Temeranger Telok KIBUBA, Israel Tsüngremi ashi, “Ajiang, Thebes nung aliba Amon, aser Farao, aser Ijip aser par tsüngremtem aser par chubatem, aser Farao aser pa dak temulung alemertem madak ni temerenshi bener arudar.

²⁶Shirnoki parnok taküm bushir, Babilon chuba Nebukadnezzar aser par yimsüsürtem ket nung ni parnok bendanga agütsütsü. Tesülenbo Ijip nung akhidang ama nisung alitsü” ta KIBUBAi ashir.

²⁷ “Saka tetsübu, Oh Yakob, kü tenzüker mesüra aoksatepa teli, Oh Israel kechiyong angang, ni talang nungi na kümzüktsü, aser ne chirtem parnok puokba lima nungi kümzüktsü. Yakob meyipa arutsü aser ajem ajema sadoka alitsü, aser shingai pa metsübudaktsütsü.

²⁸Tetsübu, Oh Yakob kü tenzüker ta KIBUBAi ashir, kechiyong ni ne den lir. Ni kin ajak kobaisa ni nenok arioktsü ni jungjunga tatem ka kümdaktsütsü. Shitak tasazük nung ni na arütsütsü aser ni na kodakang memerenshi-i metoktsütsü.”