Read njo YERIMIA 48 Bible Online

YERIMIA 48 - njo bible

YERIMIA 48

¹ Moab indang, Temeranger Telok KIBUBA, Israel Tsüngremi yamai ashir, “Nebo asoshi aiatai! Kechiyong aji teraksa kümdakja lir. Kiriathaim maksüdakja lir, ibai agiogo, mitsaji maksüdaktsüogo aser raksadokogo.

²Moab nüngsang joko mali; Heshbon nung parnoki la anema tamajung tasa asa. Arung, la kin ka mekümdaktsütsü asenoki la leptokadokdi! Ano nenok, Oh yiar nisungtem, ola madoki kümdaktsütsü; noki na arishitsü.

³Angang! Horonaim nungi ayimtenba ka, azüngmeyak aser teraksa tulu!

⁴Moab samaogo; Zoar, lar tila tanurtema ayimtenba angashir.

⁵Kechiyong Luhit atudang parnoki kukua jebtepa atur. Kechiyong Horonaim aluba nung parnoki teraksaba ayimtenbaji angashiogo.

⁶Jenang! Nenok taküm kümzükang! Lisem lima nung arem gado ka amai sang!

⁷Kechiyong, nenok mitsa nung aser rongsen nung nenoki temulung alem nungji, nenoka agitsü; aser Khemos pei putirtem aser tongtipur den pur aotsü.

⁸Yimti shia madaki tesamatsür arutsü, aser yimti kata mejenbutsü. KIBUBAi jembiba ama, telemok lentenji samatsü aser lentenji raksatsü.

⁹Moab nem tashikangtem agüjang, kechiyong la yima aotsü; lar yimtitem, nisung shinga yangji meli-i azüngmeyakdak ka akümtsü.

¹⁰KIBUBA mapa shibai anüalem agi inyaker pa atakatem sang; aser shibai pei nok azü tokshiba nungi meyipa soter pa atakatem sang.

¹¹Moab pa lanuwa nungi sadoksadoka ali, aser pa yi tasüngtet manung ali, aser bongdang ka nungi ka dak züoka mali, mesüra pa tepuokdaki muodang; anungji pa dak temenakdangtsü kasa alir, aser pa teronem memelenshir.

¹²Anungji ajiang, anogotem arur ta KIBUBAi ashir, oda ni pa dangi tajungketertem yoktsü, aser parnoki pa shitokadoktsü; aser parnoki pungdang azüngtettsü, aser parnok pungdang anüka raksatsütsü.

¹³Israel kidongi parnok temulung alemba Bethel asoshi akseta aliba ama Khemos indang Moabi akseta alitsü.

¹⁴Onok tashi tulu nisungtem, aser rara asoshi tasü tait nisungtem ta koda nenoki ashir?

¹⁵Moab aser la yimtitem raksatsür atua lir, aser pa teshimtet asangurtem, tetepsetdaki luogo ta Chuba, shiba tenüng Temeranger KIBUBA lir, pai ashir.

¹⁶Moab lendong ana nung lir aser pa timtem yakta arur.

¹⁷Shirnok pa meketa ali parnok ajaki aser pa tenüng meteter ajaki, pa mang yimang, sentsüwangshi mechi, tashi tait nüsong koda raksa-a lir ta shiang.

¹⁸Ne sentsüwangshi nungi alung, aser tzüra-a aliba ali nung, menang. Oh Dibon nung alirtem! Kechiyong Moab samatsüba na anema atua lir; pai nenok mitsatem raksatsüogo.

¹⁹Lenmang anasa noktakang, aser repranga liang, Oh Aroer nung alirtem! Jena aosang dang aser jenbua aola dang asüngdangang, “Kechi atalok?”

²⁰Moab maksüdakja lir, kechiyong pa teraksa lir, jebteper aser ayimtener! Moab raksa-a jentoka lir ta Arnon nung shiang.

²¹Lenten lima madak, Holon madak, Yehza madak, aser Mefaat,

²²aser Dibon, Nebo aser Beth-diblathaim.

²³Kiriathaim, Beth-gamul, aser Beth-meon,

²⁴aser Keriot, Bozra aser Moab lima yimti ajak, talang aser ana nung, o bendangba aruogo.

²⁵Moab tezü leptokogo, pa tepen raksaogo ta KIBUBAi ashir.

²⁶Pa yi agi mesepdakjang, kechiaser pai KIBUBA anema pa sasa uludaktsü; aji asünung Moabi pei saktsüba nungi mezüshitsü, aser pa sensamasatsü küma alitsü.

²⁷Kechiyong ne madang Israel sensamasatsü ka masü no? Pa auür rongnung angu asü? Kechiyong pa indang nai kwiben jembidir, nai tekolak angümtener.

²⁸Oh nenok Moab alirtem, yimtitem tokjang aser lung nung liang, Oh Moab nüburtem! lungpok bang nung pei tesep yangluba guduru ama sang.

²⁹Moab asüküm indang onoki angashiogo, pa kanga asüküm; pa uluba, pa asükümba, pa ngasangatemba aser pa mulungjang mezümekümba.

³⁰Pa rasaba ni metet, ta KIBUBAi ashir, oda aji tazüngla lir; pa asüakümba agi kecha mekümtet.

³¹Aji asünung Moab asoshi ni ajeber; Moab ajak asoshi ni ayimtener.

³²Yazer dang nungi tali ni na asoshi ajeber, Oh Sibma tsükmenatzü tezü! Ne kongsangtem tzüyim atena ao, Yazer tashi atong; Ne mei süngjang aser ner tsükmenatzü tejang madak teraksatsüba tongogo.

³³Tsünütsü ajungba Moab lima nungi tepela aser tepelatsü bener oadokogo; tsükmenatzü yi ni anendaktsüogo; shingaia itemji pelaseta washiba agi manettsü; washibaji tepelatsü washiba masü.

³⁴Heshbon aser Elealei ayimtener; Yahaz tonga parnoki ola adoka ashir, Zoar nungi Horonaim aser Eglath Shelishiya tashi; kechiyong Mimrim tzütema takong küma lir.

³⁵Aser shibai tenladak tenem nung pei tsüngrem nem liangmesen teronem rongdir, KIBUBAi ashir, ni Moab nung tatem kümdaktsütsü.

³⁶Aji asünung Moab asoshi kü mulungjangi jemji ka ama anünger, aser Kirheres nisungtem asoshi kü mulungjangi jemji ka ama anünger; anungji parnoki bendenba rongsen samar.

³⁷Kechiyong tekolak shia sütokogo aser bangsemo shia sütokadokogo; teka ajak nung talepba lir, aser teperem nung anemsü lir.

³⁸Moab kilem-ma ajak nung aser yimdong nung aiatai ken dak alaka kecha mali.

³⁹Ibai koma raksa-a lir! Parnok koma ajeber! Moabi koma maksü nung tetsür ka mulungjang mesüka iba meketa alir ajak dang Moab sensamasatsü aser taoksatsü küma lir.

⁴⁰Kechiyong KIBUBAi yamai ashir, “Ajiang kati mongzü ka ama yima aotsü, aser pei tashikang Moab anema salatsü.

⁴¹Yimtitem agitsü aser mitsatem raksatsü. Timtem tekangshi nung tetsür ka mulungjang mesüka iba anogo nungji Moab temerangertem mulungjang alitsü.

⁴²Moab raksatsütsü aser joko kin ka masütsü, kechiaser pai pei sasa KIBUBA anema ulu.

⁴³Taoksatsü, kangla, aser sang ne madang lir. Oh Moab nüburtem!” ta KIBUBAi ashir.

⁴⁴Shibai taoksa nung jendir, kangla nung tsüktsü, shibai kangla nungi aputeta adoker, sang nung aputsü. Kechiyong parnok merenshiba küm nung ni itemi Moab madak bener arutsütsü ta KIBUBAi ashir.

⁴⁵Heshbon akhüm nung tajenertemi tashi makai anener; kechiyong Heshbon nungi mi ka adokogo, Sihon ki nungi milak ka adokogo; iba agi Moab tenütsü, rongrong chirtem korang raksaja lir.

⁴⁶Ne dangi tejashitsü, Oh Moab! Khemos nüburtem makaka; kechiyong ne jabasotem pua bener ogo, aser ne jalatem tepuokdaki ogo.

⁴⁷Aji saka tesülen anogo nung ni Moab tia yanglushitsü ta KIBUBAi ashir. Moab madak o bendangba ya tashi lir.