Read njo YERIMIA 49 Bible Online

YERIMIA 49 - njo bible

YERIMIA 49

¹ Ammon nunger indang, KIBUBAi yamai ashir; Israel jabasotem mali no? Pa senmanger mali no? Ajangla kechiba Milkomi Gad agi? Pa nübur iba yimtitem nung ali?

²Aji asünung, ajiang, anogotem arudagi ta KIBUBAi ashir, koba mapang nung ni Ammon nunger Rabba anema tongbang washidaktsütsü; ibai tejendok tejep ka akümtsü, aser iba yimtem mi agi arongtsü; idangji shirnoki Israel rakzükraktem parnokji Israeli rakzükraktemtsü ta KIBUBAi ashir.

³Jebang, Oh Heshbon, kechiyong Ai jentoka raksa-a lir! Jebang, Oh Rabba jalatem! Anem sü agi nenok sasa nangri kangang, asü ken tenang, aser ai tsüki rongnung oli aruli ta asemtepang! Kechiyong Milkom pei putirtem aser pa tongtipur den soyim nungi aridoktsü.

⁴Oh tamang makaba jala, ne lenten li asoshi kechiba na asükümer? “Shiba ni anema arutsü” ta shia, shibai la rongsen nung temulung alem?

⁵Ajiang, nenok meketa alirtem nungi ni nenok madak tetsübutsü bener arudaktsütsü ta Temeranger Telok KIBUBA Tsüngremi ashir, aser nenok nisung shia pa madang nungi indang indanga tajenertem anitentsü shinga meli-i aridokadoktsü.

⁶Saka tesülenbo ni Ammon nunger tia tanaben yanglushitsü ta KIBUBAi ashir.

⁷ Edom indang, Temeranger Telok KIBUBAi yamai ashir; “Joko Teman nung shisatsü maka asü? Shitak metetba nungi teshisadangtsü samadok asü? Parnok shisatsü sama-a oadok asü?

⁸Jenang, meyipa tesülen shiang, tarok nung liang, Oh Dedan nung alirtem kechiyong ni pa merenshiba mapang nung Esau lendongji ni pa madak arudaktsütsü.

⁹Ne dangi tsükmenatzü aongertem arura, parnoki tsükmenatzü temenushitsü tera metokshitsü no? Auürtem aonung arura, parnoki pei asoshi teperi maben tashi meraksadaktsütsü no?

¹⁰Saka ni Esau mangsa kümdaktsü, pai nembangdak ni temai adoktsütsü, aser pai pei sasa nembangtsü makoktsü. Pa chirtem raksatsüogo, pa adianutem, aser par kinungertem, aser pa joko mali.

¹¹Tebu maliba ne chirtem tokjang, ni parnok taküm awabanga ayutsü; ne amitsürtemi kü dak temulung lemdakjang.”

¹²Kechiyong KIBUBAi ashir, “Shirnoki marokji ajemtsü? Nebukadnezzari aji ajemtsü tim süra, nabo memerenshi-i jentettsü no?”

¹³Kechiyong KIBUBAi ashir, “Ni kü kija azüngashiogo, Bozra taoksatsü ka, mezüngmeshitsü ka, teraksatsü ka, aser atakatem ka akümtsü, aser par yimti ajak teti teraksa alitsü.”

¹⁴KIBUBA nungi ni osangtem angashiogo, aser kin rongnung osang bener ka yoka lir; “Nenok sasa külemi sentenang aser pa anema arung aser tongbang noktakang!”

¹⁵Kechiyong ajiang, ni na kin rongnung tila kümdaktsütsü aser nisung rongnung mezüngmeshidaktsütsü.

¹⁶Ne mulungjang nung mezümekemba, taoksatsü jagi na külakoktsüogo, Oh na lungpok nung aliba, tenem kolak sota alisang. Nai ne tesep mongzü den saku temalen yangluaka, ni na idak nungjagi anizüktsü ta KIBUBAi ashir.

¹⁷Edom taoksatsü ka akümtsü; shibai pa anasa süidir süngmangtsü aser iba temerenshi ajakji ngua tanemi atalatsü.

¹⁸ Sodom o Gomora, aser parnok anasa aliba yimtitem meküpdokdang ama, KIBUBAi ashir, nisung shingai yangji malitsü, idakji nisung chir shinga munga malitsü.

¹⁹Ajiang, Yordan arem nungi san teti chiyimdak bushia molusongzü ka aruba mesüka pa atutsü, ni parnok ajongbena la nungi jena odaktsütsü; aser shiba ni shimtetdir ni la madak yutsütsü. Kechiyong shiba ni mesüka lir? Shibai ni mapang ka nung lemteta jaoktsü? Aser kü madang noktaktsü sannüker shiba lir?

²⁰Anungji Edom anema KIBUBAi renemba tasa aser temenen nung alirtem anema pai atongba sentongji angashiang: telok nungjagi tilatema sünga atsür oadoktsü; atangji pai parnok chiyimdak azüngmeyaka toktsütsü.

²¹Parnok laoba agi alima anokshitsü; parnok ayimtenba ola Temerem Tzüyim nung angashitsü.

²²Ajiang, pa atutsü aser mongzü ama yimzütsü, aser pa tashikang Bozra anema salatsü, aser iba anogo nungji Edom temerangertem mulungjangi tetsür ka la nusotsü kangshidang la mulungjang ama alitsü.

²³Damaska indang. Hamat aser Arpad bangkaseta lir, kechiyong parnoki osang tamajung angashi; parnok tetsübu agi yimsa-a aor; tzüyim ama parnok arakzüa süngjem süngjema meliteti lir,

²⁴Damaska tashi mait küma lir, lai ajentsü meyip, aser pusapuyim agi pa dak tonga lir; tetsür ka nuso kangshidang ama tuokrong aser tejashi agi la dak sotadok.

²⁵Tepela yimti, oda nüngtugu yimti koma sentoka lir!

²⁶Anungji lar asangurtem lar yimdong tiyong nung laotsü, aser iba anogo nungji lar temeranger ajak samatsütsü ta Temeranger Telok KIBUBAi ashir.

²⁷Damaska jara nung ni mi ka tsükloktsütsü, aser aji agi Ben-hadad chuba kitem meyokadoktsü.

²⁸Babilon chuba Nebukadnezzari amakba Kedar aser Hazor chuba yimtitem indang. KIBUBAi yamai ashir; “Aramesoang, Kedar anema tuang; anüdoklen nübur samajang!

²⁹Parnok süki aser parnok telok parnoki agitsü, parnok teyindangba sü aser parnok oset ajak parnok asoshi bener aotsü, aser nisungtemi parnok dang ayimtentsü ‘Ajaklen tetsübutsü lir!’

³⁰Jenang, talang nung oa nemzüang, tarok nung liang, Oh Hazor alirtem ta KIBUBAi ashir. Kechiyong Babilon chuba Nebukadnezzari nenok anema tasa ka asa aser na anema sentong ka atongogo.

³¹Aramesoang, tebilemtsü makai parnok kija aliba kin ka dang jagi tuang.

³²Parnok uttem temakzükba oset akümtsü, parnok nashi teloktem telalu akümtsü. Shirnok ku temtsüng südoker ali ni mopung ajaklen prokshidaktsütsü, ajaklen nungi ni parnok lendong arudaktsütsü” ta KIBUBAi ashir.

³³Hazor shirong amungdak, teti teraksa aliba ka kümdaktsütsü; nisung shinga yangji malitsü, pa dak nisung munga malitsü.

³⁴Yihuda chuba Zedekia yimsüsüba tetenzük nung, KIBUBA O Yerimia ainkar dangi Elam indang aruba.

³⁵Temeranger Telok KIBUBAi yamai ashir, “Ajiang, Elam lijak, parnok tashi ayudakji ni raksatsütsü;

³⁶aser anüng pezüsülen nungi mopung pezü ni Elam madak bener arutsü; aser ni parnok item mopung ajak dangi prokshidaktsütsü, aser Elam nungi shirnok aridokdir, shinga kin dangia parnok maruibo malitsü.

³⁷Parnok tsükchir madang aser shirnoki parnok taküm bushir parnok madang ni Elam aoksadaktsütsü; ni parnok madak lendong oda kü tesashi ain adokba bener arutsü ta KIBUBAi ashir. Ni parnok mesamatsü tashi ni parnok sülen nok yoktsü.

³⁸Elam nung ni kü chuba menden ayutsü, aser parnok chuba aser tongtipurtem samatsütsü” ta KIBUBAi ashir.

³⁹Saka tesülen anogotem nung ni Elam pur aoba tanaben bener arutsü ta KIBUBAi ashir.