Read njo YERIMIA 50 Bible Online

YERIMIA 50 - njo bible

YERIMIA 50

¹ Babilon indang, Kaldi lima indang, ainkar Yerimia ajanga KIBUBAi jembiba o.

²“Kin rongnung metetdakjang aser sangdongang, temaitsü ka yuang aser sangdongang, aji temiimshi aser shiang, Babilon agiogo. Bel maksüogo, Merodak bangkaseta lir. La süngyanglutem maksüogo, la süngyanglutem bangkaseta lir.

³Kechiyong anüdoklentip nungi la anema kin ka atua lir, aji agi lar lima azüngmeyaka kümdaktsütsü, aser iba nung shinga malitsü; nisung aser shiruru anaprongla jena aotsü.

⁴Item anogo nungji aser iba mapang nungji Israel nübur aser Yihuda nüburtem, parnok arudang jebtepa külemi arutsü, aser parnoki KIBUBA parnok Tsüngremji bushitsü.

⁵Parnoki parnok tejak Zion tsütsü shir Zion lenmang asüngdanga ashitsü arung kodanga mamatsüba teti tatem maka tezüngzüktepba ka nung KIBUBA dang asen sasa lungjemdi.

⁶Kü nübur temadokba san küma liogo, parnok sannükertemi parnok mashileni, tenem jagi meyipdakja anir ao, parnok tenem nungi ungsemi ogo, parnoki pei talidak amadokogo.

⁷Parnok angur ajaki parnok meyokadok, aser parnok tsükchirtemi shiogo, “Onok tai masü kechiyong parnok talidak aji KIBUBA, parnok tsürabur teimla KIBUBA anema tai parnoki menaogo.”

⁸Babilon nungi jenang, aser Kaldi lima nungi oadokang, aser san telok madang nabong tepung ama liang.

⁹Kechiyong ajiang, anüdoklentip lima nungi ni kintem telok tulu ka Babilon anema ajungshia bener arudagi; aser la anema parnok sasa tongbang noktaktsü; yang nungjagi parnok agiadoktsü, parnok lijakjangji teka tazüng meyipa aruba temeranger mongin ka mesüka lir.

¹⁰Kaldi amaktsü; la amaker ajak tipatemtsü ta KIBUBAi ashir.

¹¹Nenok pelatepaka, nenok pela-a lungsotepaka, Oh kü senmang rakzükertem ai madak nashi lamen chanu ngajaba ama, aser kor tepung mesüka asatepaka,

¹²netsü khenyongi maksütsü, aser shibai na aso maksü alitsü. Angang, kintem tetsübutsüji la asütsü, arem takong aser azüngmeyakdak aser lisem lima.

¹³Kechiyong KIBUBA terasaba yong la dak nisung malitsü, saka ajonga azüngmeyakdak alitsü, nisung shia shiba Babilon anasa süidir süngmangtsü aser la zübu ajak aliba yong sensatsütsü.

¹⁴Nenok sasa Babilon anema sendanga meketa noktakang, nenok lijak yoker ajak; la dak ka-ang, lijakjang anünga teyu, kechiyong lai KIBUBA anema temenen benshi.

¹⁵La anema meketa washiang, lai chiokadokogo, la kimung lao-ogo, la jalatem tsükogo. Kechiyong ibai KIBUBA mangyangba lir; la dak mang yangang, la dak lai inyakba ama inyakang.

¹⁶Babilon nungi metsü prokerji aser aluruwa mapang nung ninok amertem leptokadokang; rishikangshir nok tsübuba yong, nisung shia pei nübur dangi meyiptsü, aser nisung shia pei limai asemtsü.

¹⁷Israelji molusongzüi aridoka arishiba san ka lir. Tamasa Asiria chubai pa meyok, aser tang tesü Babilon chuba Nebukadnezzari pa terettem chipoktsüogo.

¹⁸Anungji Temeranger Telok KIBUBA Israel Tsüngremi yamai ashir. Ajiang, ni Asiria chuba merenshiba ama, Babilon chuba aser par lima madak ni temerenshi bener arudagi.

¹⁹Ni Israel tanaben pei chiyimdaki anir arutsü, aser Bashan nung Karmel manung pa chiyimtsü, aser Gilead nung Efraim tenem nung pa tejangraba tipatemtsü.

²⁰Item anogo nungji aser iba mapang nungji, KIBUBAi ashir Israel dak tai bushitsü, aser kecha malitsü.

²¹Merathaim lima anema tuang, aser Pekod alir anema tuang. Tepsetang aser parnok sülen meshi-meshia samadakjang ta KIBUBAi ashir, aser ni ne dang melaba ajak inyakang.

²²Linük nung tongbang ola aser teraksa tulu lir.

²³Alima ajonga dak akusang koda lepzüka yok aser raksa-a lir! Kin rongnung koda Babilon tetsübu taoksatsü ka küma lir!

²⁴Oh Babilon, ni na asoshi sang aso aser aji nai memetet; na putet aser apu, kechiaser nai KIBUBA anema noktang.

²⁵KIBUBAi pei nok o nü ayudak lapok aser pei ain adokba nok o nü agitet, kechiyong Kaldi nunger lima nung Temeranger Telok KIBUBA Tsüngrem teinyaktsü mapa ka lir.

²⁶Pezü sülen shia nungi la anema arung, lar jentem lapokang, tsük toktena ayuba mesüka la nungtendakjang aser khenyongi la samadakjang; la nungi kecha anünga tetoktsü.

²⁷Lar nashi pungchi ajak tepsetang, tetepsetdak parnok laodakjang. Parnok asoshi aiatai, kechiyong par anogo, par temerenshi mapang arua lir.

²⁸Angang! Tsüngrem asen KIBUBA mangyangba, pa tenlaki mangyangba, Zion nung sangdongtsü Babilon lima nungi parnok ajener aser jenteta aor.

²⁹Babilon anema lijak amer ajak jatenang, shirnoki lijak azüa arur ajak jatenang. La meketa anasa arur menang; shinga tejendaktsü. La mapa yari la nem lepa agüjang, lai inyakba ajak yari la dang inyakang, kechiyong lai Israel Temeshisang KIBUBA anema asüküma noktakogo.

³⁰Aji asü nung lar asangurtem yimdong tiyong nung laotsü, aser lar temeranger ajak iba anogo nung samatsütsü ta KIBUBAi ashir.

³¹Ajiang, ni na anema lir, Oh asükümsang ta Temeranger Telok KIBUBA Tsüngremi ashir, kechiyong ni na merenshitsü ne anogo mapang aruogo.

³²Asükümsangji, pa mesotsü shinga mali, metsüdaktsü aser laotsü, pa yimtitem nung ni mi ka jangrudaktsütsü aser aji agi pa meketa aliba ajak meyoktsü.

³³Yamai Temeranger Telok KIBUBAi ashir, “Israel nübur kangshia lir, aser parnok den Yihuda nübur dena lir; parnoki parnok moudaktsü.

³⁴Parnok alangzüksang tashi tait lir, pa tenüngji Temeranger Telok KIBUBA lir. Atangji pai parnok asoshi noktaktsü. Pai alima nem anisüngzük agütsütsü saka Babilon alirtem nembo rongrong agütsütsü.”

³⁵Kaldi nungertem anema aser Babilon alirtem anema aser lar tongtipur madak aser par tashi temeteter nisungtem anema nok ka!

³⁶Tetakzürtem anema, parnok tamachi kümdaktsütsüsa nok ka! Lar temerangertem anema parnok samatsütsüsa nok ka!

³⁷Lar kortem anema lar talungtsütem anema, aser parnok rongnung bendanger temeranger telok ajak anema parnok tetsür kümdaktsütsü asoshi nok ka! Lar rongsen rizüngba ajak anema, item rakzükdaktsütsü asoshi nok ka!

³⁸Parnok anema tzü kongdaktsütsü asoshi nükra ka! Kechiyong ibai noksa jenti akaba lima ka lir, aser tekülemba süngyanglu anema parnok yiar küma lir.

³⁹Anungji arem shirurutem aser shirongtem Babilon nung alitsü, aser ostrich ozü yangji amungtsü; joko la dak teti nisung malitsü, mesüra putusa putu la dak malitsü.

⁴⁰Kodang Tsüngremi Sodom aser Gomora aser parnok anasa yimtitem meküpdok, KIBUBAi ashir, yamaji yangji nisung shinga malitsü, aser nisung chir shinga la dak munga malitsü.

⁴¹Ajiang, anüdoklentip nungi nübur ka arur; kin tashi tuluka aser chuba aika alima tatembang len nungi arimesoa lir.

⁴²Parnoki lijak aser nü ameta lir; parnoki maochir, aser yimlibilem maka. Parnok olaji tzüyim arrürba mesüka lir; parnoki kor dak amener, aser na anema tongbang asoshi tebur ka ama sobua lir, Oh Babilon jala!

⁴³Babilon chubai parnok indang osang angashi, aser pa teka zükla-a aküm; nusotsü tetsür kangshi ama, tuokrong agi pa dak atong.

⁴⁴Ajiang, Yordan arem nungi san teti chiyimdak bushia molusongzü ka aruba mesüka ni parnok ajongbena aridoktsü aser shibasa ni shimdir la madak ni shimteta toktsütsü. Kechiyong ni mesüka shiba lir? Shibai ni arung ta ajatsü? Kü madang noktaktsü sannüker shiba lir?

⁴⁵Anungji KIBUBAi Babilon anema yangluba tasa, aser Kaldi lima anema pa sentong atongba angang: Atangji parnok telok nungi tilatem atsür oadoktsü, atangji parnok talidak parnok den azüngmeyaka kümdaktsütsü.

⁴⁶Babilon agiba ola agi alima arakzütsü, aser la ajepba kin rongnung angashitsü.