Read njo YERIMIA 51 Bible Online

YERIMIA 51 - njo bible

YERIMIA 51

¹ KIBUBAi yamai ashir, ajiang, Babilon anema, Kaldi alirtem anema ni tesamatsüba tenla ka aramesotsü.

²Ni Babilon anema teseptokertem yoktsü, aser parnoki la sepdoktsü; kodang ajaklen nungi la anema timtem anogo nung parnok arudir, parnoki lar lima tazüng kümdaktsütsü.

³Lijak abeneri pei lijak azüa tarudaktsü, aser pa merang sobutsü sobur noktaka telidaktsü; lar asangurtem anünga teyutsü, lar telok ajak okshia samajang.

⁴Kaldi nunger lima nung parnok laoa tepsettsü, aser lar yimdong nung yirutsütsü.

⁵Kechiyong Israel aser Yihuda, parnok Tsüngrem Temeranger Telok KIBUBAi parnok sendoka mali; saka Israel Temeshisang anema parnok lima temenen agi sünga lir.

⁶Babilon nungi jenang, nisung shiai pei taküm kümzükang! La temerenshi nung telepdoktsüma, kechiyong ibai KIBUBA mangyang. La nem lepa agütsüba mapangji lir.

⁷ KIBUBA ket nung Babilonji, alima ajak mesepdaktsüba hon marok ka liasü; kintemi lar yi ajem, anungji kintem yiar aküm.

⁸Ajongbena Babilon lao aser raksa; la asoshi jebang! La tekangshi asoshi la tanebtsü mozü agiang; ashiko la anebtsüa kar.

⁹ “Onoki Babilon anebdaktsünü,” saka la manebi lir. La senzüka tokjang aser asen ajak pei limai odi; kechiyong la obendangba kotak tongogo, aser oda anüng tonga tuogo.

¹⁰KIBUBAi asen ochi pukhüm kümogo; arung, aseni Zion nung KIBUBA asen Tsüngrem mapa metetdaktsüdi.

¹¹Lijakjangtem ajuang! Jongtem bena arung! KIBUBAi Media nunger chubatem mulung arimesoogo, kechiaser Babilon indang pa sentongji aji samadaktsütsübaji lir, kechiyong aji KIBUBA mangyangba, pa tenla ki asoshi mangyangba lir.

¹²Babilon lungtsüki anema temaitsü ya yuang; tanüker tashi itdakjang; mitkar yuang; arümendak yangluang; kechiyong KIBUBAi Babilon alirtem indang pai kechi jembi, tasa asaogo aser teinyaka inyakogo.

¹³ Oh nenok shir tzü jenti anasa alir, rongsen nung takar, ne tatembang tongogo, ne taküm angtong leptoktsüogo.

¹⁴Temeranger Telok KIBUBAi pei taküm agi azüngashiogo; atangji süngku koma jenti yamaji nisung agi ni süngdaktsütsü, aser nenok madak parnoki takok washi washitsü.

¹⁵Pei ain agi alima yanglubaji pa lir, shibai pei ain agi alimaji yanglu, aser pa tangatetba agi anüngtem atsülangdaktsü.

¹⁶Kodang pai pei ola adokdir anüng nung tzü rongrongtepa lir, aser pai alima tatembangtem nungi tzüsü lunga atudaktsür. Tzünglu asoshi pai tsüngpret adokdaktsür, aser pa jendang nungi mopung pai bener arutsür.

¹⁷Nisung shia tamachi aser temetetba shisatsü mali; hon atsünger shia pei tekülemba süngyanglu agi maksüdaktsür, kechiyong pa noksatemji tiyazü lir aser parnok dak tangula mali.

¹⁸Parnok tagidak maka tiyazü amangba ka, parnok merenshiba mapang nung parnok samatsü.

¹⁹Shiba Yakob shilem lir pabo item amai masü, kechiyong ajak kümdaktsübaji pa lir, aser Israelji pa senmanger kin; pa tenüngji Temeranger Telok KIBUBA lir.

²⁰Na kü yintem aser rara nok o nü lir; aser ne den ni kintem anüka ajasatsütsü; aser ne den ni yimlitem ajasatsütsü;

²¹ne den ni kor aser pa dak asangba anüka ajasatsütsü; ne den ni talungtsü aser talungtsü anishir anüka ajasatsütsü;

²²Ne den ni tebur aser tetsür anüka ajasatsütsü; ne den ni tambur aser asangur anüka ajasatsütsü; ne den ni asangur aser aiür anüka ajasatsütsü;

²³Ne den ni sannüker aser pa san telok ajasatsütsü; ne den ni alu yimer aser pa alu alaba ajasatsütsü; ne den ni governor aser walunir anüka ajasatsütsü.

²⁴KIBUBAi ashir, “Babilon aser Kaldi alir ajak nenok nükdangsa parnoki Zion nung tamajung inyakba ajak asoshi ni lepa agütsütsü.”

²⁵Ajiang ni na anema lir ta KIBUBAi ashir, Oh alima ajonga samadaktsüba, tesamatsüba tenem; ni na anema kü teka songtoktsü; aser lungbang nungi na mezüa yoktsü, aser na merok tenem ka kümdaktsütsü.

²⁶Na nungi kinük asoshi lung, aser kimung asoshi lung kecha magitsü, saka na teti asoshi azüngmeyakdak alitsü, ta KIBUBAi ashir.

²⁷Ali nung nisan ka mesoang, kin rongnung jangzüji apuang; la anema rara asoshi kintem renemang; la anema yimtitem Ararat, Mini, aser Ashkenaz ja-ang; la anema arkotong ka shimang; süngku lokti ama kortem adokdakjang.

²⁸La anema raratsü asoshi kintem renemang, Media chubatem, parnok governortem aser tata yimsüsürtem, parnok yimsüsüba yimli kübok linük shia renemang.

²⁹Alima atentener aser tekangshi nung lir, kechiyong Babilon anema KIBUBA sentong, Babilon lima nisung meli-i azüngmeyak kümdaktsütsü noktaka lir.

³⁰Babilon temerangertem raraba anenogo, parnok pei mitsatem nung lir, parnok tashi makai kümogo, parnok tetsür kümogo; la alidak mi jangrudagi, lar tarütangtsü raksaogo.

³¹Babilon chuba dang ajaklen par yimti agiogo ta ashitsü. Jidangodang kati ka den ajuruteptsü aser osang bener kati ka den ajuruteptsü asemteper;

³²Tzütemdak rakzüka agiogo, mit sabangtem mi agi rongtokogo, aser temerangertem pusatepa lir.

³³Kechiyong Temeranger Telok KIBUBA, Israel Tsüngremi yamai ashir, Babilon jalaji, mo anetba mapang nung motsüngnem mesüka lir; ano kenpiga dang lirbo, la aluruwa mapang arutsü.

³⁴Babilon chuba Nebukadnezzari ni meyokogo, pai ni akureptsüogo; Pai ni po tazüng ka kümdaktsüogo. Pai ni ngüm molutzürang ka ama meyokadokogo; Pai pei pok kü chiyungtsü tajung agi süngdaktsüogo, pai ni jendokogo.

³⁵Kü dang aser kü sosem dang, teka aibaji Babilon madak lidakjang, ta Zion alirtemi shidakjangma. Kaldi alirtem madak kü zü lidakjang ta Yirusalemi shidakjang.

³⁶Anungji KIBUBAi yamai ashir, Ajiang, ni nenok indang tepu akümtsü aser nenok asoshi mang ayangtsü. Ni lar tzüyim kongdaktsütsü.

³⁷Babilon teraksa lung ka kümdaktsütsü, shirongtem amungdak, nisung maliba Taoksatsü ka aser temekongtsü ka alitsü.

³⁸Molusongzü techanu ama, parnoki merametena asatsü.

³⁹Parnok ain adoka alidang, ni parnok nem benjong ka renemtsütsü, aser parnok süjia mao tashi, parnok mesepdaktsütsü.

⁴⁰Tetepsetdaki san chanutem mesüka, san tepung aser nabong tepung mesüka, ni parnok anir alutsü.

⁴¹Babilon koda agia lir, alima rangbeni tenüng asangba koda rakzüka lir! Kin rongnung Babilon koma taoksatsü ka küma lir!

⁴²Babilon madak tzüyim atualir, iba terongrong tzüsem agi la nembanga lir.

⁴³Lar yimtitem taoksatsü ka, nükra aser azüngmeyakdak lima ka küma lir; shinga maliba lima nisung chir shinga ajanga mesüiba lima ka küma lir.

⁴⁴Ni Babilon nung Bel merenshitsü, aser pai kechi meyok aji pa tekong nungi agitettsü. Joko kintem pa dangi sena maotsü; hau, Babilon jara laoa lir.

⁴⁵Kü nüburtem la dak nungi adokadokang! KIBUBA tetsübutsü mit nungi nisung shia pei taküm kümzükang!

⁴⁶Kodang küm ka nung osang ka arudir, aser tanga küm ka nung ululu ka, aser teka yitepba linük nung lidir, linük osang angashiba agi nenok mulungjang telula aser tsübuseta teli.

⁴⁷Aji asünung ajiang, Babilon süngyanglu noksatem merenshitsü anogotem arudagi; lar linük ajanga maksüdaktsütsü, aser la madak lar tetepsetba ajak laotsü.

⁴⁸ Idangji anüng aser alima, aser parnok dak aliba ajaki, Babilon madak tepela agi ken atentsü; kechiyong anüdoklentip nungi tesamatsürtem arutsü ta KIBUBAi ashir.

⁴⁹ Alima ajak Babilon ajang tetepsetbatem laoba ama, Israel tepsetba asoshi Babilon laotsüla.

⁵⁰Nenok nok nungi jentetertem, oang, ajem-ajema noktaka teli! Talang nungi KIBUBA bilemtetang, aser nenok mulungi Yirusalem atidakjang.

⁵¹Onok maksüdaktsüogo, kechiyong onoki tejak nembangtsüogo, kechiyong KIBUBA ki temeshidaki aenertem arua lir.

⁵²Aji asünung, ajiang, KIBUBAi ashir, la süngyanglu noksatem madak ni o bendangtsü anogotem arudagi, aser lar linük ajaklen yiruyipungertemi anüngtsü.

⁵³Babilon anüng tonga tuaka, aser lai lar tashi tait mitsa noktanga liaka, aji saka ni nungi tesamatsürtem la madaki arutsü ta KIBUBAi shir.

⁵⁴Angang, Babilon nungi asatepba! Kaldi nunger lima nungi tesama tulu ola adokba!

⁵⁵Kechiyong KIBUBAi Babilon raksa-a toktsüdagi, aser la ola tulu mokorai kümdagi. Tzü jenti mesüka parnok tzüsem arrür; parnok rongrongshishi ola adoker;

⁵⁶kechiyong Babilon madak, la madak, tesamatsüba arua lir; lar temerangertem agiogo. Parnok lijak ajasatsüogo; kechiyong KIBUBAji lepa agütsüba Tsüngrem ka lir, pai atangji meyipa agütsütsü.

⁵⁷Lar tongtipur aser lar temetetertem ni mesakdaktsütsü, lar governortem, lar walunirtem, aser lar temerangertem, aser parnok mesaki teti majangba agi ni mejangdaktsütsü ta Chuba shiba tenüng Temeranger KIBUBA lir, pai ashir.

⁵⁸Temeranger Telok KIBUBAi yamai ashir, Babilon jara tesademji ali den medema akümtsü aser lar süngkhüm talangtem mi agi arongtsü. Nisungtemi amajok inyaker, aser kintem parnok sasa mi asoshi dang bilemer.

⁵⁹Neria chir Seraia, Maseia, kodang pa Yihuda chuba Zedekia den Babiloni ao, pa yimsüsüba küm pezübuba nung, Yerimia ainkari melaba o. Seraiaji rongsen kibur liasü.

⁶⁰Babilon arütsüba tamajung ajak, zülua aliba item otem ajak Babilon indang, Yerimiai kaket ka nung zülu.

⁶¹Yerimiai Seraia dang ashi, “Kodang na Babiloni odir, nai item o ajak züngang,

⁶²aser shiang, ‘Oh KIBUBA, iba linük indang nai leptokadoktsü ta shiogo, iba nung kecha malitsü, nisung süshia shiruru süshia, aser teti ibaji azüngmeyakdak alitsü.’

⁶³Kodang nai iba kaket züngtemdir, iba nung lung ka alenlokang, aser Eufrata ayong tiyong nung enokjang.

⁶⁴Shiang, Ni la madak tamajung bener aruya alibayong yamai joko matutsüsa Babilon telungleni alutsü.” Ya tashi Yerimia o lir.