Read njo YERIMIA 52 Bible Online

YERIMIA 52 - njo bible

YERIMIA 52

¹Zedekia chuba akümdang pa arishi küm metsürka liasü, aser Yirusalem nung pai küm terka chuba. Pa tetsü tenüng, Libna nunger Yerimia jala, Hamutal liasü.

²KIBUBA tsüngdang kechi tamajung liasü, Yehoiakimi inyakba ajak amato, pai inyak.

³Atangji KIBUBA ain adokba yong Yirusalem aser Yihuda nung yamai ataloktsüsa küma oda pai pa tsüngdang nungi parnok jentokadok. Aser Zedekia Babilon chuba anema apuso.

⁴ Pai chubaba küm tukububa nung ita terbuba anogo ternübuba nung Babilon chuba Nebukadnezzar pa temeranger telok ajak den Yirusalem anema aru, aser parnoki aji lungbang aser iba meketa mit sabang yanglu.

⁵Yamaji yimtiji Zedekia chuba küm terkabuba tashi lungbanga liasü.

⁶Ita pezübuba anogo tukububa nung yimti nungji ayawara kanga sashia aküm nung linük nung nübur asoshi chiyungtsü makai liasü.

⁷ Idangji yimti jaraji rakpok, aser raraba nisung ajak ajen aser aonung yimti nungi jara ana tsüngda nung süngkhüm kati, chubar atsüki anasa, Kaldi nunger yimti meketa lia tuguadok. Aser parnok Araba leni ao.

⁸Saka Kaldi temeranger teloki chuba aria ao, aser Yeriko lenten nung chubaji menep; aser par temeranger telok ajak pa nungi prokshir liasü.

⁹Idangji parnoki chubaji apu, aser Hamat lima nung Ribla nung Babilon chuba dangi pa bener aru, aser pa madak pai o bendang agütsü.

¹⁰Babilon chubai Zedekia chirtem pa nükdang tepset, aser ano Ribla nung tongtipur ajak tepset.

¹¹ Pai Zedekia tenük arokdoktsü aser pa merang yinzü agi alen, aser Babilon chubai pa Babiloni anir ao, aser pa masü tashi tepuokdak ayu.

¹²Ita pungububa anogo terbuba nung, koba Babilon chuba Nebukadnezzar küm tertukububa liasü, Nebukadnezzar Babilon chuba anüker rongnung arkotong Yirusalemi ai.

¹³ Pai KIBUBA ki aser chubar ki aser Yirusalem nung ki ajak rongtoktsü; ki tulu ajak pai rongrepdaktsü.

¹⁴Kaldi nunger temeranger telok ajak, shirnok anüker arkotong den liasü. Yirusalem meketa jara ajak lusatsü.

¹⁵Chuba anüker arkotong Nebuzaradani nübur rongnung sensaktiba aser yimti nung tokja alirtem aser tesentokertem shirnoki Babilon chuba dangi sentoka toktsür ao, anükalem mapa inyaker mongin kar dena Babilon chuba dangi pur ao.

¹⁶Saka chuba anüker arkotong Nebuzaradani linük nung sensaktiba pur karbo tsükmenatzü dong acha-ayanger aser alu alartem asütsü toktsü.

¹⁷ KIBUBA kidang aliba yongmenyin tongshitem, aser KIBUBA kidang aliba tamendakba aser yongmenyin tzüyim, Kaldi nungeri anüka raksa, aser yongmenyin ajak Babiloni bener ao.

¹⁸Parnoki chipo, aser tateptsü, aser yinsü mejeptokbatem, aser susatem, aser liangmesen asoshi ausutem, aser tenla ki mapa nung amshiba yongmenyin ausu ajak bener ao.

¹⁹Ano susa tilatem aser mi atepba susa, aser susatem aser potem, aser milendongtem, aser liangmesen asoshi susa chuba anüker arkotong jagi kechisa taribi agi liasü, taribi amato bener oadok.

²⁰Tongshi ana asoshiji, kaji tzüyim kübok aliba yongmenyin nashi pungchi terana aser tamendakbatem koba Solomon chubai KIBUBA ki asoshi yanglu, yongmenyin item oset ajak moudangtettsüsa liasü.

²¹Tongshiji temeket nung süklep terti aser aji süngtsüng nung temeyong pezü lema, aser aji telunglen küroka liasü.

²²Iba manung yongmenyin tongshibang yanglua liasü; tongshibang kaji süklep pungu talang liasü; tongshibang meketa, mechitepa yanglua aser jarem naro jang, ajak yongmenyin agi yanglua liasü.

²³Temalen jarem jang tukur trok liasü; jarem naro jang ajakjibo mechitepa yangluba ajaklenji noklang ka liasü

²⁴Chuba anüker arkotong jagi putir unger Seraia, aser putibangmi Zefania, aser kishinüker asem apu,

²⁵aser yimti nungi pai raraba nisungtem tanishir ka, aser chubar ketdangpurtem nungi nisung tenet, shirnok yimti nung angu parnok apu aser temeranger telok madak walunir kübok tezülur shibai linük nung nübur anitena angu, aser yimti nung anguba linük nübur nisung roker apu.

²⁶Tanüker madak arkotong Nebuzaradani parnok apu, aser parnok Ribla nung Babilon chuba dangi bener aru.

²⁷Babilon chubai parnok dak azük, aser Hamat linük Ribla nung parnok südaktsü. Yamaji Yihuda pei lima nungi pua bener ao.

²⁸Ibai Nebukadnezzari pua bener aoba yongsükji lir; küm tenetbuba nung, Yihuda nunger meyirijang asemser metsürasem;

²⁹Nebukadnezzar küm tertibuba nung pai Yirusalem nungi nisung noklang ti ser semer ana;

³⁰Nebukadnezzar küm metsür asembuba nung chuba anüker arkotong Nebuzaradani Yihuda nunger noklang tenet ser lir-pungu; nisung ajak agi meyi pezü ser noklangtrok liasü.

³¹Yihuda chuba Yehoiakim pur aoba küm semer tenetbuba nung, ita teranabuba nung, anogo metsür pungu buba nung, Babilon chuba Evil-merodak, pa chuba akümba küm nung, Yihuda chuba Yehoiakin dang taochi sayu aser tepuokdak nungi anitet;

³²aser pai pa dang meima jembi, aser Babilon nung pa den alir chubatem menden madak temaba menden ka pa nem agütsü.

³³Anungji Yehoiakini pai tepuokdak abenba süoshi agizük. Aser arishi tepiyong anogo shia teti chuba langbang nung chiyung;

³⁴Pa kopiga taküm liasü pa asüba anogo tashi pa anogo shia tenüngdaktsü yari chubai pa nem teti teyari agüja liasü.