Read njo YERIMIA 6 Bible Online

YERIMIA 6 - njo bible

YERIMIA 6

¹Jenbutsü asoshi Yirusalem nungi jenang, nenok Benjamin chirtem, aser Tekoa nung jangzüji apuang, aser Beth-akherem madak nisan yuang; kechiyong anüdoklentip nungi timtem sübanga oda teraksa tulu aitdagi.

²Tobur tajung aser tenabang Zion jala na leptokadoktsü.

³La dangi sannükertem pei san telok den la anema arutsü, la meketa pei sükitem yanglutsü, aser parnok shiai pei talidak chiyimtsü.

⁴Nenoki la anema rara renemang, aramesoang, aser asenoki la anema anjongmeshi nung tudi. Asenok asoshi aiatai! Kechiyong anogo tesüir, aser nikongtsütsü anütsüng langa kümdar.

⁵Aramesoang, aser asenoki aonung tudi aser lar chuba kitem asenoki raksatsüdi.

⁶Kechiyong Temeranger KIBUBAi yamai ashir, “Süngdongtem lensükang, aser Yirusalem anema sabang temketang; merenshitsüba yimtiji ibai lir, la dak kecha mali saka tekangshi lir.

⁷Tzüpokdak nungi tzü adok ama yamaji lai tamajung adokdaktsür la dak tesashi aser rakzükraktemba ola angashir, kü madang maneni shirangba aser zübutem lir.

⁸Oh Yirusalem, ni nenok nungi tangai aenshia oa lir, ni na nisung maliba azüngmeyakdak lima ka kümdakja lir, sayutsüngi o angang.”

⁹Temeranger KIBUBAi yamai ashir, “Israel tanüngba tsükmenatzü tzü amai parnoki jungjunga meshitettsü molok nung tsükmenatzü jang bendeneri bendenba ama ne teka tanaben meyipang.

¹⁰Parnoki angatsüsa ni shiba dang jembitsü aser kuli agütsütsü? Ajiang parnok tenarong memejeptoki lir, aser parnoki angashitsü makok; ajiang, KIBUBA O parnok madang tarütsüba küma lir; iba nung parnok tepela maka.

¹¹Aji asünung KIBUBA ain adokba agi ni sünga lir; aser aji arema ni meliteter. Yimdong nung tanurtem dak, aser asangurtem külemi sentepa aliba madak meküplokjang; kinungpu aser kinungtsü anaprongla taintem aser arishir agitsü.

¹² Aser parnok kintem, parnok lu aser parnok kibutsütem dena tangar nem agütsütsü. Kechiyong linük nung alir madak ni kü teka songtoktsü” ta KIBUBAi ashir.

¹³Kechiyong parnok tilatiba nungi tulutiba tashi nisung shia tazütapungba leni oa lir, aser ainkar nungi oda putir tashi, nisung shia yazüyaponga benshir.

¹⁴ Kü nübur jala zübu ano parnoki pungpapungpa anebja yimjungbo mali nung, “Yimjung, yimjung” ta ashir.

¹⁵Tesempatsü mapatem inyakdang parnok akseta liasü asü? Masü, parnok kecha akseta mesüra tejak meremtsüsa mali asü. Anungji telaor rongnung parnok laotsü; ni parnok merenshidang parnok laodaktsütsü, ta KIBUBAi ashir.

¹⁶KIBUBAi yamai ashir, “Nenok lenmang nung noktakang aser ajiang, aser akhi lenmang kong tajung lir aji asüngdangang; aser iba nung jaja-ang, aser nenok tanela asoshi anisüngzük angutsü.” Saka parnoki ashi, “Yangji onoki mejajatsü.”

¹⁷Aser nenok madak ni miter toktsür ashi, “Jangzü ola angang;” saka parnoki ashi, “Onoki mangatsü.”

¹⁸Aji asünung angang, nenok kintem aser Oh temeshi pur mungdang, parnok dak kechi ataloktsü metetang.

¹⁹Oh alima, angang, ajiang iba nübur madak ni tamajung oda parnok tebilemba tejang bener arudaktsütsü, kechiaser parnoki kü o manga; aser kü ozüngbo parnoki sentokadok.

²⁰Kechi atema Sheba nungi liangmesen aser alima talangka nungi teronem menentsü kü dangi bener arur; nenok tarongba tenla agizüktsü makok mesüra nenok tetepsetba tenla kü madang tepelatsü masü.

²¹Aji asünung KIBUBAi yamai ashir, “Ajiang, ni iba nübur madang temetsüdaktsü ataloka yutsütsü, aser tsürabur aser techirtem külemi item dak metsüdaktsü, kiyonger aser par tembar samatsü.”

²²KIBUBAi yamai ashir, “Ajiang, anüdoklentip lima nungi nübur ka arur aser alima tatembang nungi kin tulu ka aramesodar.

²³Parnoki lijak aser nü amer; parnok taochi maka, aser yimlibilem maka parnok ola tzüyim ama arrür; aser parnok kor nung amener; na anema tongbangi aor nisung ka amato nisung ternemba nung lir. Oh Zion jala!

²⁴Onoki parnok osang angashiogo; aser onok teka tashi mait akümer; touashiba aser tetsür nusodang kangshiba ama onok dak sotadokogo.

²⁵Alui to, mesüra lenmang nung tejaja; kechiyong yangji tsükchir nok aser tejaklen tetsübutsü lir.”

²⁶Oh kü nübur jala, na anemsü abenang, aser ne sasa aut nung longzüa chiguang; nai mang yimang, ajaso chir asoshi ama kanga jebang; kechiyong asen madak tesamatsüsang ajongbena arutsü.

²⁷Kü nübur rongnung ni na tetendanger ka kümdaktsü aser parnok sentong tendangtsüsa, ni lungki aser mitsa ka kümdaktsü.

²⁸Parnok ajaki anema noktaker, atsüngzüka jajartem den senzürtem; parnok yongmenyin aser merang lir, parnok ajaki mejungi benshir.

²⁹Mi agi mipongji aronger, yinsüjibo mi agi yimsaa lir, amajok nung parnoki maneni meshiteter; kechiyong tamajungjibo agiteta meindoki lir.

³⁰Nisungi item dang “taribi yinsü” ta ajar, kechiaser KIBUBAi parnok magizük.