Read njo YERIMIA 7 Bible Online

YERIMIA 7 - njo bible

YERIMIA 7

¹KIBUBA nungi Yerimia dangi aruba o;

²KIBUBA ki süngkhüm nung noktakang, aser yangji o ya sangdongang aser shiang, “KIBUBA oji angang, KIBUBA külemtsü item süngkhüm küboki aiter, nenok Yihuda ajak.”

³Temeranger Telok KIBUBA Israel Tsüngremi yamai ashir, “Nenok yimyatem aser mapatem yanglushiang, aser ni yangi nenok lidaktsütsü.

⁴Ya KIBUBA tenlaki, KIBUBA tenlaki, KIBUBA tenlaki lir, ta tiyazü o nenoki tamang.

⁵Kechiyong nenoki nenok yimyatem aser mapatem jungjunga yanglushira, nenoki nisung ka aser par kiyonger tsüngda nung ochi inyakra;

⁶nenoki aener aser tebu malir aser amitsür mekangshira, aser yangi tai makaba zü metokshira, mesüra nenok pei kangshitsüsa tangar tsüngrem sülen mejajara;

⁷idangji ni nenok tsürabur nem akhidang nungi teti asoshi agütsüba lima nung ni nenok lidaktsütsü.

⁸“Ajiang, amajok nung tiyazü o nenoki amanger.

⁹Nenoki auyatsü, nisung tepsettsü, aser nüktapangtatsü, aser tiyazü azüngashitsü, aser Baal asoshi teronem arongtsü, aser nenoki memeteti aliba bendanger tsüngremtem sülen jajatsü,

¹⁰ajiser iba kidang koba kü tenüng agi ja-a lir, arua noktaker, ‘Onok kümzüka lir’ ta shia item tesempatsü ajak nenoki inyaktsü no?

¹¹ Iba ki koba, kü tenüng agi ja-a lir, ne nükdang rakzükraktemertem leprungki ka aküm asü? Ajiang, oda ni aji nguogo” ta KIBUBAi ashir.

¹² “Saka tang kü talidak koba Shilo nung liasü, ajagi nenok oang, kong ni kü tenüng tamasabo lidaktsü, aser kü nübur Israel majungba asoshi ni iba dak kechi inyak ajiang.”

¹³Aser tang, KIBUBAi ashir, “Nenoki item mapa ajak inyaka ali nung ni anepungi aser menua nenok dang jembi, saka nenoki manga; aser ni nenok aja, saka nenoki matang.

¹⁴Anungji iba ki koba kü tenüng agi ajar, koba nung nenoki tamang akar, talidak koba ni nenok nem aser nenok tsürabur nem agütsü, iba Shilo dang inyakba ama, iba ki aser talidak ni inyaktsü.

¹⁵Aser ni kü tsüngdang nungi nenok sosem ajak endokadoktsü, oda Efraim kidong ajonga jentokba ama ni nenok jentoktsü.”

¹⁶Aji asünung iba nübur asoshi nai temepishi, mesüra parnok asoshi ola tagütsü mesüra sarasadem tesü, mesüra kü dang temepishi, kechiyong ni ne dang mangatsü.

¹⁷Yihuda yimtitem aser Yirusalem yimdongtem nung parnoki kechi inyaker nai mangur no?

¹⁸ Anüng chubatsür nem amtsük sangtsütsü asoshi, tanurtemi süng akur, tebutemi mi aputeter, aser tetsürtemi amzü ajepshir; aser ni ain adokdaktsütsüsa parnoki tangar tsüngremtem nem tajemtsü tenla meküploktsür.

¹⁹Ya parnoki ni ain adokdaktsür asü? Mesüra parnok pei sasa, mangmangtsüsa inyaker masü no? ta KIBUBAi ashir.

²⁰Aji asünung KIBUBA Tsüngremi yamai ashir, “Ajiang, kü ain adokba aser kü mit iba talidak, nisung madak, shiruru madak, ali nung süngjang madak, alatsü aser aji meremsepteti arongtsü.”

²¹Temeranger KIBUBA, Israel Tsüngremi yamai ashir, “Nenok tarongba tenlatem tetepsetba tenla nung enokang, aser shiji chiang.

²²Kechiyong Ijip lima nungi nenok tsüraburtem ni anir adokdang, tarongba tenla mesüra tetepsetba tenla indang ni parnok dang mejembi mesüra memela;

²³saka iba temelaba ni parnok nem agütsü, ‘Kü ola angang, aser ni nenok dang melaba lenmang ajak nung jaja-ang, angji nenok junga alitsü.’ ”

²⁴Saka parnoki manga mesüra tenarong maten, saka parnok pei shisatsü nung aser parnok temulungsentsü tamajung temerangba nung parnoki jaja, aser tejakleni masü tesüleni ao.

²⁵Nenok tsürabur Ijip lima nungi adokba anogo nungi tanü tashi ni nenok dangi kü tenzüker aser ainkar ajak anogo shia yokjen yoker.

²⁶Aji saka parnoki kü dang manga mesüra tenarong magütsü, saka parnok tekong temerang kümdaktsü; par tsürabur dang nungi tamajungba parnoki inyak.

²⁷Aser nai item o ajak parnok dang jembitsü, saka parnoki ne danga mangatsü, nai ano parnok dang ajatsü, saka parnoki ne dang matangtsü.

²⁸Aser nai parnok dang ashitsü, “Iba kini KIBUBA parnok Tsüngrem O manga mesüra sayutsüngi magizük; parnok tebang nungi ochiba samadok, aser leptokadoka lir.”

²⁹Ne ku sütokang, aser aji endokadokang, aser tenem moa nung aiatai ta ayimtenang, kechiyong KIBUBAi pa ain adokba putu magizük aser jentokadok.

³⁰Kechiyong Yihuda chirtemi kü tsüngdang tamajung inyak, ta KIBUBAi ashir; kü tenüng agi ajaba kidang aji menendaktsütsü parnoki tesempatsü mapatem ayu.

³¹ Aser parnok chirtem aser jalatem mi nung arongtsü, Hinnom chir lenten nung Tofet tekülemdak tenem yanglu; koba ni memela mesüra kü mulung nunga mait liasü.

³²Anungji, atangji anogotem arudagi ta KIBUBAi ashir, iba dang kodanga Tofet ta majatsü, mesüra Hinnom jabaso lenten ta majatsü, saka tepsetba lenten ta ajatsü,

³³Aser iba nübur tasümangtemji anüng ozü aser alima shirurutem asoshi chiyungtsü asütsü; aser kechaia parnok mepusadaktsütsü.

³⁴ Idangji ni Yihuda yimtitem nungi, aser Yirusalem yimdong nungi menüba ola aser pelatepba ola, aser kiyimsang ola aser kiyimla ola anendaktsütsü; kechiyong alinükji azüngmeyakdak akümtsü.