Read njo YERIMIA 8 Bible Online

YERIMIA 8 - njo bible

YERIMIA 8

¹Idangji KIBUBAi ashir, “Yihuda aser par tongtipur teret, par putirtem teret, par ainkartem teret, aser Yirusalem nung alirtem teret parnok lep nungi parnoki agitettsü.

²Aser itemji anü ita, aser anüng petinu ajak madak prokshitsü, koba dang parnoki meim, aser tenzük, aser anidak, aser bushi, aser külem; itemji mebendentsü, mesüra maremtsü, ali tema nung jana küma toktsütsü.

³Aser ni aridokdak ajak nung, iba kin tamajung anünga alir ajaki taküm dang nungi tasümang shimtettsü” ta Temeranger KIBUBAi ashir.

⁴Ano nai parnok dang ashitsü, KIBUBAi yamai ashir, “Nisung laor tanaben meshishitsü no? Kati meyipa ora, tanaben meyipa marutsü no?

⁵Ajangla kechiba iba nüburi teti atsüngzüka tesüleni aor? Tekülak akang akanga parnoki soter, parnoki tanaben memeyipli asür.

⁶Ni tenarong tena anga liasü, saka parnoki shitak mejembi; nisung shingai ni kechi inyak? ta pei majungba nungi temulung memeyiper, tongbangi tsüoka aiba kor amai, nisung shiai pei lenmangi meyiper.

⁷Hau, anüng nung tzü ozüi pei tatakzük mapang meteter; aser posü, molulem aser tzü ozüi parnok aruba mapang benshir; saka kü nüburi KIBUBA temelabaozüng memeteter.”

⁸“Onok shisa taka lir, aser KIBUBA ozüng onok den lir” ta nenoki koda ashir? Saka, ajiang, tezülurtem tiyazü kolem agi aji tiyazü kümdaktsüogo.

⁹Shisa akar nisung akseta lir, parnok bangka-a aser aoksa-a lir; angang, parnoki KIBUBA O senzüka toktsü, aser kechi komala shisatsü parnok dak lir?

¹⁰ Aji asünung ni parnok kinungtsütem tangar nem agüjadoktsü, aser parnok lu parnok akoker nem agüjadoktsü, kechiyong nisung shia tilatiba nungi tulutiba tashi tenükshiba tsütsü lir, ainkar nungi oda putir tashi nisung shiai tiyazü inyaker.

¹¹ Kü nübur zübu parnoki pungpapungpa anebtsür, yimjungbo mali nung, “Yimjung, yimjung” ta ashir.

¹²Parnoki tesempatsü benshidang parnok akseta liasü asü? Masü, parnoki kecha akseta mali, mesüra koma tejak meremtsü ajia parnoki memetet. Aji asünung telaor rongnung parnok laotsü, parnok endokadoktsü ta KIBUBAi ashir.

¹³Ni parnok meshimeshia samatsütsü. KIBUBAi ashir, “Tezü nung tsükmenatzü tejang mali, mesüra munguzünu tetong nung munguzünu tejang mali, aser toji azülaogo, aser ni parnok nem agütsübatem parnok nungi süia ogo.”

¹⁴Kechiba ano asenok mena alir? Atenshiang, asenoki noktanga aliba yimtitem jagi idi, aser yangji samadi; kechiyong KIBUBA asen Tsüngremi asenok samatsü tiatsü, aser mim atenba tzü taku tajemtsü asenok nem agütsü, kechiaser asenoki KIBUBA anema temenen benshi.

¹⁵Asenoki yimjung bushi, saka kecha tajung mangur aser tanebtsü mapang bushi, saka ajiang, taoksatsü tulu.

¹⁶Par kortem teni akongba Dan nungi angashir; tashi taittem kor asatepba agi linük ajonga atentener, kechiyong parnok arua lir aser linük aser yangji aliba ajak meyoka lir, yimti aser yangji alirtemji meyoka lir.

¹⁷Kechiyong ajiang, ni per aser mim per yoktsü, koba puatsü makok, aser item jagi nenok dak mechitsü ta KIBUBAi ashir.

¹⁸Aia! Kü tejashi onsara tulu, kü mulungjang telung nung lular!

¹⁹Angang, alima kanga talangka nung kü nübur jala ayimtenba ola, KIBUBA Zion nung mali no? Lar chuba la den mali no? Kechiba parnoki ni süngyanglu noksa agi aser bendanger amajok mapatem agi jashidakja ain adokdaktsür?

²⁰Aluruwa süiogo, mei temogo, aser asenokbo mekümzüki lir.

²¹Kü nübur jala yiruba yong kü mulung yirua lir; ni mang yimdagi; tetsübutsü agi kü dak tongogo.

²²Gilead [1] nung tanebtsü mozü mali no? Yangji mozüshiteter mali no? Ajangla kechiba kü nübur jala temang maneber?