Read njo YERIMIA 9 Bible Online

YERIMIA 9 - njo bible

YERIMIA 9

¹Oh, kü kolak tzüpokdak asübo aser kü nük nüktzü apokdak ka asübo oda ni mangli sangwali kü nübur tepsetba asoshi jeba lila!

²Oh, lisem lima nung aener anendak ka ali asübo, oda ni kü nübur toktsür parnok nungi oadokla, kechiaser parnok ajak nüktapangtartem, ashikülak nisung telok ka lir.

³Aser parnoki tiyazü asoshi lijak amato parnok temeli azüa arur, parnok linük nung tashi ita küma lir, saka atangji asoshi masü; kechiaser parnoki tamajung nungi tamajungi aor, aser parnoki ni memetet ta KIBUBAi ashir.

⁴Nenok nisung shia pei kiyonger asoshi kümdangang, aser nenoki adianu shinga daka tamang taka; kechiyong adianu shiai takok tashi külakoktsür aser kiyonger shiai sensamasaja aor.

⁵Aser parnok kiyonger shiai pi ashioktsür, aser ochi mejembir; parnoki pei meli dang tiyazü jembitsü sayuogo; parnok ania maküm tashi parnoki tai inyaker.

⁶Ne talidak külakkübong rongnung lir; külakkübong ajanga parnoki ni metettsü magizüker ta KIBUBAi ashir.

⁷Anungji Temeranger KIBUBAi ashir, “Ajiang, ni parnok yimsatsütsü, aser parnok tendangtsü, kechiyong kü nübur majungba madak, ni ano kechi inyaktettsü?

⁸Parnok temeli tasütsü lijakjang lir; iba yagi tekülak jembir; kati pei kiyonger dang sünepsünepa pei tebang agi jembir, saka pa mulungjang nung pa asoshi sang soa ayur.

⁹Item mapa asoshi ni parnok memerenshili ma? Iba ama kin ka dang ni mang meyangli ma?” ta KIBUBAi ashir.

¹⁰Tenemtem asoshi ni ajebtsü aser jeba ayimtentsü aser arem nung chiyimdak aiatai ta ayimtentsü kechiaser item rongdoka lir, anungji shingaia aji ajanga mesüiteter; mesüra nisungtemi nashi telok ola angashitsü makok, anüng ozütem aser shiruru jena aor aser parnok ogo.

¹¹Aser ni Yirusalem senreptsütsü, shirong leprungki kümtsütsü aser Yihuda yimtitem, nisung meli-i azüngmeyakdak kümtsütsü.

¹²Ya angatettsü shisa akar nisungji shiba lir? Aser pai aji metetdaktsütsüsa KIBUBA tebang agi shiba dang jembia lir? Kechiba linükji lisem lima shingaia süia motettsüsa rongtokadok?

¹³KIBUBAi ashir, “Kechiaser parnoki kü ozüng koba parnok madang ni toktsü; aser kü ola manga, mesüra iba nung mejaja;

¹⁴saka parnok pei mulungjang teküprak sülen, aser parnok tebu nungertemi sayuba Baaltem sülen jaja.”

¹⁵Aji asünung Temeranger KIBUBA, Israel Tsüngremi yamai ashir, “Ajiang, ni iba nüburtem takudong agi mesütsü, aser tajemtsü tzü taku agütsütsü.

¹⁶Ni ano parnok kin rongnung prokshidaktsütsü, shirnok parnoki süshia parnok tsüraburtemi süshia memetet; aser parnok mesamatsü tashi parnok sülen ni nok yoktsü.”

¹⁷Temeranger KIBUBAi yamai ashir, “Nenoki shisadangang, mangyimba tetsürtem parnok arutettsüsa ja-ang, aser mangyimtsürtem arutettsü tajai yokang;

¹⁸aser parnok ilungdakjang, aser asenok asoshi jebtepdakjang, angji asenok tenük nung nüktzü yima ludaktsütsü, aser nükküptsü nungi tzü jateta adoktsü.

¹⁹Kechiyong jebtepba ola ka Zion nung angashir. Asenok koda raksa lir, asenok kanga maksüa lir, kechiaser asenoki linükji toktsü kechiyong parnoki asenok talidak raksatsü.

²⁰Nenoki KIBUBA Oji angang. Oh nenok tetsürtem, nenok tenarong agi pa bang o agizükdakjang, nenok jalatem dang jebteptsü sayuang, aser nisung shiai kiyonger dang aiatai ken sayudakjang.

²¹Kechiyong asen kichibai tasüba atua lir, ibaji asen chuba kidangi aita lir; tanurtem kimalen aser asangurtem yimdong nung leptokadoktsü asoshi.

²²Jembiang, KIBUBAi yamai ashir, nisung tasümang moapu nung jana ama tsüktsü, alurur nisung sülen tekabu sünga toktsüba ama aser shiangia itemji mebendentsü.”

²³KIBUBAi yamai ashir, “Shisa akar nisungi pei shisatsü nung asü teküm, mesüra tashi tulu nisungi pei tashi nung asü teküm, takar nisungi pei rongsen nung asü teküm.

²⁴ Saka shibai asü akümer iba nung asü kümdakjang, oda pai ni angateter, aser meteter, oda alima nung, temeim, yimlibilem obendang, aser temeshiba inyakbaji ni KIBUBA lir; kechiaser item nung ni pelar” ta KIBUBAi ashir.

²⁵Ajiang, anogotem arur, ta KIBUBAi ashir, shirnok mejeptok saka ano memejeptoki ali, ni parnok ajak merenshitsü.

²⁶Ijip, Yihuda, Edom, Ammon chirtem Moab, aser lisem lima nung alir ajak pei ku tezülen südokertem;[2] kechiyong item kin ajak memejeptok lir, aser Israel kidong ajak temulungjang nung memejeptok lir.