Read njo AIATAI 1 Bible Online

AIATAI 1 - njo bible

AIATAI 1

¹Aia, nisung sünga aliba yimti to, koda rongjenseta mena lir! Kin rongnung la tulu alibato, koda amitsür mesüka la lir! Yimti rongnung chubatsür ka alibato, tayimer ka küma lir.

²Aonung kukua lai ajeber. La tenibung nung nüktzü lir. La meimer ajak rongnung, la süneptsürbo shinga mali. La tembar ajaki la den ashiokja benshiogo, Parnok la tsükchirtem kümogo.

³Tekangshiba yong, aser ala-ashiba yong, Yihuda pur ogo; la kintem rongnung alir, saka la anisüngzük mangur. La arishir ajaki, la temejepdak tia nung lia menepogo.

⁴Zion lenmangtemi mang ayimer, kechiaser temeshi benjong jagi shinga marur. Lar süngkhüm ajak azüng azünger, lar putirtemi nüngtepa lir. Lar aiürtem kangshia lir, aser la-a timtemseta lir.

⁵La anemertem temaba kümogo, la tsükchirtem azükarur; Kechiyong la ozüng jenti raksaba asoshi KIBUBAi la timtemdaktsü. La chirnurtem anemertem madangi, Tepuokdaki ogo.

⁶Aser Zion jala nungi la meraket ajak pilaogo. La chuba chirtem chiyimdak makaba mesü ama kümogo; aser shirishir jakdang, parnok tashi lula-a jenogo.

⁷La timtemba aser tejashi anogo nung, alemli nungi la meyong senti oset ajak, Yirusalemi bilemteter; aser kodang lar nüburtem anemer ket nung tsük, aser shingaia la meyari; Idangji anemertemi la angu, Parnoki la laoba sensatsü.

⁸Yirusalemi temenen tulu mena. Anungji la temenen oset ama aküm; la tushirtem ajaki la sensamasatsür, kechiaser parnoki la mangsa tia angu; hau, la lasasa anünger, aser la tejak tesülen ashir.

⁹La memerükbaji la teperem sü nung liasü; Lai la tatembang meshisadang; anungji la tesüngmangtsüka alu. La tesüneptsür mali; “Oh, KIBUBA, kü timtem ajiang, kechiyong tsükchiri pei sasa uluogo.”

¹⁰Lar senti oset ajak madak, tsükchirtemi teka songtokogo. Lai kintem temeshidaki aibajia angu, oda, shirnok indang nai ne mungdangi parnok maitsü, ta ozüng agüja liasü.

¹¹Lar nübur ajak anünger, parnoki aneti aor. Parnok tashi arudaktsütsü asoshi, parnoki senti oset agi chiyungtsü melener. Ajiang, Oh KIBUBA, aser ajiangjo, kechiyong ni sensamasaja lir.

¹²Anasa senzür nenok ajak, nenok madangbo ya kecha masü no? Ajiang, pa mit adokba anogo nung, KIBUBAi ni kangshidaktsüba, Kü dak atongba kü tejashi ama tanga tejashi ali maliar ajidangang.

¹³Anüng nungi pai kü teret telungi mi yok, aser aji agi parnok akoker. Pai kü tsüng asoshi sang aso, Pai ni meyipa odaktsü; Pai ni anogo tepiyong. Azüngmeyaka lula-a kümdaktsü.

¹⁴Kü ozüng raksabatem süngra; Itemji pa ket agi alentepa lir. Itemji kü tekong nung pungokja lir. Pai kü tashi makai kümdaktsü, Shirnok anema ni menoktakteter parnok ket nung KIBUBAi ni agütsü.

¹⁵Kü tashikar nisung ajak, Kü tsüngdang KIBUBAi amajok dang kümdaktsü; Kü asangurtem akureptsü asoshi, ni anema pai telok jatep. Yihuda tasüngtet jalaji motsüngnem nung ama, KIBUBAi ajemshitsüogo.

¹⁶Item asoshi ni ajeber. Kü tenük nüktzü ayimer. Kechiaser kü nela asentenshia tesüneptsürji ni nungi talangka oagi lir. Kü chirnurtem azüng azünga lir, kechiaser tsükchiri kokogo.

¹⁷Zioni la teka songtoker; saka süneptsütsü shinga mali. Yakob indang, oda pa meketa alirtemji, pa anemerang asütsü ta KIBUBAi melaogo; aser parnok rongnung Yirusalem temenen oset ka amato lir.

¹⁸KIBUBA ochiba nung lir, kechiyong ni pa ozüng anema inyak. Angangjo, nenok nübur ajak, aser kü tejashi ajiang; Kü aiürtem aser kü asangurtem pur ogo.

¹⁹Ni kü meimertem aja, saka parnoki ni ashioktsü. Kü putirtem aser kü tamburtem, taküm asoshi chiyungtsü bushidang Yimti nung parnok sama.

²⁰Ajiang, Oh KIBUBA; kechiyong ni timtem nung lir; kü nela pesaprung lir; kü mulung telunglen amsar. Kechiyong ni kanga sashia anemogo; yimdong nung nok sangshir, kidangbo tasüba ama lir.

²¹Parnoki ni anünger ta angashir, ni süneptsürbo shinga mali; kü tsükchir ajaki kü timtem angashi. Nai ya inyakba nung parnok pelar. Nai ayongzükba anogoji nai arudaktsütsü, aser parnok ni mesüka lidakjang.

²²Parnok majungba ajak, ne madangi arudakjang. Aser ni ozüng raksaba asoshi, kü dang inyakba ama, parnok dang inyakangma, kechiyong kü tanüngba jenti, aser kü mulungjang lula-a lir.