Read njo AIATAI 3 Bible Online

AIATAI 3 - njo bible

AIATAI 3

¹Pa terasaba mechi kübok, timtem anguba nisungji ni lir.

²Tesangwa makai tammangdaki, pai ni ariokja anir aru.

³Atangji ni anema anogo tepiyong, pa teka meyipshijen meyipshir.

⁴Kü shi aser kü teküp pai lurepdaktsüogo, kü teret pai raksatsüogo.

⁵Pai ni anema lungbangogo, aser taku aser tekangshi agi meketbangogo.

⁶Sür talangka yutsüba amato, pai ni tammangdak lidaktsü.

⁷Ni madoktettsüsa pai ni meketa atsübang; pai kü merangsen taret kümdaktsü.

⁸Hau, ni teyari meshia ayimtendang, Pai kü sarasadem shibangadoker.

⁹Lung tangentet agi kü lenmang pai atsüngdangogo. Pai kü lenmang tekirak kümdaktsü.

¹⁰Shiremi mita ataba ama, molusongzü kati atsüka ataba ama, kü madang pa lir.

¹¹Pai kü lenmang anisatsüogo, aser ni anüka ajasatsüogo. Pai ni azüngmeyaka kümdaktsüogo.

¹²Pai pei lijak azüa aruogo, aser lijakjang agi akatsüba nükladong ni kümdaktsüogo.

¹³Pa lijakbong nungi lijakjang agi, kü mulungjang nung pai jangoktsüogo.

¹⁴Kü nübur ajak asoshi menüdong ni kümdaktsüogo; aser anogo tepiyong parnok ken kümdaktsüogo.

¹⁵Pai ni taku agi süngdaktsü, pai ni taku tzü agi lakseta kümdaktsü.

¹⁶Lungsang agi pai kü pu raksatsür; pai ni aut agi tokbangtsüogo.

¹⁷Kü nela tesünep makadaktsüi lir, tepelaji kechiar ni amaogo.

¹⁸Anungji ni ashir, “Kü tashi samaogo, aser KIBUBA nungi kü teimlatsü maka.”

¹⁹Kü timtem aser kü tuokrong, taku tzü aser taku bilemtetangma.

²⁰Kü nelai iba indang maneni bilemer, aser kü dak kokroka anener.

²¹Ibai kü mulungi arur, anungji ni teimla kar.

²²KIBUBA temeim yimlibilem tulu agi asenok mesamai lir. Kechiaser pa taochi kodanga tatembang maka.

²³Anepdang shia parnok tasen; ne temulung alemba tulu lir.

²⁴Kü nelai ashir, “KIBUBA kü shilem, anungji ni pa dak imlatsü.”

²⁵Pa asoshi ata-a alirtem dang, pa bushir tanela asoshi KIBUBAji tajung lir.

²⁶Nisungi KIBUBA tekümtet asoshi imlatsü, aser ola madoki alitsü tajung lir.

²⁷Asangwa süngpu aputsübaji, nisung ka asoshi tajung lir.

²⁸Pa kija ola madoki mendakjang, kechiaser aji pai pa dak benloktsüogo.

²⁹Pa tebang auyi nung chilokdakjang. Aji oda süra, teimla alitsüa akok.

³⁰Shibai pa dak amar, pa dangi tenibung tendakang; aser pa mezüngmeshi agi süngdakjang.

³¹Kechiyong KIBUBAi tetibo mejendoktsü.

³²Kechiyong pai jashidaktsüaka, aji saka pa aria bilemba jenti, pa temeim yimlibilem yari alitsü.

³³Kechiyong pai timtem agütsütsü, mesüra nisung chirtem jashidaktsütsü memulunger.

³⁴Alima nung tepuoker ajak, tetsüng kübok menüngsatsü,

³⁵Tematiba tsüngdang, nisung ka temeden tim mapa endoktsütsü.

³⁶Nisung ka pei tim mapa meyipsatsütsü, KIBUBAi magizüker.

³⁷KIBUBAi memela asübo, shibai melar aji ataloka arula asü?

³⁸Tajunga tamajunga arubaji, tematiba nungi masü no?

³⁹Kechiba akümlir kati, oda nisungi, pei temenen temerenshi asoshi nemnemer?

⁴⁰Asenoki asen lenmang bushidi aser tendangdi, aser KIBUBA dangi tanaben meyipdi.

⁴¹Asen temulungjang aser asen teka, kotak nung aliba Tsüngrem dangi asenoki ajungketdi.

⁴²Onoki ozüng raksa aser anema noktak; aser nai tai madok.

⁴³Nai ne sasa ain adokba agi sobu, aser onok aria arua nai maochidang tepset.

⁴⁴Onok sarasadem ajanga marutettsüsa, nai ne sasa mepet agi lungbangadok.

⁴⁵Kintem rongnung nai onok rüja, aser jana ama kümdaktsü.

⁴⁶Onok tsükchir ajaki, onok anema parnok tebang ka-a lir.

⁴⁷Tetsübu aser kangla, azüngmeyak aser teraksatsü onok madak arua lir.

⁴⁸Kü nübur jala samaba asoshi, kü tenük nüktzü ayong küma ayimer.

⁴⁹Kü tenük nungi tanen makai, nüktzü ayimtsü.

⁵⁰Kotak nungi KIBUBAi, reprangzüka yoka mereprang tashi,

⁵¹Kü yimti jalatem meji kü tenüki, kü nela tejashi tendaktsür.

⁵²Kecha masü nung kü tsükchirtemi, ozü ka amai ni arishir.

⁵³Kangla nung parnoki ni taküm ajungoktsü, aser kü madak lung arangoktsü.

⁵⁴Tzü agi kü kolak mobang; ni ashi, “Ni makaka.”

⁵⁵Teküboktiba kangla nungi, ni ne tenüng aja, Oh KIBUBA.

⁵⁶Teyari asoshi ni ayimtendang, nai kü ola angashi; nai ne tenarong tetangbangma.

⁵⁷Ni na ajadang nai anasa aru; nai ashi, “Tetsübu.”

⁵⁸Oh KIBUBA, nai kü nela atema tepu aküm, nai kü taküm alangzükogo.

⁵⁹Oh KIBUBA, nai kü dang inyakba tai nguogo; nai kü o bendangangma.

⁶⁰Ni anema parnok mangyangba, aser parnok tasa ajak nai nguogo.

⁶¹Oh KIBUBA, parnoki arütsüba, aser ni anema parnok tasa ajak nai angashiogo.

⁶²Anogo tepiyong ni anema nemnemer aser apusortem, tebangmechi aser parnok tebilemba ni anema dang lir.

⁶³Parnok amenba, aser parnok shishiba ajiang; parnok ken ni kümogo.

⁶⁴Oh KIBUBA, parnok teka mapa yari, nai parnok nem lepa agüjangma.

⁶⁵Nai parnok nem temulungjang anüanüa akümtsü agüjang; ne atakatem parnok dak alitsü.

⁶⁶Ain adoka nai parnok aria aotsü, aser ne anüng kübok nungi parnok samadakjang, Oh KIBUBA.