Read njo AIATAI 4 Bible Online

AIATAI 4 - njo bible

AIATAI 4

¹Aia, hon to koda sentsü jenogo! Hon temeja to koda melenshiogo! Yimdong shia lenjem nung, temeshi lungtem prokshia lir.

²Zion tanurtem hon temeja ama prangshia alibato, koda poteper teka agi yangluba alipo ama züngshir!

³Oda shirongtemia mama yongdaktsür, aser parnok techanu anebalur, saka arem nung taochi makaba ostrich ozütem ama, kü nübur jalatem taochi maka küma lir.

⁴Tetzüra agi mama ayongba kinütem temeli tawa nung menaloka lir. Tanur tilatemi chi meshir, saka shingaia parnok nem magütsür.

⁵Lirepatsüka chiyungertemto yimdong nung samar. Temerem sü abener yinteterto rüja nungtendak ontaka lir.

⁶ Kechiyong Sodom koba dak teka meidang, mapang tatsüka nung ajungtokadok. La temerenshi dang nungi, kü nübur jala temerenshiji tuluba lir.

⁷Lar tongtipur rürjeb dang nungi temerükba; mamatzü dang nungi parnok temesüngba liasü. Sentilung dang nungi parnok temang, apetasong maket merema liasü. Parnok sorubangru tobur ajungji, sapfir sentilung mesüka liasü.

⁸Parnok tejak mijang dang tanakba; yimdong nung parnok majiteter. Parnok teküp teret nung neploka lir; Ashirepa lir, süng taru ama parnok arosüka lir.

⁹Taya agi kongrasüka, alu nungi süngjanglijang mungui, asüba dang nungibo nok agi lepsetbajiang tajungba lir.

¹⁰ Taochi akaba tetsürtem, lar teka agi pei chirtem metaogo. Kü nübur jala samatsüba nung, tanurtemji lar chiyungtsü aküm.

¹¹KIBUBAi pa mit adoka inyakogo, pai pa tesashi ain adokba tokloktsüogo; aser pai Zion nung mi ka tsüklok. Iba mi jagi iba kimung rongtoktsüogo.

¹²Yirusalem süngkhümi, tanemer aser tsükchirtem aitsü ta, alima chubatemi mesüra alima nüburtem, shingaia mamang.

¹³Ya lar ainkartem temenen yong, aser lar putirtem tai temenen yong. Parnoki temeshi pur azü, la alidak tokshi.

¹⁴Yimdong nung nükpoker ama parnok nemzür. Parnok azü agi mezübanga lir, anungji nisungi parnok süoshi nung, kongshitsü makoker.

¹⁵Parnoki parnok dang ayimten, “Nenok aenshiang! memerük! aenshiang! aenshiang! tekongshi!” Anungji parnok jenshia nemzür aküm. Nisungtemi kin rongnung ashi, “Joko parnok asenok den melidaktsütsü.”

¹⁶KIBUBAi pa sasa parnok prokshidaktsü, joko pai parnok mesükshitsü. Putirtem dang tetushi kecha mesayu, tamburtem dang yimli kecha mesayu.

¹⁷Onok amajok teyari asoshi atadang, onok tenük agi matir. Kümzüktsü makokba kin asoshiang, onoki imla-a ataogo.

¹⁸Onok yimdongi motettsüsa, parnoki onok tsüngsü apur. Onok tatembang tatonger; onok anogo sükteta lir. Kechiyong onok tatembang tongogo.

¹⁹Onok arirtemji anüng nung, mongzü dang nungi tekaraba; tenem manung parnoki onok aria aru. Arem nung parnoki onok mita ata.

²⁰KIBUBAi mezüja shimtetba, onok teni-i tangu sashiba, Parnok kangla nung tsük; Shiba indang onoki ashi, pa akhüm kübok kin rongnung onok alitsü.

²¹Pelashishia liang aser pela-ang, Uz lima nung alir, Oh Edom jala. Saka marokji ne dangia tonga arutsü. Nai meseptsü, aser ne sasa mangsa akümtsü.

²²Oh Zion jala, ne menen temerenshi temogo. Pai joko na tepuokdaki bener maotsü; saka, Oh Edom jala, pai ne menen semdangtsü. Pai ne menen bushitettsü.