Read njo AIATAI 5 Bible Online

AIATAI 5 - njo bible

AIATAI 5

¹Oh KIBUBA, onok dak kechi ataloka lir, aji bilemtetangma; Ajiang, aser onok maksü reprangang.

²Onok senmang bendanger nem, onok ki semloka alir nem agütsüogo.

³Onok lajar aser tebu malirtem lir, onok tetsütem amitsür ama lir.

⁴Onoki ajemba tzü asoshi sen agütsür, onok süng onok dang ayoker,

⁵Ozü tsükchirtemi onok tekong nung nepeta arir. Onok aniseta lir; onok anisüngzük maka.

⁶Chiyungtsü peria angutsü asoshi Ijip, aser Asiria nem teka agütsüogo.

⁷Onok tsüraburtemi temenen mena, aser joko mali; aser onoki parnok tai temenen khu abener.

⁸Onok madak alartemi yimsü asür, Parnok ket nungi kümzüktsü shinga mali.

⁹Onok taküm tenla-a dang onoki chiyungtsü angur, kechiaser arem nung nok lendong lir.

¹⁰Ayawara agi arongba tatsük agi, onok teküp mibong ama tatsük lir.

¹¹Zion nung tetsürtem, Yihuda yimtem nung tasüngtet aiürtem, teka ia raksatsür.

¹²Tongtipur parnok ket agi itaka sangzüa yua lir; tamburtem dang akhümtsübu mesayur.

¹³Asangurtem semki nung tsük khanga sendaktsür; aser tanurtem süngkhu taret bener mangazür.

¹⁴Tamburtemi yimti süngkhüm toktsüogo, asangurtemi parnok ken atenba toktsüogo.

¹⁵Onok mulungjang tepela anenogo. Onok tsüngsangba to mangyimba kümogo.

¹⁶Onok kolak nungi korang tsükogo, onok asoshi aiatai, kechiyong onoki tai menaogo.

¹⁷Iba asoshi onok mulungjang shiranga lir. Item asoshi onok tenük manga kümogo.

¹⁸Jentoka aliba Zion tenem asoshi; iba manung shirongtem senzür.

¹⁹Saka, Oh KIBUBA nai teti yimsü asür. Ne chuba menden putusa putu jena alir.

²⁰Kechiba nai teti asoshi onok amadoker? Kechiba nai papigati onok senzüka toktsür?

²¹Nai onok ne dangi meyipa arudakjang, Oh KIBUBA, aser onoki meyiptsü. Alemli ama ozü anogo tasen kümjangma.

²²Nai onok khenyongi sentok asü, mesüra onok anema na kanga ain adoka lir.