Read njo EZEKIEL 1 Bible Online

EZEKIEL 1 - njo bible

EZEKIEL 1

¹ Küm semerbuba, ita pezübuba, anogo pungububa nung Kebar ayong anasa tepuokertem den ni alidang, anüng lapoker ni Tsüngrem mangdang angu.

² Ita pungunübuba, Yehoiakin chuba tepuokba küm pungububa nung,

³Kebar ayong anasa Kaldi nunger linük nung, Buzi jabaso Ezekiel putir dangi KIBUBA o jangja jangja aru; aser KIBUBA teka pa madak liasü.

⁴Aser ni reprang, aser ajiang, yipru mopung anüdoklentip nungi, mepet tulu, iba ajanga mi preta, aser aji meketa sentsüprangba, aser iba tiyong nung merang ama prangpranga ya-a liasü.

⁵ Aser iba rongnungi taküm aliba shiruru pezü mesüka aru. Item tereprangtsü ya liasü; parnok sorubangru nisung mesüka liasü.

⁶Aser parnok shia tejak pezüzü, aser parnok shia tashikang pezüzü liasü.

⁷Parnok tetsüng metong metonga liasü; aser parnok temupu telunglen nashi chanu temupu ama liasü; aser temeyutetba yongmenyin ama parnoki prangshi.

⁸Aser parnok tesa pezüsülen parnok tashikang kübok nisung teka tena liasü; aser pezüprongla parnok tejak aser parnok tashikangtem yamai liasü;

⁹parnok tashikang kati ka den metentepa liasü; aser parnok aodang parnok tejak memeyip; parnok shia kata kata indang indanga tejakleni ao.

¹⁰ Aser parnok tejak tereprangtsüji: parnok pezüprong nisung tejak aten; aser parnok pezüprong tabelen nashi pungchi tejak aten; parnok pezüprong ano mongzü tejak aten.

¹¹Aser parnok tejaktem aser tashikangtem yamaji balala temalen adoka liasü; parnok shia tashikang ana, kati ka den metentep, aser anati parnok temang nembanga liasü.

¹²Parnok shia indang indanga tejakleni ao; tanelai koleni onü ilenji parnok ao; parnok aodang parnoki memeyip.

¹³ Aser taküm aliba shiruru rongnung tereprangtsü kabo milenpung mesüka liasü; aji taküm aliba shiruru rongnung oli-aruli ta senzüa liasü; aser miji sentsüpranga liasü; aser mi nungjagi tsüngpret adok.

¹⁴Aser taküm shirurutemji tsüngpret pretba tereprangtsü amai asema ao aser meyipa aru.

¹⁵ Tang taküm shirurutem dak ni reprangdang, tejak pezüzü atenba shia asoshi, taküm aliba shirurutem anasa talongtsü tetsüng kaka ali nung ataloka aliba ni angu.

¹⁶Talongtsü tetsüng sentsüji tenenya sentsüprangba senti lung ama liasü, aser item pezüprong tereprangtsü kasa liasü, Tsüngrem teyanglubaji talongtsü tetsüng ka telung nung talongtsü tetsüng ka aliba mesüka liasü.

¹⁷Kodang parnok ao, parnok tip pezüsülenisa ao; parnok aodang parnoki memeyip.

¹⁸ Aser talongtsü tetsüng temeketji talang aser tetsübutsü; aser item pezüprong meketa tenük agi sünga liasü.

¹⁹Kodang taküm shirurutemji ao, talongtsü tetsüngtemjia parnok den ao; aser kodang taküm shirurutem ali nungi ajungket, gari tsüngtemjia ajungket.

²⁰Kolenisa tanela odir, parnok ao, aser talongtsü tetsüngtemji item den arameso; kechiyong taküm aliba shirurutem tanela talongtsü tetsüng nung liasü.

²¹Itemji aodang ajakji ao, aser noktakdang ajakji noktak; aser ali nungi aramesodang, talongtsü tetsüngji item den arameso; kechiyong taküm aliba shirurutem tanela talongtsü tetsüng nung liasü.

²² Taküm aliba shiruru kolak nungji anüng sadakba mesüka liasü, tetsübutsü rürjeb long sentsü mesüka, parnok kolak manung temalen adoka liasü.

²³Anüng tesadakba kübokji parnok anasa tashikangtem jagi tanabuba shiruru dakji kongshia liasü, aser tanga ana jagi temang nembanga liasü.

²⁴ Kodang parnok ao, parnok tashikang olaji tzü tulu ayimba ola ama, mesüra ajak Takoksang ola ama, temeranger telok ola, rongrongba ola ama ni angashi; parnok kodang noktak, parnoki pei tashikangtem aludaktsü.

²⁵Parnok kolak nung aliba anüng sadakba temalen ola ka liasü. Aser kodang parnok noktak, parnoki pei tashi tashikangtem aludaktsü.

²⁶ Parnok kolak manung aliba anüng sadakba temalen, tereprangtsü sapfir lung ama, chuba menden ka liasü; aser lung ana, chuba menden mesüka aliba manungji, nisung ka mesüka iba manung liasü.

²⁷ Pa tereprangtsü teperem nungi temalen ni sentsüprang langka prangpranga aliba merang amai ka angu; pa tereprangtsü teperem teküboklen mi mesüka,

²⁸tzünglu aruba anogo nung mepet nung tongnüsen amai aji meketa sentsüprang angu. Ibai KIBUBA sentsüwangshi mesükba tereprangtsü liasü, aser kodang aji ni angu, ni kü tejak rembanga lao, aser kati jembiba ola ni angashi.