Read njo EZEKIEL 10 Bible Online

EZEKIEL 10 - njo bible

EZEKIEL 10

¹Idangji ni reprang, aser cherubim temalen aliba anüng sadakba nung temalen sapfir lung ka ali amato tereprangtsü chuba menden mesükba ka adok.

² Aser kümpa sü abenba nisung dang pai jembia ashi, “Cherubim kübok talongtsü tetsüng alungdak jagi iang, aser cherubim tsüngda nungi mijang tait agi ne ket anatsü süngdakjang, aser itemji yimti nung prokshiang.” Aser ni ngua pai ai.

³Tang Cherubim ki tajichilen nisungji aidang noktak; aser mepet agi telungba taktangji asüng.

⁴Aser KIBUBA sentsüwangshi cherub nungi atu, aser ki tailen madak noktak; aser kiji mepet agi asüng, aser taktangji KIBUBA sentsüwangshi sentsüprang agi sünga liasü.

⁵Tsüngrem Ajak Takoksangi jembidang ola adokba ama, cherubim tashikang olaji taktang temaba nungia angashia liasü.

⁶Kodang pai kümpa sü abenba nisung dang ashi, “Longa aliba talongtsü tetsüng tsüngda nungi, cherubim nungi mi agiang,” pa ai aser talongtsü tetsüng madang noktak.

⁷Aser cherubi pei teka cherubim tsüngda nungi mi alileni songtok, aser aji bena aru, aser kümpa sü abenba nisung ket nung aji yutsü, pai aji agi aser oadok.

⁸Aser cherubim parnok tashikang kübok nisung teka mesüka liasü.

⁹ Ni reprang, aser cherubim anasa talongtsü tetsüng pezü, talongtsü tetsüng ka cherub ka anasa, aser talongtsü tetsüng tanga ka cherub tanga ka anasa liasü; aser talongtsü tetsüng tereprangtsü beryl sentsü ama liasü.

¹⁰Aser talongtsü tetsüng ka, ka nung ali amato, item pezüprong tereprangtsü mesüktepa liasü.

¹¹Kodang parnok ao, parnok pezü tsütsüleni ao, saka tekolak leni repranglen jagi parnok anitaka ao; parnok aodang parnoki memeyip.

¹²Parnok temang rangben, parnok terongdong, parnok teka, aser parnok tashikang, aser talongtsü tetsüng, ajaklen meketa, oda talongtsü tetsüng pezü dena, tenük agi sünga liasü.

¹³Talongtsü tetsüng indangji, ni angashia parnok dang lunga aoba talongtsü tetsüngtem ta aja.

¹⁴ Aser kaka shia tejak pezüzü liasü; mezüngbuba tejakji cherub tejak liasü, aser tanabuba tejakji nisung tejak liasü, aser tasembuba tejakji molusongzü tejak, aser pezübuba tejakji mongzü tejak liasü,

¹⁵aser cherubimji yimketa atu: Kebar ayong anasa taküm shiruru ni angubaji ibai lir.

¹⁶Kodang cherubim ao, talongtsü tetsüngtem parnok den ao; aser kodang alima nungi yimesotsü parnok tashikang ajungket, talongtsü tetsüngtema parnok tsütsülen nungi memeyip.

¹⁷Kodang parnok noktaka ali itema noktaka ali; aser kodang parnok yimeso, itemjia parnok den yimeso, kechiyong taküm aliba shiruruji parnok dak liasü.

¹⁸KIBUBA sentsüwangshi ki kiküm tailen nungi ao, aser cherubim manung noktak.

¹⁹Cherubimi parnok tashikang ajungket, aser ni ngua alima nungi yimeso, aser parnok aodang parnok anasa talongtsü tetsüngtema ao; aser parnok KIBUBAr ki anüdoklen kikümbang nung noktak; aser Israel Tsüngrem sentsüwangshi parnok temalen liasü.

²⁰Kebar ayong anasa Israel Tsüngrem kübok ni anguba taküm shiruruji ibai lir; aser parnok cherubim ta ni metet.

²¹Kaka shia tejak pezüzü aser tashikang pezüzü liasü; aser nisung teka mesükba parnok tashikang kübok liasü.

²²Parnok tejak mesükbaji, ni Kebar ayong nung anguba tejaklen mesüka liasü; parnok shiaji tejakleni indang indanga ao.