Read njo EZEKIEL 11 Bible Online

EZEKIEL 11 - njo bible

EZEKIEL 11

¹Idangji tanelai ni ajungket, aser anüdoklen shia aliba KIBUBAr anüdoklen kikümbangi ni anir aru, aser kikümbang kishi züngdang nisung metsür pungu ni angu; parnok rongnung Azzar jabaso Yaazania, Benaia jabaso Pelatia, nübur tongtipurtem ni angu.

²Pai kü dang ashi, “Nisung chir, tamajung tasa asartem, aser iba yimti nung tamajung shisa agütsürji item nisung lir.”

³Parnoki ashir, “Ki yanglutsü ya mapang shitak masü no? Iba yimti ya chipo lir aser asenok shi lir.

⁴Anungji parnok anema shin jembiang, Oh nisung chir shinang.”

⁵KIBUBA tanela kü madaki alu, aser pai kü dang ashi, “Jembiang, Yamai KIBUBAi ashir, yamai nenoki shiogo, Oh Israel kidong; kechiyong nenok mulungjangi aitba mapaji ni metet.

⁶Nenoki iba yimti nung jenti tepsetogo aser tetepsetba agi yimdong süngdaktsüogo.

⁷Anungji KIBUBA Tsüngremi yamai ashir, Nenok tetepsetbatem shirnok nenoki iba nung yuja lir, parnok shi lir, aser iba chipo lir; saka nenokbo ni iba rongnungi agitettsü.

⁸Nenoki nok tsübu; aser ni nenok madak bener arutsü ta KIBUBA Tsüngremi ashir.

⁹Aser ni nenok iba rongnungi agitettsü, aser bendanger ket nung bendanga agütsütsü, aser nenok rongnung o bendangtsü.

¹⁰Nenok nok agi laotsü; ni nenok Israel litsü ajak nung o bendangtsü aser nenoki ni KIBUBA ta metettsü.

¹¹Iba yimti nenok asoshi po masütsü, mesüra iba telunglen nenok shi masütsü, ni nenok Israel litsü nung o bendangtsü,

¹²Nenoki ni KIBUBA ta metettsü, kechiyong nenoki kü tzüzüng-ozüng nung mejaja, mesüra kü o bendang mebenshi, saka nenok meketa aliba kintemi inyakba den putepa benshi.”

¹³Kodang ni ainkar o jembi, Benaia jabaso Pelatia süadok. Idangji ni kü tejak rembanga mechiok aser ola tulu agi ayimtena ashi, “Aia KIBUBA Tsüngrem! nai Israel tanüngba ajonga tatem kümdaktsütsü no?”

¹⁴KIBUBA O kü dangi shia aru,

¹⁵“Nisung chir, ne adianutem, oda ne adianutem, ne sosem nisungtem, aser Israel kidong ajak indang Yirusalem nung alirtemi ashir, ‘Parnok KIBUBA nungi talang nung lir, asenok nem alimaji agitsü agüja lir.’

¹⁶Anungji shiang, yamai KIBUBA Tsüngremi ashir, “Ni parnok talangi kin rongnung yokadokaka, aser ni parnok alima nung prokshidakjakasa, parnok oa aliba lima nung parnok madang ni kenpiga parnok asoshi temeshidak alitsü.

¹⁷Anungji shiang, Yamai KIBUBA Tsüngremi ashir, “Nisungtem nungi ni parnok anitentsü, aser kong parnok prokshia ali parnok sentendaktsütsü, aser ni parnok nem Israel lima agütsütsü.

¹⁸Parnok kodang ajagi meyipa arudir, iba nisungi tamagitsü oset ajak, aser tesempatsü ajak idak nungjagi bener oadoktsü.

¹⁹ Ni parnok nem temulungjang ka agütsütsü, aser ni parnok dak tanela tasen enoktsütsü. Ni parnok nungi lung temulungjangji endoktsütsü aser shi mulungjang agütsütsü.

²⁰Anungji parnoki kü tzüzüng-ozüng nung jajatsü aser kü yimsü-ozüng ayutsü, aser itemji benshitsü asoshi, idangji parnok kü nübur asütsü, aser ni parnok Tsüngrem asütsü.

²¹Saka shirnoki parnok mulungjang maginüba mapatem aser tesempatsütem mulungjang sülen jajadaktsür, ni parnok mapatem parnok kolak manung bener arutsütsü” ta KIBUBA Tsüngremi ashir.

²² Idangji cherubimi parnok tashikang ajungket, aser talongtsü tetsüngtemji anasatepa ali; aser Israel Tsüngrem sentsüwangshi parnok temalen liasü.

²³KIBUBA sentsüwangshi yimti nungi atu, aser yimti anüdoklen tsütsü aliba tenem manung noktak.

²⁴Aser tanelai ni ajungket, aser Tsüngrem tanelai mangdang nung tepuokertem dangi Kaldiai ni anir ait. Anungji ni anguba mangdangji ni nungi tuadok.

²⁵Idangji KIBUBAi kü dang sayuba ajak ni tepuokertem dang ashi.