Read njo EZEKIEL 12 Bible Online

EZEKIEL 12 - njo bible

EZEKIEL 12

¹KIBUBA O ano kü dangi aru,

²“Nisung chir, tashi mangaba kidong, shirnok tangutsü tenük lir saka mangur, tangashitsü tenarong lir saka mangashir, parnok rongnung na alir; kechiyong parnok tashi mangaba kidong lir.

³Aji asünung, Oh nisung chir, tepuoker khu ka renemang, aser parnoki ngua anüngdang pila-a oang; tesem ka nungi tesem kati parnok nükdang na pur aoba ama oang. Ashiko parnok tashi mangaba kidong saka, parnoki angatettsü kar.

⁴Aser nai ne khu anüngdang parnoki ngua tepuokdaki aotsü asoshi bener adokang; aser nai nikongtsütsü parnoki ngua nisungtem tepuokdaki aoba ama, ne sasa oang.

⁵Parnok tenük agi ngua nai jara nung tapok tupokang, aser aji agi tuguang.

⁶Ne khu ne tapubang nung parnoki ngua benlokang, aser aji ammang nung bener tuguang; nai ali mangutsüsa ne tejak nembangang, kechiyong Israel kidong madang ni na temaitsü ka kümdaktsür.”

⁷Aser kü dang melaba ama ni inyak; pur aotsü ama ni kü khu anüngdang bener adok, aser nikongtsütsü ni kü ket agi jara ateta atu; aser ni aji ammang nung bener adok, aser parnoki ngua kü tapubang nung ni aji aben.

⁸Anepdang KIBUBA O kü dangi aru,

⁹“Nisung chir, tashi mangaba kidong, Israel kidongi ne dang, ‘Na kechi inyaker’ ta meshika ma?

¹⁰Parnok dang shiang, yamai KIBUBA Tsüngremi ashir, iba temaitsü Yirusalem nung tamarener aser iba nung alir Israel kidong indang lir.

¹¹Ni nenok asoshi temaitsü ta shiang, ni inyakba ama parnok dang aji inyaktsü; parnok bendang limai tepuokdaki aitsü.

¹²Aser parnok rongnung aliba tamareneri pei khu tapubang nung abentsü, aser ammang nung aotsü, pai jara ateta tupoktsü aser aji ajanga tugutsü; pei tenük agi ali mangutsü asoshi pai pei tejak nembangtsü.

¹³ Ni kü sang pa dak amungloktsütsü, aser kü sang nung pa aputsü; aser Kaldi nunger lima Babiloni ni pa anir arutsü, aji saka pai aji mangutsü, aser angji pa asütsü.

¹⁴Aser pa yaritsü pa meketa alir ajak, aser par telok ajak ni mopung manung ajakleni prokshidaktsütsü; aser ni parnok nok amer arishitsü.

¹⁵Kodang ni kin rongnung parnok pakshidaktsüdir, aser linüktem nung prokshidaktsüdir, parnoki ni KIBUBA ta metettsü.

¹⁶Saka parnok kolenisa odir kin rongnung parnoki parnok tesempatsü mapatem tai nangzüktsü asoshi nok nungi, ayawara nungi, aser wara nungi ni parnok ishika kümzüktsü aser parnoki ni KIBUBA ta metettsü.”

¹⁷Ano KIBUBA O kü dangi aru,

¹⁸“Nisung chir, ne amtsük chiang, ne tzü atentena aser kümdanga jemang;

¹⁹aser linük nung nübur dang shiang, Yirusalem nung alirtem aser Israel lima indang KIBUBA Tsüngremi yamai ashir, parnoki pei amtsük tsübuseta achitsü, aser parnok tzü temulung makai ajemtsü; kechiyong linük nung alir ajak teka yitepba agi linük nung akaba ajak rakzüktsü.

²⁰Aser nisung aliba yimtitem sendoka yutsütsü, aser linük azüngmeyaka akümtsü aser nenoki ni KIBUBA ta metettsü.”

²¹KIBUBA O kü dangi aru,

²²“Nisung chir, Israel linük nung nenok apijemtsü o ya kechi, ‘Anogotem atsülanger, aser mangdang shia kecha mataloker?’

²³Aji asünung parnok dang shiang, yamai KIBUBA Tsüngremi ashir, iba apijemtsü o ni anendaktsütsü, aser joko parnoki Israel rongnung apijemtsü ama aji mamshitsü; saka parnok dang shiang, Anogo tongogo, mangdang shia ataloktsü.

²⁴Kechiyong joko Israel kidong rongnung amajok mangdang aser mesüzüka purapuji ainkar o jembiba malitsü.

²⁵Kechiyong ni KIBUBA lir, ni jembitsü, aser ni kazükba oji inyaktsü; aji joko menua malitsü, kechiyong nenok anogo nung, Oh tashi mangaba kidong, ni o jembitsü, aser aji inyaktsü” ta KIBUBA Tsüngremi ashir.

²⁶Ano KIBUBA O kü dangi aru,

²⁷“Nisung chir, ajiang, Israel kidongtem, parnoki ashir, pai anguba mangdangji tarutsü anogo aika asoshi lir, aser pai mapang talangka indang shina jembir,

²⁸anungji parnok dang shiang, yamai KIBUBA Tsüngremi shir, kü otem joko kata menua malitsü, saka ni jembiba o ataloktsü” ta KIBUBA Tsüngremi ashir.