Read njo EZEKIEL 13 Bible Online

EZEKIEL 13 - njo bible

EZEKIEL 13

¹KIBUBA O kü dangi aru,

²“Nisung chir, Israel ainkartem anema shina jembiang, shirnoki pei mulungjang nungi ainker o jembir parnok dang shiang, Nenoki KIBUBA o angang!

³Yamai KIBUBA Tsüngremi ashir, Tamashi ainkartem shirnoki kecha mungui pei shisatsü agi ainkartem o jembir parnok aiatai!

⁴Oh Israel, ne ainkartem, azüngmeyakdak aliba shirongtem mesüka lir.

⁵Nenoki KIBUBA anogo nung tongbang nung noktaktsü asoshi tapok apadaki matu, mesüra Israel kidong asoshi atsü matsüdang.

⁶Parnoki amajok aser tiyazü purapujiogo; KIBUBAi parnok meyok nung, KIBUBAi ashir, ta jembir; aser parnoki aji ataloktsü ta nisungtem nem imladaktsü.

⁷Ni mejembi nung nenokibo, KIBUBAi ashir, ta nenoki ashiba ya nenoki anguba, amajok mangdang ka aser nenoki jembiba tiyazü ain purapuji ka masü no?”

⁸Anungji KIBUBA Tsüngremi yamai ashir, “Nenoki amajok jembi aser tiyazü angu nung, ajiang, ni nenok anema lir” ta KIBUBA Tsüngremi ashir.

⁹Aser amajok mangdang anguba ainkertem aser tiyazü ain purapuji anema teka alitsü; parnok kü nübur alidak talidak makatsü, mesüra Israel kidong tezüluba kaket nung parnok mezüluoktsü, mesüra Israel limai parnok maitsü; nenoki ni KIBUBA Tsüngrem ta metettsü.

¹⁰ Kechiaser parnoki, tesünep lir, ta shia kü nüburtem mesüzük, saka tesünep malir; aser kodang kari atsüki jara yangludir, ajiang, parnoki aji shinü agi mezübanger.

¹¹Shirnoki shinü agi aji mezübangtsür parnok dang aji laotsü ta shiang. Tzünglupu moshia ayimba alitsü, aser rülong tulu tsüktsü, aser yipru mopungi aji shisatsütsü.

¹²Kodang jaraji laodir, nenoki shinü mezübaji kong ali, ta nenok dang mashitsü no?

¹³Anungji yamai KIBUBA Tsüngremi ashir, “Ni oda ain adoka yipru mopung adokdaktsütsü; aser ni ain adoka tzünglupu moshia ayimba, aser rülong tulu agi aji samatsütsü.

¹⁴Anungji nenoki shinü agi mezübangba jaraji ni bensatsü, aser ali nung ataloka toktsütsü, anungji kimung tazüngdakji moa nung alitsü; kodang aji laodir iba rongnung nenok samatsü, aser nenoki ni KIBUBA ta metettsü.

¹⁵Yamaji atsüki jara aser shinü mezüba nisungtem madak kü ain adokba inyaktsü, aser ni nenok dang ashitsü. Joko atsüki jara, mesüra iba nung mezürtem melika,

¹⁶oda Yirusalem asoshi shinba ainkertem, aser la atema tesünep mali sürnung tesünep mangdang angur, saka tesünep maliasü, ta KIBUBA Tsüngremi ashir.”

¹⁷“Na, nisung chir, ne nübur jalatem, shirnoki pei tebilemba agi shin o jembir, parnok anema ne tejak meyipang, aser parnok anema o shinang.”

¹⁸Yamai KIBUBA Tsüngremi ashir, “Tekanük ajak nung tenaidangba sü arülokba, aser nisung shia aso yari tekolak asoshi temeibangba sü yanglua tanela bushiba, tetsürtem asoshi aiatai! Nenok tajangzük asoshi tangar sota yua nenoki kü nüburtem tanela bushidi ma?

¹⁹Tiyazü o angaba kü nübur dang tiyazü jembia, barley tsük tekabu ka sünga asoshi aser amtsük tera asoshi, mesüi alitsüba taküm tepsettsü, aser taküm malitsüba nisungtem kümzüktsü asoshi nenoki ni aser kü nüburtem menentsüogo.”

²⁰Aji asünung yamai KIBUBA Tsüngremi ashir, “Nenoki tanela bushiba nenok tenailokba sü anema lir, aser ni itemji parnok tepen nungi shisatsütsü aser nenoki bushiba tanelatemji ni ozü ama chioktsü.

²¹Yamaji ni nenok temeibangba sü shitoktsütsü, aser nenok ket nungi kü nübur kümzüktsü, aser parnok joko marishidaktsütsü asoshi nenoki ni KIBUBA ta metettsü.

²²Kechiaser ni ochishir tasü meitdaktsüi malidang nenok yazüba agi nenoki pa tasü maitdaktsü, aser tamajung nungang, pa tamajung lenmang nungi memeyipdaktsüi aser taküm mekümzüki alitsüsa tasü itdaktsü,

²³anungji nenoki joko amajok mangdang mesüra tiyazü purapuji ain jembiba malitsü; aser nenok ket nungi kü nüburtem ni kümzüktsü. Idangji nenoki ni KIBUBA lir ta metettsü.”