Read njo EZEKIEL 14 Bible Online

EZEKIEL 14 - njo bible

EZEKIEL 14

¹Idangji Israel tambur kar kü dangi aru, aser kü madang amen.

²Aser KIBUBA O kü dangi aru;

³“Nisung chir, item nisung parnok mulung nung süngyanglutem yua lir, aser parnok jakdang parnok temenen menaba temetsüdaktsü lung yua lir, parnoki kü den jembiteptsü kechi tim ali?

⁴Aji asünung parnok dang jembiang, aser parnok dang shiang,” Yamai KIBUBA Tsüngremi ashir, “Israel kidong nung nisung shia shibai pei süngyanglutem pei mulungjangi bener aitdaktsür, aser pei jakdang pei tai menaba temetsüdaktsü lung yudaktsür, aser ainkar dangi arur, ni KIBUBAi pa dang pa süngyanglu yongsük yari ni langzütsü,

⁵oda ni Israel kidong parnok pei mapa tasa nung aputsü, kechiaser parnok ajak parnok süngyanglu ajanga kü dang nungi pila-a ogo.”

⁶Anungji Israel kidong dang shiang, Yamai KIBUBA Tsüngremi ashir, “Temulung meyipang, aser nenok sasa nenok süngyanglu nungi meyipang, aser tesempatsü ajak nungi nenok tejak meyipang.

⁷Kechiyong Israel kidong nung nisung shia, mesüra bendanger Israel den semloka alir shia, shibai pei sasa kü dang nungi pila-a aor aser pa süngyanglutem pei mulungjangi bener air, aser pa tai menaba temetsüdaktsü lung pa jakdang ayur, aser ainkar dangi pa ajanga kü den jembitsü asoshi aor, ni KIBUBAi pa dang kü sasa langzütsü;

⁸aser iba nisung anema ni kü tejak meyiptsü, aser pa temaitsü aser tansütsü o ka kümdaktsütsü, aser kü nübur rongnungi pa leptoktsütsü; aser nenoki ni KIBUBA ta metettsü.”

⁹“Aser ainkarji külakokja o jembidaktsüra, ni KIBUBAi iba ainkarji külakoktsüogo, aser ni pa madak kü teka songtoktsü, aser kü nübur Israel nungi pa ni samatsütsü.

¹⁰Parnoki pei tai menaba temerenshi angutsü; ainkar tai menabaji pa bushiba nisung tai amaji alitsü;

¹¹oda Israel kidong joko kü dak nungi pila-a maotsü, mesüra parnok ozüng raksaba ajak agi joko parnok sasa memenentsü, saka oda parnok kü nüburtem asütsü, aser ni par Tsüngrem asütsü” ta KIBUBA Tsüngremi ashir.

¹²KIBUBA O kü dangi aru,

¹³“Nisung chir, linük kati külakkübonga inyakba agi temenen menara, aser iba madak kü teka songtokra, aser iba nung chiyungtsü aliba raksaja, aser iba madak ayawara yoka, aser iba nungi nisung aser shiruru leptoktsüra,

¹⁴Item nisung asem Noa, Daniel, aser Yob iba nung liaka parnok pei temeshiba agi parnok taküm dang kümzüktsü” ta KIBUBA Tsüngremi ashir.

¹⁵“Mesüra ni arem shiruru linük ajanga odaktsüra, aser parnoki aji raksa-a azüngmeyaka kümdaktsüra, oda shiruru aliba yong nisung shinga ajanga muotetra,

¹⁶oda item nisung asem iba nung liaka, ni züngya züngkua shidi, parnoki jabasotem mesüra jalatem mekümzüktsü, parnok dang kümzüktsü aser linükjibo azüngmeyaka toktsütsü.

¹⁷Mesüra iba madak ni nok ka bena arura, aser nokji linük ajanga odakjang ta shira, aser nisung aser shiruru na tepsetra;

¹⁸item nisung asem yangji liaka, ni züngya züngkua shidi, parnoki jabasotem mesüra jalatem mekümzüktsü, saka parnok dang kümzüktsü” ta KIBUBA Tsüngremi ashir.

¹⁹“Mesüra ni tashitak wara ka linüki yokra, aser linük nungi nisung aser shiruru samatsütsü ni kü ain adokba iba manung azü tokshiba nung tokloktsüra,

²⁰Noa, Daniel aser Yob iba nung liaka, ni züngya züngkua shidi, parnoki jabaso mesüra jala mekümzüktsü” ta KIBUBA Tsüngremi ashir. “Parnok pei temeshiba agi parnok taküm dang kümzüktsü.”

²¹ Kechiyong KIBUBAi yamai ashir, “Ni kodang ni kü obendangba tulu pezü, nok, ayawara, tesashi shiruru, aser tashitak wara Yirusalem madak iba nungi nisung aser shiruru samatsütsü yokdir, koda jenti alitsü.”

²²Aji saka ajiang, bener aotsüba tanüngba jabasotem aser jalatem anaprong toktsütsü ajiang, parnok nenok dangi arutsü, aser nenoki parnok mapa aser parnok inyakba angutsü, aser Yirusalem madak ni tamajung bena arutsüba ajak atema nenok sünepdaktsütsü.

²³Kodang nenoki parnok mapa aser parnoki inyakba ngudir, parnoki nenok süneptsütsü; aser ni iba nung inyakba ajak kecha mesüi dangbo meinyak ta nenoki metettsü” ta KIBUBA Tsüngremi ashir.