Read njo EZEKIEL 16 Bible Online

EZEKIEL 16 - njo bible

EZEKIEL 16

²“Nisung chir, Yirusalem nung la tesempatsütem metetdakjang,

³aser shiang, yamai KIBUBA Tsüngremi Yirusalem dang ashir, na tapokdak tera aser na kinüwa mapang Kanan lima lir; aser nebu Amor nunger aser netsü Het nunger liasü.

⁴Aser na kinüwa mapang indang, na asoba anogo nung ne tebela merangtoktsü, mesüra na tzü nung meshidok, mesüra ne dak metsü kecha memezütsü, mesüra kinü sü agi kecha memeibangtsü.

⁵Na asoshi aria bilemtsüba agi shingaia itemi kar danga inyaktsü tenük agi ne dak aochia mereprang; saka na moapu nung endoktsü liasü, iba yongji na asoba anogo nung ne taküm sempa-a liasü.”

⁶“Kodang ni na anasa süia aru, aser ne zü nung mezüsa-a angu, ni ne dang ashi, Taküm liang,

⁷aser moapu nung süngdonglidong ama inang. Aser na ain aser tar langa, aser na tobur junga azüa intet; ne mama adok, aser ne ku adok, aji saka na mangsa aser temang tesa liasü.”

⁸“Tang ni na anasa süidang, aser ne dak reprangdang, ajiang, ne mapangji meimtsüba mapang liasü; aser ni kü sü ne dak amungloktsü, aser ne mangsa nembangtsü; hau, ni na ani asüng, aser ne den tezüngzüktepba yanglu, aser na kü meyong aküm, ta KIBUBA Tsüngremi ashir.

⁹Idangji ni na tzü agi shitoktsü, hau, ni na jungjunga ne zü na nungi shitoktsü, aser ni na totzü agi mezütsü.

¹⁰Ano ni temechiba aketba sobutsü abendaktsü, aser shiküp agi tsüngsem semtsü, aser ni na kümpa sü agi nangri kangtsü, aser lota sü agi nembangtsü.

¹¹Ni na sobutsü agi azüa sobutsü, aser ne teka nung ni kisen sepoktsü, aser ne tekong nung azük azükdaktsü.

¹²Ne teni nung ni küri enoktsü, aser tenarong nung naro anudaktsü, aser ne kolak nung tobur tajung korang semtsü.

¹³Yamaji na hon aser taribi agi azüa sobutsü, aser ne sü noksa enoka atakba kümpa sü aser lota sü liasü; nai amzü tanük, ninang mojitzü, aser totzü ajem, aser na onsara tobur junga liasü, aser na chuba menden temsüa aküm.

¹⁴Aser ne nüngsang tobur ajungba indang kin rongnung meteta ao; kechiyong ni ne dak akhüm tulu yutsüba agi aji tabensa aküm ta KIBUBA Tsüngremi ashi.”

¹⁵“Saka nai ne tobur ajung nung temulung alem, aser ne nüngsang akaba agi nai jabujari mapa inyaka süisüponger shia den nai jabujari asü.

¹⁶Nai ne süoshi kar agizük, aser na pei asoshi sentsü balala agi mera ketdakja temaba menden yanglu, aser item madak jabujari inyak; ibala ama kodanga masütsüla mesüra yamaji mataloktsüla.

¹⁷Ano nai kü hon aser kü taribi sentilung koba ni ne nem agütsü, aji nai agi, aser na asoshi nisung noksa yanglu, aser item den nüktapangta benshi.

¹⁸Nai ne noksa aketba sü agi itemji nembang, aser item jakdang kü totzü aser kü liangmesen yutsü.

¹⁹Ano ni ne nem agütsüba amtsük, amzü tanük, totzü aser ninang mojitzü koba agi ni na mesü, nai oda ajia item madang teronem tanang asoshi yutsü ta KIBUBA Tsüngremi ashir.

²⁰Nenoki ni asoshi asoba nenok jabaso aser jalatem nenoki agi, aser parnok tenla amato itemjagi meyoktsü asoshi agütsü. Nenoki nüktapangtabaji danga tali masü no?

²¹Ano nenoki kü chirtem tepseta parnok nem tarongba tenla asoshi tenlatsüsa agütsü no?

²²Aser ne tesempatsü jabujari mapa ajak nung nai ne lanuwa sü maben aser mangsa, ne zü nung mezüshia aliba anogotem nai mebilemtet.”

²³“Nenok tamajung ajak sülen nenok asoshi aiatai, aiatai! ta KIBUBAi ashir,

²⁴nenoki pei asoshi temeshidak yanglu, aser yimdong shia nung temaba menden nenok asoshi yanglu.

²⁵Yimdong tezülen shia nung pei talidak yanglu, aser yangji ne tobur ajungba tesempatsü kümdaktsü, aser süisüponger shia den nai jabujari tali kümdaktsü.

²⁶Ano nai ne kiyonger, shi nung jangraba Ijip nunger den nüktapangta benshi; aser ni ain adokdaktsütsü ne jabujari tali kümdaktsü.

²⁷Anungji ajiang, ni ne madak kü teka songtok aser na teti chiyungtsü ajema kümdaktsü, aser na sempartem, Filistia nunger jalatem shirnoki ne jabujari mapa indang akseta lir, parnok nem bendanga agütsüogo.

²⁸Ano nai Asiria nunger den nüktapangta, kechiaser na jangra metemi liasü; hau, nai parnok den nüktapangta benshi, aser ano na tipmetemi liasü,

²⁹Nai Kaldi nunger shishilembar den jabujari jenti inyak; aji saka iba jagi na tipmatem.”

³⁰“Ambangyim jabujari tetsür mapa, item mapa ajak nai ngua, koda ne mulungjang tashi mait lir, ta KIBUBA Tsüngremi ashir.

³¹Iba nung nai ne tenladak lenmang lenjem shia nung yanglur, aser yimdong shia ne talidak yanglur; nai taa magi nungji na nüktapangtar ka ama masü.

³²Nüktapangtaba kibutsü! Pei kinungpu melena tangar agiba nenok lir!

³³Teburi nüktapangtatsür ajak nem sempet agütsür, saka nai ne sempet na meimer ajak nem, oda ajaklen nungi ne jabujari asoshi ne dangi arudaktsütsü agütsür aser parnok nem süpokrem agütsür.

³⁴Na tangar nüktapangta tetsürtem dang nungi balaka; tebur shingaia ne dang memepishi, aser tebur shingaia ne nem taa magütsü, iba yagi tangar nüktapangtar dang nungi na balaka kümdaktsü.”

³⁵Anungji, Oh nüktapangtar, KIBUBA O angang.

³⁶Yamai KIBUBA Tsüngremi ashir, “Na ne memerükba temai adokdaktsü, aser na meimertem den nüktapangta ajanga na mangsa aliba temai adokdaktsü; aser ne tesempatsü süngyanglu ajak asoshi aser ne chirtem azü tokshiba shirnok nai parnok nem agütsü.

³⁷Anungji, ajiang, ne meimer ajak shir den nai jangratem angur, aser nai meima aliba parnok ajak, aser nai sempaba parnok ajak dena ni anitentsü; aser parnoki na mangsa aliba ngutettsüsa, parnok dang na mangsa aliba ngudaktsütsü.

³⁸Nüktapangtar aser azü tokshiba tetsürtem obendangba ama ni na o bendangtsü; aser ni ne madak ain adokba aser tenükmiba zü bener arutsü.

³⁹Ano ni parnok ket nung na agütsütsü, aser parnoki ne tenladak loksatsütsü aser ne talidak raksatsütsü, aser na nungi ne süoshi parnoki endoktsütsü aser ne tobur tajung senti lung agitsü; aser parnoki na mangsa toktsütsü.

⁴⁰Ano parnoki na anema telok ka anitentsü, aser lung agi parnoki ne dak aontsü, aser parnok nok agi anüka lepsatsütsü.

⁴¹Parnoki ne ki mi agi rongtoktsütsü, aser tetsür aika tsüngdang ne madak o bendang agütsütsü, aser na nüktapangta mapa nungi ni na anendaktsütsü, aser nai joko taa magütsütsü.

⁴²Anungji ni ne madak kü ain adokba sünemtsü, aser kü tenükmiba na nungi pilatsü, aser ni ajem ajema alitsü, aser joko ni ain madoki alitsü.

⁴³Kechiaser nai ne lanuwa anogotem mebilemtet, saka item mapa ajak agi ni jashidaktsü; anungji ajiang, ano nia ne kolak manung ne mapa benloktsütsü, ta KIBUBA Tsüngremi ashir; kechiaser tanga tesempatsü mapa dak alaka nai jabujari benshi.”

⁴⁴“Ajiang, apijemtsü shin amshir shiai na anema iba apijemtsü shin amshitsü, ‘Tetsü koma, jala-a yamaji.’

⁴⁵Tetsü shibai la kinungpu aser lar chirtem sempar, lar jalaji na lir; aser teyi nunger shirnoki parnok kinungputem aser parnok chirtem sempar, parnok tenuji na lir. Netsü Het nunger, aser nebu Amor nunger lir.

⁴⁶Neyi Samaria lir, oda ne teka tabelen alir, la aser lar jalatem, aser nenuji, ne teka tajichi alilaji, Sodom aser lar jalatem lir.

⁴⁷Saka na parnok lenmang nung jajatsü mesüra parnok tesempatsü mapa inyaktsü na temulung mesüi liasü, saka na asoshi aji onsara mapa tila ka amato, ne mapa ajak nung parnok dang nungi na tamajungba liasü.

⁴⁸Ni taküm ali nungji ta KIBUBAi ashir, nai aser ne jalatemi inyakba amaibo neyi Sodom aser lar jalatemia meinyak.

⁴⁹Ajiang, ibai neyi Sodom tai menaba liasü; asüküm, talubosa azükarua sadoksadoka la aser lar jalatem liasü; saka lai sensaker aser maka maiter meyari.

⁵⁰Parnok asüküma aküm aser kü madang tesempatsü inyak; anungji ni aji angudang parnok ni sendoka endok.

⁵¹Mesüra ne temenen tesadanga Samariai meinyak; saka nai parnok dang nungi tesempatsü mapa tali inyak, aser nai inyakba tesempatsü mapa ajak agi nenu nungertem temeshi ama lir.

⁵²Nai nenu asoshi obendang agütsü nungji, ano na pei maksü abentsü; ne temenen ajanga nai parnok dang nungi tesempatsü mapa tali inyakogo, ne dang nungi parnok temeshiba lir; hau, nai nenu metentsü nungji, na-a ratamatatsü aser ne maksü abentsü.

⁵³“Saka ni parnok tia yanglushitsütsü, Sodom aser lar jalatem tia, aser Samaria aser lar jalatem tia, aser par rongnung ne tia yanglushitsütsü.

⁵⁴Oda ni ain adokdaktsütsü atema nai inyakba ajak asoshi na a-aka aser maksütsü ta bilemtsü ni ne tia parnok den yanglushitsütsü.

⁵⁵Idangji nenu, Sodom aser lar jalatem den, parnok akhi tiai meyiptsü aser na aser ner jalatem nenok akhi tiai meyiptsü.

⁵⁶Kechiyong na asükümba anogo nung nenu Sodom ne bang agi metetshi;

⁵⁷na majungba temai madokdang, Siria jalatem, aser la meketa alir ajak, Filistia nunger jalatem shirnoki na meketa atalatsür parnok arütsüba mapang mesüka na lir.

⁵⁸Na ne jabujari aser tesempatsü mapatem nungi adokba benloka lir, ta KIBUBAi ashir.

⁵⁹“Kechiyong KIBUBA Tsüngremi yamai ashir, ni oda nai inyakba ama, koba agi tezüngzüktepba raksaba agi azüngashitepba mezüngmeshi, ni ne dang benshitsü.

⁶⁰Aji saka na lanuwa anogo nung ne den kü tezüngzüktepba ni bilemtettsü, aser ni ne den tatem makaba tezüngzüktepba yanglutsü.

⁶¹Idangjiang nai ne mapatem bilemtettsü, aser ne aianutem, neyi aser nenu, kodang agizükdir akseta alitsü, aser parnok ne nem jalatem asütsü agütsütsü, saka ne tezüngzüktepba agi masü.

⁶²Aser kü tezüngzüktepba ni ne den yanglutsü; aser ni KIBUBA ta nai metettsü.

⁶³Oda ni kodang nai inyakba ajak ne dang tai tokdir, ne maksü agi nai bilemtettsüsa, aser bangkaseta alitsü ta KIBUBA Tsüngremi ashir.”