Read njo EZEKIEL 17 Bible Online

EZEKIEL 17 - njo bible

EZEKIEL 17

¹KIBUBA O kü dangi aru,

²Nisung chir, o ka agüjang, aser o-entepba ka Israel kidong dang jembiang

³aser shiang. Yamai KIBUBA Tsüngremi ashir; Mongzü tulu ka tashikang tulu aser tezüng talang, tezüng agi sünger, sentsü balala keter, Lebanoni aru, aser cedar süngdong talakji bener ao,

⁴pai süngdong talak lanuji jentoktsü, aser aji shishilempaba linük kati bener ao, aser pai aji shidi abenertem yimti ka nung tema toktsü.

⁵Pai ano linük nung aliba metsü aben, aser aji ali tajung nung azüng; pai aji tzü jenti alidak zünga toktsü, pai aji willow süngdong ama znga toktsü.

⁶Aser aji mei, aser mesangshia aoba tsükmenatzü züji tatsü liasü, koba kongsangtemi pa tsütsü shia liasü, aser iba teratem pa kübok liasü; anungji aji tsükmenatzü zü aküm, aser süngsangtem adokdaktsü, aser kongsang tilatem adokdaktsü.

⁷Ano mongzü tanga tulu ka tashikang tulu aser tezüng jenti keter liasü; aser ajiang, iba tsükmenatzü zü pa tsütsü pa tera züa oa liasü, aser pa tema alidak nungi pai iba dak tzü aentsü asoshi pa kongsang pa tsütsü sanga adoka liasü.

⁸Oda iba kongsangtem adokdaktsütsü, aser iba agi tejang atangtsü, aser iba tsükmenatzüzü jilung jilunga akümtsü, aji ali tajung aser tzü jenti anasa tema liasü.

⁹Shiang, Yamai KIBUBA Tsüngremi ashir, Aji azükarudi ma? Aji azüladaktsütsü asoshi, oda to lanu adokba ajak azüladaktsütsüsa pai iba teratemji atsüteta, iba süngjang meleptoktsü no? Oda aji tera dena atsütettsü tashi tulu mesüra nisung aika tenüngdaktsü malitsü.

¹⁰Kodang aji temdir, saka aji azükarudi ma? Kodang anüdoklen mopungi iba dak kongshidir, ibaji mazülatsü no? Temeidakji aji azüladoktsü.

¹¹Ano KIBUBA O kü dangi aru;

¹² “Tang tashi mangaba kidong dang shiang; nenoki itemi kechi tetezü memetet no? Parnok dang shiang, Ajiang, Babilon chuba Yirusalemi aru, aser lar chuba aser lar tamarenertem agi, aser parnok pa dangi Babiloni bener ao.

¹³Aser pai chubar metsü ka agi, aser pa den tezüngzüktepba ka yanglu, pai ano tenangzükba küboki pa idaktsü aser linük lenirtem bener oadok;

¹⁴oda iba chuba yimliji tajemrepba asütsü, pai pei sasa angema matutettsü, saka pa tezüngzüktepba benshiba agi pa noktaka litettsü asoshi liasü.

¹⁵Saka pai chuba otongdartem Ijipi, oda parnoki pa nem kor, aser temeranger jenti agütsütsü yoka, pai pa anema apuso. Pa azükarudi ma? Iba ama mapa inyaker pa jenbudi ma? Tezüngzüktepba pai raksatsü aser ano jentetdi ma?

¹⁶Kü taküm agi azüngashir” ta KIBUBA Tsüngremi ashir, “Linük nung kong pa alir, oda pa chuba kümdaktsü, shiba tenangzükba pai sensatsü aser shiba tezüngzüktepba pai raksa, oda pa den pa Babilon nung asütsü.

¹⁷Mesüra Farao pei tashi tulu temeranger aser telok tului, kodang parnoki ali mukluka aser mitsa yangludir, nisung jenti leptoktsü asoshi, pai rara nung kecha meinyaktettsü.

¹⁸Kechiyong tezüngzüktepba raksaba agi pai tenangzüktepba sensatsüogo; aser ajiang, pai pei o nangzük, aji saka item ajak inyaka pa mejenbutsü.”

¹⁹Anungji yamai KIBUBA Tsüngremi ashir; “Kü taküm agi azüngashidi, atangji pai sensatsüba kü tenangzüktepba aser pai raksatsüba kü tezüngzüktepba, oda ni pa pei kolak nung benloktsütsü.

²⁰Aser ni pa madak sang mesangtsü, aser kü sang nung pa aputsü aser ni pa Babiloni bener arutsü, aser yangji pa den pa ozüng raksaba oda ni anema ozüng raksaba asoshi, pa den o kateptsü.

²¹Aser par telok nung tajungtibatem nok agi laodaktsütsü, aser parnok tanüngba ajak mopung ajaklen prokshidaktsütsü, aser nenoki ni KIBUBAi aji jembizük ta metettsü.”

²²Yamai KIBUBA Tsüngremi ashir; Nia cedar süngdong talakji agizüktsü; iba kongsang tila talak nungi ni lanuji agizüktsü, aser ni aji tenem talang shisangshisanga alidak atemtsü.

²³Israel tenem kolak nung ni aji atemtsü; aser aji agi süngsang adokdaktsütsü, aser tejang atangtsü, aser chilung chilunga aliba cedar süngdong ka asütsü; aser iba kübok tashikang atenba ozü ajak amungtsü, aser kongsangtem akhüm nung parnok amungtsü.

²⁴Aser moapu süngdong ajak ni KIBUBAi süngdong talang azüa aludaktsür aser süngdong tatsü ajungkettsür, aser süngdong tajem arudaktsür aser süngdong taru tajem kümtsü ta metettsü. Ni KIBUBAi jembizük aser aji inyakogo.