Read njo EZEKIEL 18 Bible Online

EZEKIEL 18 - njo bible

EZEKIEL 18

¹KIBUBA O kü dangi tanaben aru;

² Tsüraburtemi tsükmenatzü tasen achi, aser chirnur tepu mejemer, ta nenoki Israel linük nung amshiba apijemtsü shin tetezüji kechi?

³Ni taküm ali nungji ta KIBUBA Tsüngremi ashir, Israel nung iba apijemtsü shin amshitsü joko nenok mapang malitsü.

⁴Ajiang, taküm ajak kü meyong; tebu taküm amaji techir taküma kü meyongsa; shibai temenen mena ajibo asütsü.

⁵Saka nisung ka ochishia lira, aser kechi tim ozüng aser shitak inyakra,

⁶aser tenem tekülemdak mechiyungra mesüra Israel kidong süngyanglutem dangi pa tenük rangketa meyokra, mesüra pei kiyonger kinungtsü memenentsüra, mesüra tetsür la ita shilem nung anasa mora;

⁷aser shinga dak majung meinyaki lira, aser sentsü tsüa alir dang pa tenangzükba meyipa agütsüra, tashiyim agi shinga meraksatsü, aser yaseta alir nem amtsük agütsüra, aser mangsa alir sü abendaktsüra;

⁸pai sentem tali keter maputsüra, mesüra tetemlok pei atema magira, ozüng raksaba nungi pai pei teka sotadokra, nisung o nisung na tsüngda nung ochi benshira,

⁹ kü tzüzüng-ozüng nung jajara, aser kü yimsü-ozüng nung kümdanga benshira, pa ochishir, atangji pa taküm alitsü ta KIBUBA Tsüngremi ashir.

¹⁰Pai jabaso rakzükraktema aser azü tokshia item mapatemji inyakra,

¹¹saka pa tebuibo item mapajibo kar danga meinyakra, saka oda shi nung azü dena achir, aser par kiyonger kibutsü menentsü,

¹²sensaker aser maka maiter dak majung inyak; tashiyim agi raksatsü, tenangzükba meyanglushi, aser süngyanglutem dang tenük rangketa yok, tesempatsü mapatem inyak,

¹³tetemlok keta agütsü, aser tali adokba agi; ajangla pa taküm alitsü asü? Pa taküm malitsü. Item tesempatsü ajak pai inyak. Atangji pa südaktsütsü, pa zü pa madak alitsü.

¹⁴Saka iba nisungi jabaso ka sora aser pai tebui inyakba temenen ajak ngur, iba amaji meinyakra tenem tekülemdak kecha mechira,

¹⁵mesüra Israel kidong süngyanglu dangi pei tenük rangketa meyoker, pei kiyonger kinungtsü memenentsür,

¹⁶shinga dang majung mebenshir, tenangzükba nung mekangshidaktsür, mesüra rakzükraktema kecha meinyaker, saka pei amtsük yaseta alir nem agütsür, aser mangsa alir sü abendaktsü,

¹⁷temenen nungi pei teka sota ayu, tetemlok mesüra tali anguba magi, kü yimsü ozüng benshi, kü tzüzüng-ozüng nung jaja, tebu tai menaba atema pabo masütsü, pa atangji taküm alitsü.

¹⁸Pa tebubo pai taochi makai rishikangshi nungji, pa adianu dak rakzükraktem, aser pei nübur rongnung koba majung aji inyak, anungji pai pei tai menaba nung asütsü.

¹⁹Aji saka nenoki ashir, “Kechiba techiri tebu tai mabentsü?” Kodang techiri tim ozüng aser shitak inyaka lir, aser kü tzüzüng-ozüng ajak ayur, aser itemji benshir, atangji pa taküm alitsü.

²⁰ Shibai temenen menadir, ajibo asütsü; tebu tai techiri mabentsü, mesüra techir tai tebui mabentsü; temeshipur temeshibaji pa dak alitsü, aser tamajung pur majungbaji pa dak alitsü.

²¹Saka tamajungeri pai menaba pei tai ajak nungi meyipra, aser koba tim ozüng aser shitak aji inyakra, pa atangji taküm alitsü; Pabo masütsü.

²²Pai inyaksemba ozüng raksaba kecha pa anema mebilemtettsü; pai inyakba pei temeshiba nung pa taküm alitsü.

²³Tamajunger asüba nung ni tepela kar ali asü ta KIBUBA Tsüngremi ashir; aser oda pei lenmang nungi meyipa, aser taküm melidaktsünütsü no?

²⁴Saka kodang temeshi pur pei temeshiba nungi meyipa oadokdir, aser tai menadir, aser tamajungeri inyakba ama tesempatsü mapa ajak inyakdir, pa taküm alitsü no? Pai temeshi mapa inyakba kata mebilemtettsü, pai ozüng raksaba pei ozüng raksaba nung, aser pai temenen menaba pei temenen nung, item nung pa asütsü.

²⁵Aji saka nenoki ashir, “KIBUBA lenmang shitak masü.” Tang angang, Oh, Israel kidong! Kü lenmang kasasa masü no? Nenok lenmang kasasa mesüi mali no?

²⁶Kodang temeshi nisungi pei temeshiba nungi meyipa odir, aser tai menadir, pa asütsü; pai inyakba tai menaba nung pa asütsü.

²⁷Ano, kodang tamajung nisungi pai tamajung inyakba nungi meyiper, aser koba tim ozüng aser shitak lir aji inyakdir, pai pa taküm kümzüktsü.

²⁸Kechiaser pai shisadanger aser pai inyakba ozüng raksaba ajak nungi pai meyipa oadoker, atangji pa taküm alitsü, pa masütsü.

²⁹Aji saka Israel kidongi ashir, “KIBUBA lenmang shitak masü.” Oh Israel kidong, kü lenmang kasasa masü no? Nenok lenmang kasasa mesüi mali no?

³⁰Anungji, Oh Israel kidong, nisung shia pei mapa yari ni nenok o bendangtsü, ta KIBUBA Tsüngremi ashir. Nenok meyipang, nenok sasa nenok ozüng raksaba nungi meyipang; angji tai menabaji nenok asoshi tesamatsü masütsü.

³¹Kechi nungsa nenoki tai mena nenok ozüng raksaba ajak nenok nungi endokadokang; aser nenok temulungjang tasen aser taküm tasen kümang, kechiyong nenok kechiba asütsü, Oh Israel kidong.

³²Kechiyong shiba asür pa asüba nung ni tepela mangur, ta KIBUBA Tsüngremi ashir. Anungji nenok sasa meyipang, aser taküm liang.