Read njo EZEKIEL 19 Bible Online

EZEKIEL 19 - njo bible

EZEKIEL 19

¹Ano nai Israel chuba jala asoshi, mangyim ken ka tenang

²aser shiang, netsü kechi liasü? Molusongzü tetsü; molusongzü tepung rongnung la ontaka ali; molusongzü chanu rongnung lai pei techanu mesütet.

³Aser lai la techanu ka mesütet; pa molusongzü pungtu ka aküm; aser pai tetepsettsü shiruru aputsü angazük; pai nisung meyok.

⁴Kintemia pa indang angashi, pa parnok kanglai anir ao; aser parnoki poroki agi pa Ijip limai anir ao.

⁵Kodang lai ata-a ali, aser la teimla samaogo ta metet, idangji lai molusongzü chanu tanga agi, aser pa molusongzü pungtu kümdaktsü.

⁶Aser molusongzü rongnung pa oli-aruli ta asü, aser pa molusongzü pungtu ka aküm; aser pai tepsettsü shiruru aputsü angazük; aser pai nisung meyok.

⁷Pai parnok metet, aser pai parnok yimtitem raksa-a toktsü; aser linükji aser yangji aliba purtem pa arrürba ola agi tsübuseta liasü.

⁸Idangji ajaklen linüklen nungi kintemi pa anema apuso; pa parnok kanglai anir ao.

⁹Aser parnoki pa teshibangdak ki dangi poroki agi bener Babilon chuba dangi ao; Israel tenem nung pa ola mangashidaktsütsü asoshi parnoki pa tashi tait mitsai bener ai.

¹⁰Netsü tsükmenatzü lu nung tsükmenatzü zü ama, tzü anasa tema liasü; tzü jenti anasa aliba agi la tejang atang aser kongsang agi sünga liasü.

¹¹La tashi tait kongsangji chubar ajok aküm; süngsem temelem rongnung la tar talang liasü, aser parnok kongsang jenti den ngua liasü.

¹²Saka ain adoka la atsütet, aser la ali nung ondaktsü, aser anüdoklen mopungi la süngjang kongdaktsü, la tashi tait teraji raksadok aser azüla-a ao; mi agi item samatsü.

¹³Tang la arem nung, takong aser tzüra-a aliba li nung tema lir.

¹⁴La tongben nungi mi adoka iba jagi la süngjang meyoka lir, anungji la dak chubar mechi asütsü asoshi tashi tait kongsang mechi mali. Ibai mangyimba ken, aser ibai mangyimba ken asoshi alitsü.