Read njo EZEKIEL 2 Bible Online

EZEKIEL 2 - njo bible

EZEKIEL 2

¹Pai kü dang ashi, “Nisung chir, ne tsüng agi noktakang, ni ne den jembitsü.”

²Pai kü den jembidang tanela kü dangi ait, aser kü tsüng agi noktaka toktsü; aser pai kü dang jembiba ni angashi.

³Pai kü dang ashi, “Nisung chir, ni na Israel chirtem, tashi mangaba kintem, ni anema apusoba nübur dangi yoker; parnok aser parnok tsüraburtemi, oda tanü tashi ni anema ozüng raksaogo.

⁴Par chirnur makmanü aser temulungjang temerang lir; ni na parnok dangi yoker. ‘Yamai KIBUBA Tsüngremi shir’ ta nai parnok dang shiang.

⁵Aser parnoki anga-aka mesüra manga-aka, kechiyong parnokji tashi mangaba kidong lir, parnok rongnung ainkar ka lir ta parnoki metettsü.

⁶Na, nisung chir, ayi süngsem aser ai ne den liaka, aser na jepja rongnung liaka parnok tsübua teli. Parnok tashi mangaba kidong süaka parnok o nung tetsübu, mesüra parnok nükrang nung aoksa teli.

⁷Nai kü otem, parnoki angatsü süaka mangatsü süaka jembitsüla; kechiyong parnok ajak kanga dang tashi mangaba nübur lir.”

⁸“Saka na, nisung chir, ne dang kechi ashir angang, iba tashi mangaba kidong ama na tashi mangai teli; ne bang lapokang aser ni ne dang agütsüba chiang.”

⁹ Kodang ni reprang, ajiang, teka ka kü dangi songtok; aser angang, iba nung kaket talep ka liasü;

¹⁰aser pai aji kü madang sala; aser aji telunglen aser temalen zülua liasü, aser iba nung menungraba, mangyimba, aser tejashitsü zülua liasü.