Read njo EZEKIEL 20 Bible Online

EZEKIEL 20 - njo bible

EZEKIEL 20

¹Küm tenetbuba, ita pungububa, anogo terbuba nung, Israel tambur kar KIBUBA dang asüngdangyatsü aru, aser kü madang amen.

²Aser KIBUBA O kü dangi aru,

³“Nisung chir, Israel tamburtem dang jembiang, aser parnok dang shiang, yamai KIBUBA Tsüngremi ashir; nenok kü dang asüngdangyatsü aru asü? Ni taküm ali nungji ni nenoki kü dang asüngdangya mesüdaktsütsü” ta KIBUBA Tsüngremi ashir.

⁴“Nai parnok o bendangtsü no, nisung chir, nai parnok o bendangtsü no? Par tsürabur tesempatsütem meteta kümdakjang;

⁵ aser parnok dang shiang yamai KIBUBA Tsüngremi ashir; “Ni Israel shimtetba anogo nung, aser Yakob kidong jakzükba pur dang teka mekanga azüngashi, ni kü sasa parnok dang Ijip lima nung jungkai adokdakja aser parnok dang teka mekanga azüngashia, ni KIBUBA nenok Tsüngrem ta ashir.

⁶Iba anogo nung ni parnok dang, oda mamatzü aser ninang mojitzü yima aliba lima, alima ajak dang sentsüwangshiba linük, ni parnok nem agütsüba Ijip lima nungi ni parnok anir adoktsü ta teka mekanga azüngashi.

⁷Ni parnok dang ashi, ni KIBUBA nenok Tsüngrem asünungji, nenoki meimba tesempatsütem endokadokang, aser nenok sasa Ijip süngyanglutem agi nenok sasa temenendaktsü.

⁸Saka parnoki ni anema apuso aser kü dang mangali asü, parnoki meimba süngyanglutem, mesüra parnoki Ijip süngyanglutem senzüka metoktsü. Idangji Israel lima nung kü ain adokba parnok anema inyaktsü asoshi, ni parnok madak kü ain adokba shiloktsütsü ta ni ashi.

⁹Saka kintem, aser Ijip nungi parnok anir adokdaktsüba agi ni parnok tsüngdang kü sasa metetdaktsüogo, parnok tsüngdang kü nüng memenendaktsütsü asoshi ni kü tenüng atema aji inyak.”

¹⁰“Anungji ni parnok Ijip lima nungi anir adok, aser aremi parnok anir aru.

¹¹ Ni parnok nem tzüzüng-ozüng agütsü, aser parnok dang kü obendang sayu, koba nisungi inyakra taküm alitsü.

¹² Ano ni parnok nem, ni aser parnok tsüngda nung temaitsü alitsü asoshi, aser parnok meshitettsüba KIBUBA ni lir ta metettsü asoshi amungnü agütsü.

¹³Saka Israel kidongi arem nung ni anema apuso, parnoki kü tzüzüng-ozüng nung mejaja, aser parnoki kü obendang magizük, koba nisungi benshira parnok taküm alitsü; aser kü amungnü parnoki kanga menentsü; idangji parnok samatsütsü asoshi, arem nung ni parnok dak kü ain adokba meküploktsütsü ta ashi.

¹⁴Shir kintem nükdang ni parnok anir aru, parnok tsüngdang kü nüng memenentsü mechi ni ya inyak.

¹⁵ Aji saka ni parnok nem agütsüba, mamatzü aser ninang mojitzü yima aliba lima ajak asoshi sentsüwangshiba linük jagi parnok ni anir marutsü ta kü teka mekanga azüngashi,

¹⁶kechiaser parnoki kü yimsü ozüng sensatsü, aser kü tzüzüng-ozüng nung mejaja aser kü amungnü menentsü; kechiyong parnok mulungjang süngyanglu sülen ao.

¹⁷Aji saka parnok samatsütsü kü tenüki apayu, mesüra ni parnok arem nung ajonga tatem mekümdaktsü.”

¹⁸“Ni parnok chirnur dang arem nung ashi, nenoki nenok tsürabur tzüng-ozüng nung tejaja, mesüra parnok obendangba tebenshi, mesüra parnok süngyanglutem agi nenok sasa temenendaktsü.

¹⁹Ni KIBUBA nenok Tsüngrem lir, kü tzüzüng-ozüng nung jaja-ang, aser itemji benshiang;

²⁰aser kü amungnütem meshitetang; aser itemji ni aser nenok tsüngda nung, nenoki ni KIBUBA nenok Tsüngrem ta metettsü asoshi temaitsü ka asütsü.

²¹Saka chirnurtemi ni anema noktak; parnoki kü tzüzüng-ozüng nung mejaja, mesüra kü tesayuba o mebenshi, koba itemji nisungi inyakra iba nung parnok alitsü; parnoki kü amungnütem menentsü, idangji parnok anema arem nung kü ain adokba inyaktsü asoshi parnok dak kü ain adokba meküploktsütsü ta ni bilem.

²²Saka ni kü teka agien, aser shirnok kintem madang ni parnok anir aru item madak kü tenüng memenendaktsütsü asoshi ni kü tenüng indang bilema inyak.

²³ Aji saka kin rongnung ni parnok prokshidaktsütsü, aser linüktem madak senshidaktsütsü ta arem nung parnok dang teka mekang azüngashi;

²⁴kechiaser parnoki kü obendang mebenshi, aser kü tzüzüng-ozüng magizük, aser kü amungnütem menentsü, aser parnok tenük par tsürabur süngyanglu sülen liasü.

²⁵Ano ni parnok nem tzüzüng-ozüng koba tamajung agi parnok taküm malitsü, aji parnok nem agütsü;

²⁶aser ni parnok sasa parnok pei sempartem jagi chirnur mezüng asoba tarongba tenla tenlaba, oda ni parnok samatsütsü asoshi, aser parnoki ni KIBUBA ta metettsü asoshi, menena kümdaktsü.”

²⁷“Anungji nisung chir, Israel kidong dang jembiang aser parnok dang shiang. Yamai KIBUBA Tsüngremi ashir; ano iba nung nenok tsüraburtemi ni atala, parnoki ni anema tai mena.

²⁸Kechiyong ni teka mekanga parnok nem agütsütsü ta azüngashiba limai parnok anir arudang, idangji parnoki ungsem talang, aser süngdong to melema angu, aser yangji parnoki tetepsetba tenla agütsü, aser yangji parnok ni ain adokdaktsütsü tenla agütsü, yamaji parnoki tajemba tenla meküploktsü.

²⁹Idangji ni parnok dang ashi, nenok aodak tokong ya kechi koma ka? Anungji tanü tashi iba linük dang Bama[4] ta ajar.”

³⁰Anungji Israel kidong dang shiang, “Yamai KIBUBA Tsüngremi ashir; nenok tsürabur amato nenoki nenok sasa menendaktsür no? Aser parnok tesempatsü mapatem sülen nenoki aor no?

³¹Kodang nenoki sempet tenla agütsüdir, nenok jabasotem mi ajanga süidaktsüdir, nenok sasa tanü tashi nenok süngyanglu ajak agi menendaktsütsü. Aser Oh Israel kidong, nenoki kü den tongtepa jembitsü no? KIBUBA Tsüngremi ashir, ni taküm ali nungji nenoki kü den mejembitettsü.

³²Aser süng aser lung külemba nung, onok alima kintem aser nisungtem mesüka alitsü ta nenoki ashi nung, kechi nenok mulung nung ali aji mataloktsü.”

³³“KIBUBA Tsüngremi ashir, ni taküm ali nungji, tashi tulu teka agi, aser tepen songtoka, ain temai adoka, nenok madak, ni chuba asütsü.

³⁴Aser tashi tulu teka agi, aser tepen songtoka, aser ain temai adoka, ni nenok nisungtem nungi anir adoktsü, aser kongsa nenok prokshia ali, item linüktem nungi anitentsü;

³⁵aser ni nenok nisungtem rongnung nenok bener arutsü, aser yangji tejak o tejak na ajurutepa nenok o bendangtsü.

³⁶Ijip lima arem nung nenok tsürabur den ni mepishitepba ama, yamaji ni nenok dang mepishiteptsü” ta KIBUBA Tsüngremi ashir.

³⁷“Aser ni nenok mechi kübok süidaktsütsü, aser ni nenok tezüngzüktepba talentepbai nenok idaktsütsü;

³⁸aser nenok rongnungi anema apusortem aser ni anema ozüng raksartem ni meshitettsü, parnok aenersa aliba lima nungi ni parnok anir adoktsü, saka Israel limai parnok maitsü; aser nenoki ni KIBUBA ta metettsü.

³⁹Nenok asoshi Oh Israel kidong, KIBUBA Tsüngremi yamai ashir; oang, nisung shiai pei süngyanglu raksa-ang, aser joko nenok sempet aser süngyanglutem agi kü temeshi tenüng memenendaktsütsü.”

⁴⁰“Kechiyong kü temeshi tenem, Israel tenem kolak nung, yangji Israel kidong ajak, parnok ajaki, linük nung ni tenzüktsü ta KIBUBA Tsüngremi ashir; yangji ni parnok agizüktsü, aser yangji nenok tenlatem, aser nenok teshimtet sempettem, nenok temeshi oset ajak ni agizüktsü.

⁴¹Kodang nisungtem nungi ni nenok anitetdir, aser kechi nungsa nenok prokshia ali item linük nungi anitendir, teronem tanang ama ni nenok agizüktsü; aser kintemi ngua nenok dak ni meshiteta alitsü.

⁴²Kodang Israel limai aser nenok tsürabur nem agütsütsü ta kü teka mekang ajagi ni nenok bener arudir, nenoki ni KIBUBA ta metettsü.

⁴³Yangji kechi nungsa nenok pei sasa menendaktsü, nenok mapatem aser nenoki inyakba ajak nenoki bilemtettsü; aser nenoki tamajung inyakba ajak asoshi nenok tenük agi ngua nenok sasa sempatsü.

⁴⁴Aser Oh nenok Israel kidong, kodang nenok temenen mapa, mesüra nenoki tamajung inyakba amato mesüi ni nenok dang benshiba nenoki ngudir, nenoki ni KIBUBA ta metettsü” ta KIBUBA Tsüngremi ashir.

⁴⁵KIBUBA O kü dangi aru,

⁴⁶“Nisung chir, ne tejak anüolentip shiang, aser ne o anüolentip tsükdakjang, aser anüolentip nung arem moapu anema ainkar o jembiang;

⁴⁷aser anüolentip arem dang shiang, KIBUBA O angang; yamai KIBUBA Tsüngremi ashir; ajiang, ni ne dak mi tsükloktsü, aser iba agi ne dak süngdong tajem shia aser süngdong taru shia meyoktsü; milak adoka jangruba maseptsü, aser anüolentip nungi anüdoklentip tashi tejak ajak iba jagi arongtsü.

⁴⁸Aser ni KIBUBAi aji tsükloktsü ta shi ajaki angutsü; aji meremseptsü.”

⁴⁹Idangji ni ashi, “Aia, KIBUBA Tsüngrem, parnoki kü indang ashir, ‘pa o entepba jembir ka masü no?’ ”