Read njo EZEKIEL 21 Bible Online

EZEKIEL 21 - njo bible

EZEKIEL 21

¹KIBUBA O kü dangi aru.

²Nisung chir, ne tejak Yirusalem tsütsü shiang, temeshidak tsütsüi ne o tsükdakjang, aser Israel anema ainkar o jembiang,

³aser Israel linük dang yamai shiang,“Yamai KIBUBAi ashir, ajiang, ni na anema lir, aser nokleptsü nungi nok atsütettsü,aser na nungi temeshi pur o tamajung pur leptoktsü.

⁴Ni temeshi pur aser temenen pur na leptoktsü asoshi nokleptsü nungi kü nok anüolentip nungi anüdoklentip tashi aotsü.

⁵Ya ni KIBUBA nokleptsü nungi kü noklangnok atsütetba lir ta kin ajaki metettsü, aser aji joko tanaben meyipa marutsü.”

⁶“Anungji kodang nai itemji ngudir mang yimang Oh nisung chir, parnoki ngua ne mulung teraksa aser tejashi tulu nung mang yimang.

⁷Kodang parnoki ne dang kechiba nai mang ayimer ta asüngdangdir, nai ashitsü, ‘Osang atema, kechiaser aji arur; temulungjang shia yimsa-a aotsü, aser teka ajak tashi meiti alitsü, aser tanela shia lulatsü, temokok ajak tzü ama tashi meiti alitsü. Ajiang aji arur, aser aji inyaktsü’ ta KIBUBAi ashir.”

⁸KIBUBAi kü dang ashi,

⁹“Nisung chir, ainkar o jembiang aser yamai KIBUBAi ashir ta nüburtem dang shiang, nok ka, nok ka,ibai chira-a aiogo aser prangshia meyutetogo.

¹⁰Aji tetepsettsü asoshi aiogo, aji tsüngpret ama asütsü asoshi meyutetogo, ajangla idakji menüremtepa lidi ma? Reprangang kü nüburtemi tekümdangtsü aser temerenshi ajak sensatsür.

¹¹Noklangnokji prangshia meyutettsü asoshi agütsüogo. Aji chira-a aiteter tetepseter ket nung agütsüogo.

¹²Ayimtenang aser mang yimang Oh nisung chir, kechiyong ibai kü nübur madak lir, ibai Israel tongtipur ajak madak lir; kü nübur den nok nem parnok bendanga agütsüogo, anungji tejashi nung ne teku nung tsüngang.

¹³Kechiyong tetendangba ka lir, aser shibai kü terasaba ajok sensatsütsü akok?” ta KIBUBAi ashir.

¹⁴“Saka ajiang, na nisung chir, ainkar o jembiang aser ne teka külemi matenang; nokji tanaben aludakjang, aji tasembena aludakjang; tetepseter nok, tetepseter nok tulu kobai parnok lungbanger!

¹⁵Parnok mulungjang yimsa-a aotsü, aser telaortem jenti asütsü asoshi ni parnok süngkhüm ajak anema nok yuja lir. Aia! ya tsüngpret ama yangluogo, ya tetepsettsü asoshi aiteta lir.

¹⁶Sangshiang Oh nok, tajichileni, tabeleni kolensa ne tejak shia ali!

¹⁷Ni kü teka zep ta amettsü, aser ni kü ain adokba tiptemdaktsütsü. Ni KIBUBAi aji jembizükogo.”

¹⁸KIBUBA o tanaben kü dangi aru,

¹⁹“Ano na nisung chir, Babilon chuba nok arutettsü asoshi nai lenmang anasü yuang. Item anaprongla linük kasa nungi arutsü; aser tesem ka temaitsü yuang, yimtileni aolen lenti nung temaitsü yuang.

²⁰Nai lenmang ka, Ammon chirtem Rabba dangi aser Yirusalem nung noktanga aliba Yihuda dangi nok arutsü asoshi shimtetang.

²¹Kechiyong Babilon chuba lenmang pangra-a alidak lenmang ana rashia piladak tia takzüa noktaka ali, pai lijakjangtem külen küleni anokshi, pai süngyanglu noksa dang asüngdang, pai temesen nung takzü.

²²Pa teka tajichi nung Yirusalem asoshi tetakzüba liasü, jara tsüki nungpoktsü, tetepsettsü ayimoktsütsü ola tulu agi ayimtentsü süngkhüm nung pokdaktsütsü, ali menoktettsü, mitsa yanglutsü.

²³Yirusalemi ya amajok nung tia takzür ta bilemer, saka iba jagi parnok tai bilemtetdaktsür, aser parnok tai yong parnok aputsü.”

²⁴Anungji yamai KIBUBA Tsüngremi ashir,“Kechiaser nenoki nenok tai bilemtettsüsa kümdaktsü nung nenoki ozüng raksaba ajanga aser nenoki inyakba mapa ajak nung jungkai adokba temenen yong, item ajanga nenok bilemtetdakja ali nung, nenok teka agi aputsü.

²⁵“Aser na Oh tasütsü yiruba tamajung Israel tongtipur, ne mapang tonga arua lir, temerenshi mapang tatem nung,

²⁶yamai KIBUBA Tsüngremi ashir, ‘Chuba korang semzükang! Kecha tetoktsü, kechi teküboklen ali aji ajongketang, aser kechi temalen tua ali aji anir aludakjang!

²⁷Teraksa, teraksa, teraksa ni adokdaktsütsü, aser aji shitakba shiba meyong pa dangi maru tashi kecha memelentsü, pa nem aji agütsütsü.’

²⁸“Aser na Oh nisung chir, ainkar o jembiang aser shiang, Ammon chirtem indang aser parnok arütsütsüba indang yamai KIBUBA Tsüngremi ashir, aser nai shiang, nok ka, nok ka tetepsettsü asoshi atsüteta lir, tsüngpret ama prangshitsü asoshi meyuteta lir.

²⁹Kechiaser nisungi nenok dang tiyazü tia takzüba agütsü, aji tetepsettsüba nisung tamajunger tekong nung, parnok tatemsa tesamatsüba anogo tatong nung ayiptentsü nenok dang mela.

³⁰Ibaji nokleptsü nung semdakjang. Na yangludak, na asoba lima nung ni na o bendangtsü.

³¹Aser ni kü ain adokba ne madak meküploktsütsü, kü terasaba mi agi ni ne madak apuloktsütsü; aser ni na samatsütsü junga metetba nisung ket nung bendanga agütsütsü.

³²Na mi asoshi tatsüktsü asütsü aser ne zü agi alima asüngtsü; nenok joko mebilemtettsü, kechiyong ni KIBUBAi jembiogo.”