Read njo EZEKIEL 22 Bible Online

EZEKIEL 22 - njo bible

EZEKIEL 22

¹KIBUBA O kü dangi aru,

²“Oh nisung chir, nai azü tokshiba yimti, nai o bendangdi ma? Ajangla pa nem pa tesempatsü mapa ajak bilemtetdakjang.

³Aser nai shiang, yamai KIBUBA Tsüngremi ashir, pei madak azü tokshiba yimti, aji agi pei dak pei mapang tonga arutettsü, aser aji agi pei asoshi süngyanglutem yanglutsüsa kümdaktsür, aji oda pa menena akümtsü!

⁴Na pei zü nai tokshiba nung na tai kümogo, aser nai yangluba ne süngyanglu nung menena lir, aser nai ne anogo anasa arutsüsa kümdaktsü, aser ne küm tatem tonga arua lir, anungji na kintem asoshi tarütsütsü aser linük ajak tsüngdang sensamasatsütsü na yanglutsü.

⁵Shirnok na anasa ali, aser shirnok na nungi talang nung lir, na atalatsütsü, Oh na, tenüng tamajung aser rongrongshishisang.

⁶“Ajiang, nenok rongnung Israel tongtipurtemi parnok tashi ajak azü tokshiba nung agütsür.

⁷ Tebu aser tetsü nenok rongnung nenoki sensatsür, nenok den semloka aliba aener dang parnoki rishikangshia benshir, tebu malir aser amitsür dang parnoki mashi-i benshir.

⁸ Nai kü temeshi osettem sensatsü, aser kü amungnütem menentsü.

⁹Nenok rongnung azü tokshidaktsütsü ajumetsür nisung lir; aser parnoki tenem nung süngyanglu kidang chiyunger, nenok rongnung parnoki azüabunga inyak;

¹⁰ nenok rongnung parnok tebu nunger züngatsür den nüktapangta benshi, nenok rongnung tetsür ita shilem mapang nung nüktapangta benshi;

¹¹nenok rongnung kari pei kiyonger kinungtsü den tesempatsü mapa benshi, aser kari azüabunga pei tanüker jala menendaktsü, aser nenok rongnung kari pei tenu, tebuer jala menendaktsü.

¹² Nenok rongnung azü tokshitsü süpokrem agir; tapuba nung nenoki tetemlok agir, aser nai pei kiyonger madak tashiyim agi merumerua tajangzük agi, aser nibo amadok ta KIBUBA Tsüngremi ashir.

¹³“Ajiang, nai ochi meshi-i tajangzük agiba nung, aser nenok rongnung azü tokshidaktsü nung ni kü ket maloktsüogo.

¹⁴Ni nenok dang benshiba anogo nung, nenok mulungjang akanga aser nenok teka tashi ita atadi ma? Ni KIBUBAi jembiogo, aser aji inyaktsü.

¹⁵Aser ni na kin rongnung prokshidaktsütsü, aser na linüktem dangi senshidaktsütsü, aser na nungi ne memerükba ni samatsütsü.

¹⁶Aser kintemi ngua na ne sasa menentsü, aser nai ni KIBUBA ta metettsü.”

¹⁷KIBUBA O kü dangi aru,

¹⁸“Nisung chir, kü madang Israel kidong yinscü küma lir. Parnok ajak misem rongnung yongmenyin, tin, merang aser shisayin lir; parnok taribi yinscü lir.

¹⁹Anungji yamai KIBUBA Tsüngremi ashir, nenok yinscü agi sünga ali nung, ajiang, ni nenok Yirusalem nung sentepdaktsütsü.

²⁰Parnok taribi, yongmenyin, merang, shisayin, aser tin, mi agi rua yimsadaktsütsü, misem nung bendenba ama; yamaji ni kü ain adokba aser kü tejashi mit nung ni nenok anitentsü, aser ni nenok yangji toktsütsü, aser nenok yimsadaktsütsü.

²¹Hau, ni nenok anitentsü, aser kü terasaba mi agi nenok dak apuloktsütsü, aser iba nung nenok yimsa-a aotsü.

²²Taribi misem nung yimsaba ama, yamaji nenok iba nung yimsadaktsütsü; aser nenoki ni KIBUBA nenok madak kü ain adokba meküploktsü ta nenoki metettsü.”

²³KIBUBA O kü dangi aru,

²⁴“Nisung chir, la dang shiang, kü ain adokba anogo nung memerükba aser tzünglu marudak linük na lir.

²⁵Kechiyong linük nung ainkartemji arüa aliba molusongzüi pei tetepsettsü shiruru shisatsüba mesüka lir; parnoki nisung taküm meyoker, parnoki terizüngdak aser rongsen rakzüker, parnok rongnung amitsür aika kümdaktsür.

²⁶ Lar putirtemi ano kü ozüng raksatsür, aser kü temeshi osettem menentsür; temeshi aser tanga mapa kecha balala parnoki mekümdaktsür, aser temerük o memerükba kecha balala mesayur; kü amungnütem dang parnoki tenük shibangadoker, yamaji ni parnok rongnung menendaktsür.

²⁷Ochi mashiba tajangzük angutsü asoshi azü tokshia, aser taküm samadakja, tetepsettsü shiruru shisatsüba tsünü mesüka tongtipurtemji lir.

²⁸Par ainkartemi ano, pei sasa dak shinü mezüa, parnoki dang tiyazü mangdang ngua, tiyazü tia takzüba parnok nem agüja, KIBUBAi mejembi nung, yamai KIBUBAi ashir, ta ashir.

²⁹Linü nung aliba nisungtemi rishikangshitsü mapa inyaker, aser aener rakzükraktem asür; parnoki sensaker aser makamaiter madak mashi benshir.

³⁰Ni parnok rongnung jara aser kü madang tetsüngda nung noktaktsü, ni aji raksatsü aliba nungi noktangtsü nisung ka bushidang saka ni kata mangu.

³¹Anungji kü ain adokba parnok dak meküploktsütsü; kü ain adokba mi agi ni parnok samatsür; parnok mapatem ni parnok kolak nung oshitsür” ta KIBUBA Tsüngremi ashir.