Read njo EZEKIEL 23 Bible Online

EZEKIEL 23 - njo bible

EZEKIEL 23

²“Nisung chir, tetsü ka jala, tetsür ana liasü,

³aser parnoki Ijip nung jabujari benshi; parnok aiwa mapang nung parnoki jabujari benshi; yangji parnok mama nung ajet, aser yangji parnoki parnok tasüngtet teku nung am.

⁴Tantsüla tenüng Ohola,[5] aser tenu Oholiba[6] liasü; aser parnok kü kinungtsü aküm, aser parnoki jabaso aser jala sotsü. Aser parnok tenüng ama Oholaji Samaria aser Oholibaji Yirusalem liasü.’

⁵Ohola kü kinungtsü saka lai nüktapangta benshi; aser la meimertem Asiria nunger lar kiyongertem dang lai kanga temeim sayu,

⁶parnokji nakrema meremba sobur liasü, governortem aser walunirtem, parnok ajak, tobur tajung asangurtem, kor nung amenba kor temerangertem liasü.

⁷Lai parnok madak azüabunga aküm, parnok ajak Asiria nunger teshimtet nisungtem; aser shiba dangsa lai mesüa aru, parnok süngyanglu ajak den lai pei sasa menen.

⁸Ijip nungi anir aruba mapang nungi lai jaburjari metoktsü; kechiyong la aiwa nungi parnoki la den nüktapangta benshi, aser parnoki la tasüngtet teku nung am, aser la dak jabujari meküploktsü.

⁹Anungji lai mesüokba la meimer Asiria nunger ket nung ni la bendanga agütsü.

¹⁰La mangsa aliba parnoki jungkai adokdaktsü; parnoki lar jabaso aser jalatem bener ao, aser parnoki la nok agi tepset; aser tetsür rongnung la tansütsü o ka aküm; kechiyong parnoki la madak o bendang.

¹¹“La tenu Oholibai aji nguaka, ano la dang nungi tali tamajungba, aser jabujariba nung teyi jabujariba dang nungi taoba liasü.

¹²Lai Asiria nunger governortem aser la kiyongertem, akhüm kanga keta soburtem, kor nung amenba kor temerangertem, parnok ajak tobur tajung asangurtem azüabunga liasü.

¹³La menentsüogo ta ni angu; parnok anapronglai lenmang kasa nung jaja.

¹⁴Lai la jabujariba tali kümdaktsü, kechiyong Kaldi nunger tebur noksa bensa bensa-a meremba sentsü agi yanglua angu,

¹⁵peremlen agi jendanger, tekolak naiba taremba nung Babilon nunger mesüka parnok ajak tereprangtsü tanishirtem ama lai angu.

¹⁶Lai parnok nguli lai parnok asoshi azüabung, aser parnok dangi Kaldii osang abener yok.

¹⁷Babilon nunger la temeim yipten semdangi aru, aser parnok jabujariba agi parnoki la menentsü, aser la parnok den memerüki aküm aser khenyongi parnok dang lai sempa-a pila.

¹⁸Anungji lai la jabujariba aser la mangsa aliba meteta aküm; idangji teyi dang sempa-a pilaba ama ni la sempaa aser la nungi pila.

¹⁹Aji saka lai la jabujariba, Ijip nung nüktapangta inyakba la aiwa bilemteta, la jabujariba tali kümdaktsü.

²⁰Aser lai kita kinungpurtem dak azüabung, shir meyong shi gado meyong shi ama, aser shirnok techir kor dak jakzük ama liasü.

²¹Yamaji Ijip nungeri ne lanuwa ne mama nung amba aser mama lanu nung ajetba, ne aiwa azüabungba nai tanaben bilema arudaktsür.”

²²“Anungji, Oh Oholiba, yamai KIBUBA Tsüngremi ashir; ajiang, ni na anema na meimertem nungi na sempartem adokdaktsütsü, aser ajaklen na anema parnok anir arutsü;

²³parnok den Babilon nunger aser Kaldi nunger ajak, Pedod, Shoa, Koa, aser parnok den Asiria nunger ajak; asangur tobur tajungtem, governortem aser parnok walunir ajak, chuba chirtem, nüngtugu nisungtem parnok ajak kor nung amenertem.

²⁴Aser parnok nok o nü, talungtsü, gari, aser kintem telok den na anema arutsü, parnoki na meketa tenoktangtsü jong tila, jong aser merang korang ayutsü; aser ni parnok nem obendangba agütsütsü, aser parnoki nenok madak o bendang agütsütsü.

²⁵Ni kü tenükmiba na anema ayutsü, aser parnoki ne den ain adokba agi inyaktsü; parnoki ne teni aser ne narong leptoktsütsü, aser ne tanüngba nok agi samatsü; parnoki ne jabaso aser jalatem agitsü, aser ne tanüngbatem mi agi meyokadoktsü.

²⁶Parnoki ano ne süoshi luzükadoktsü, aser ne senti zük bener oadoktsü.

²⁷Yamaji ne azüabungba anendaktsütsü, aser Ijip lima nungi bener aruba ne jabujari na nungi ni anendaktsütsü; anungji nai ne tenük parnok dangi rangketa meyoktsü, mesüra joko Ijip mebilemtettsü.

²⁸Kechiyong KIBUBAi ashir, ajiang, ni na, nai sempar ket nung ni na bendanga agütsütsü, shir ket nungi na tejashi nung pila.

²⁹Parnoki ne den tesempa agi benshitsü aser nai züsentetba ajak bener oadoktsü aser na mangsa aser temang tesa toktsütsü, aser ne jabujariba anaprongla metettsü.

³⁰Itemi ne dak inyaktsü, kechiyong nai bendanger sülen jabujaria ao, aser parnok süngyanglutem den na menena aküm.

³¹Nai neyi lenmang nung jaja, anungji la marok ni ne ket nung agütsütsü.”

³²Yamai KIBUBA Tsüngremi ashir, Nai neyi marok, koba tarok aser tulu lir, aji ajemtsü; na menüja atalatsü aser sensatsütsü; marokji tebang medema lir.

³³Na temesepba aser tejashi agi, tesüngmangtsü aser azüngmeyak marok agi, aser neyi Samaria marok agi sünga alitsü.

³⁴Nai oda aji ajemtsü aser yimdoktsü, aser nai aji anüka ajasatsütsü aser ne teku nung atsüngtsü. Ni jembiogo, ta KIBUBA Tsüngremi ashir.

³⁵“Anungji KIBUBA Tsüngremi ashir, kechiaser nai ni amadok, aser ne tesüleni ni endoktsü, anungji nai ano ne azüabungba aser ne jabujariba abentsüla.”

³⁶KIBUBAi ano kü dang ashi, “Nisung chir, nai Ohola aser Oholiba obendang agütsütsü asü? Ajangla parnok tesempatsütem parnok dang metetdakjang.

³⁷Kechiyong parnoki nüktapangta benshi, aser parnok ket nung azü lir, aser parnok süngyanglu den parnoki nüktapangta benshiogo, aser parnoki kü nem sotsüba parnok chirtem agi tarongba tenla tenlaogo.

³⁸Ano parnoki ibai kü dang inyakogo; parnoki iba anogo nungsa kü temeshidak menentsüogo, aser kü amungnütem raksatsüogo.

³⁹Kechiyong kodang parnok chirtem süngyanglu nung tepseta agütsü, idangji anogo kasa nung parnoki kü temeshidak menendaktsütsü aru, aser ajiang, yamaji kü kidang parnoki inyak.

⁴⁰“Aser ano nenoki talang nungi arutsü nisungtem tajai yok; parnok dangi osang abener yok aser ajiang, parnok aru, parnok asoshi ne sasa tzü chigu, ne tenük nung sentsü atep aser ne sasa mera keta sobutsü sobu;

⁴¹aser akhüm taket yipten manung, iba jakdang langbang ka renemja aliba manung nai kü teronem menemtsü aser totzü ataloka yur na amen.

⁴²Yangji la den menüshishitepba ola liasü; aser teshisadang makaba nisungtem den arem nungi yi pur anir arua liasü; aser parnoki parnok ket nung kisen anana yokoktsü, aser tobur tajung korang parnok kolak nung semoktsü.

⁴³Idangji parnok nüktapangta benshia parnok den jabujari masür no, ta ni ashi.

⁴⁴Aser nüktapangtar dangi ama parnoki la dangi ai, yamaji parnoki azüabungba tetsür Ohola aser Oholiba dangi ai.

⁴⁵Saka ochishir nisungtemi nüktapangtaba tetsürtem temerenshi agi aser azü tokshidaktsüba temerenshi agi parnok aitsütsü, kechiaser parnok nüktapangtalatem lir, aser parnok ket nung azü lir.”

⁴⁶Kechiyong KIBUBA Tsüngremi yamai ashir, “Parnok anema ni telok ka adokdaktsütsü, aser parnok tetsübutsü aser rakzükraktemba oset kümdaktsü.

⁴⁷Aser teloki parnok dak lung agi aontsü, aser parnok nok agi parnok lepzüka yoktsü; parnoki parnok jabasotem aser jalatem tepsettsü, aser parnok ki mi agi rongtoktsütsü.

⁴⁸Yamaji linük nungi takzütakpungba ni anendaktsütsü, anungji tetsür ajak tazütapungba masütsü tekümdangtsü sayutsü.

⁴⁹Nenok tazütapungba nenok dangi bener arutsü, aser nenok temenen süngyanglu külemba temenen abentsü, aser nenoki ni KIBUBA Tsüngrem ta metettsü.”