Read njo EZEKIEL 24 Bible Online

EZEKIEL 24 - njo bible

EZEKIEL 24

¹Tanaben, küm tukububa, ita terbuba, anogo terbuba nung, KIBUBA O kü dangi aru,

² “Oh, nisung chir, tanü nai anogo tenüng züluang. Babilon chubai tanüsa Yirusalem makbanga lir.

³Tashi mangaba kidong dang o-entepba ka jembiang, aser parnok dang shiang, Yamai KIBUBA Tsüngremi ashir, kürapo tongtakang, aji tongtakang, aser iba nungji tzü shiokang;

⁴Iba nung talangsaji enokang, shinük tajung ajakji, tepi aser tapupakji; teshimtet teret agi aji süngjang.

⁵Teshimtet san telok nungi agitetang, aser iba kübok ano terettem nangtenang; aji jungjunga meta-ang.

⁶Anungji KIBUBA Tsüngremi yamai ashir, azü tokshiba yimti asoshi aiatai, po koba song agi sünga lir, song koba agi aji kodanga metoktsür. Shimelang kata anünga meyutsüi ka ka shimteta aji azüngtetang.

⁷Kechiyong la zü la dak lir; lai aji ali agi menembangtsü asoshi lai ali nung aji shitoka meyutsü.

⁸Ain adokdaktsütsü, mangyangba arudaktsütsü asoshi, aser aji nembanga malitsü asoshi ni la züji lungpak manung yutsü.

⁹Anungji KIBUBA Tsüngremi yamai ashir, azü tokshiba yimti asoshi aiatai. Ni ano tanangji tulu kümdaktsütsü.

¹⁰Süng nangtenang, miji apuang, shiji junga meta-ang, aon menemtsüji jeta enokang, aser teretji rongtokdakjang.

¹¹Ajiser aji tatsük kümdaktsütsü, aser iba nung yongmenyinji arongtsü, aser iba nung songji yimsa-a odaktsütsü, aser songji samadaktsütsü asoshi, aji mijang manung tazüng tongtakang.

¹²Saka kodaka aji tsüka rongdir rongaka, iba song temelemji, rongtoktsü makoker,

¹³kechiaser ni na meshidoktsütsü bushi, aser nai memeshidokli asü, ni ne dak kü ain adokba meindokma tashi na joko ne memerükba nungi memeshidoktsü.

¹⁴Ni KIBUBAi ya jembiogo; aji ataloka arutsü, aser aji ni inyaktsü, ni meyipa mesottsü, mesüra maochitsü, mesüra ni temulung memeyiptsü; ne mapatem yari, parnoki na o bendangtsü” ta KIBUBA Tsüngremi ashir.

¹⁵Ano KIBUBA O kü dangi aru,

¹⁶“Nisung chir, ajiang, ni na nungi ne nükdang jangratemtsüji tazükba agi bener odaktsü, aji saka nai mang mayimtsü mesüra majebtsüla, mesüra ne nüktzü yima maludaktsütsüla.

¹⁷Ola madoki jashiang, tasür asoshi mang teyim; ne kolak meketa sü korang naiang, aser ne tsüng nung tsüngsem semokang, ne bangsemo tenembang, aser mangyimer chiyungtsü techiyung.”

¹⁸Anungji ni nisungtem dang anepdang yamaji jembi, aser nikongtsütsü kü kibutsü asü; aser kü dang melaba ama ni anepdang inyak.

¹⁹Nisungtemi kü dang ashi, “Nai yamai inyakbai, onok asoshi itemi kechiar onok dang mashitsü no?”

²⁰Idangji ni parnok dang ashi, “KIBUBA O kü dangi shia aru,

²¹Israel kidong dang jembiang, yamai KIBUBA Tsüngremi ashir, ajiang, ni kü temeshidak menentsütsü nenok asükümba tashi, nenok tenük peladaktsüba, aser nenok mulungjangi jangraba aser nenok jabaso aser jalatem nenoki tesülen toktsübatem nok agi asütsü.

²²Aser ni inyakba ama nenoki inyaktsü, nenok bangsemo menembangtsü mesüra mangyimer chiyungtsü mechiyungtsüla.

²³Nenok tekolak naiba korang nenok kolak nung, aser nenok tsüngsem nenok tsüng nung alitsüla; nenoki mang mayimtsü mesüra majebtsüla; saka nenok tai menaba nung nenok kongrasüka aotsü, aser mang yimtepa alitsü.

²⁴Yamai nenok dang Ezekiel temaitsü ka alitsü, pai inyakba ajak ama nenoki inyaktsü; kodang ibai arudir, idangji nenoki ni KIBUBA Tsüngrem lir ta metettsü.

²⁵“Na, nisung chir, ni parnok nungi parnok mitsa, parnok mezümeküma pelatepba, parnok tenüki jangraba, aser koba nung parnok temulung atoker, parnok jabaso aser jalatem agidir,

²⁶oda iba anogo nung shiba jenbudir, ne dangi aji ne narongi angashidaktsütsü arutsü.

²⁷Iba anogo nung shiba jenbua ali parnok dangi ne bang lapoktsü, aser nai o jembitsü, aser joko temeli tatsük makümtsü; anungji na parnok madang temaitsü ka alitsü, aser parnoki ni KIBUBA ta metettsü.”