Read njo EZEKIEL 25 Bible Online

EZEKIEL 25 - njo bible

EZEKIEL 25

¹ KIBUBA O kü dangi aru,

²“Nisung chir, Ammon chirtem tsütsülen ne tejak shiang, aser parnok indang shinang;

³aser Ammon chirtem dang shiang, KIBUBA Tsüngrem O angang; yamai KIBUBA Tsüngremi ashir, kechiaser kü temeshidak menentsü dang, aser Israel lima azüngmeyaka kümdaktsü dang aser Yihuda kidong tepuokdaki bendang limai yok dang, nai aha! ta ashi.

⁴Anungji ajiang, anüdoklen chirtem nem agidaktsütsü asoshi ni na bendanga agütsütsü, aser parnoki ne dak tanendak yanglutsü, aser parnok talidak ne dak yanglutsü; parnoki ne süngjang achitsü, aser parnoki ne mamatzü ajemtsü.

⁵Aser ni uttem asoshi Rabba chiyimdak kümdaktsütsü aser Ammon yimtitem, san telok asoshi yipten kümdaktsütsü. Anungji nenoki ni KIBUBA lir ta metettsü.

⁶Kechiyong KIBUBA Tsüngremi yamai ashir, kechiaser nai ne ket maten nungji, aser tetsüng agi ajemten, aser Ijip lima madak ne mulungjang nung pelatepa sensamatsü nungji,

⁷ajiang, ni ne madak kü teka mekanga lir, aser na kintem nem makdaktsütsü asoshi bendanga agütsütsü, aser nübur rongnungi ni na lepdokadoktsü aser ni na linük nung sama-a kümdaktsütsü; ni na samatsütsü, aser nai ni KIBUBA ta metettsü.”

⁸ Yamai KIBUBA Tsüngremi ashir; “Kechiaser Moabi ashir, ajiang, Yihuda kidong tangar kintem ama kümogo;

⁹ajiang, ni Moab tip külen, iba arrtsü yimtitem nungi Beth-jeshimot, Baalmeon aser Kiriathaim, sentsüwangshitsü linük tashi,

¹⁰aser ni Ammon dena Moab anüdoklen chirtem nem agidaktsütsü agüjadoktsü, anungji kintemi joko aji mebilemtettsü.

¹¹Yamaji ni Moab madak o bendangtsü, aser ni KIBUBA ta parnoki metettsü.”

¹² Yamai KIBUBA Tsüngremi ashir; “Kechiaser Edomi Yihuda kidong anema tayang kepzüka benshi, aser kanga jashidaktsü, aser pa sasa parnok dak mang ayang nungji,

¹³yamai KIBUBA Tsüngremi ashir, ni kü teka Edom anema mekangtsü, aser iba nungi nisung aser shiruru lepdokadoktsü; aser ni aji Teman nungi azüngazünga kümdaktsütsü; oda Dedan tashi parnok nok agi samatsü.

¹⁴Aser Edom madak kü mangyangba kü nübur Israel ket agi agütsütsü, aser Edom nem parnoki kü ain adokba yari aser kü mit adokba yari inyaktsü; aser parnoki kü mangyangba metettsü ta KIBUBA Tsüngremi ashir.”

¹⁵ Yamai KIBUBA Tsüngremi ashir, “Kechiaser Filistia nungeri tayang küpzüka benshi, aser mang ayang, temulungjang nung sensamasaja tatem maka tetsükchitep agi aji samatsütsü benshi nungji,

¹⁶yamai KIBUBA Tsüngremi ashir, ajiang ni Filistia nunger madak ni kü teka mekangtsü aser tzüyimküm nung tanüngba samatsütsü.

¹⁷Aser kodang ni parnok madak tetsübutsü ain adokba tulu agi mang yangdir, aser ni kodang parnok madak kü mangyangba agütsüdir parnoki ni KIBUBA ta metettsü.”