Read njo EZEKIEL 26 Bible Online

EZEKIEL 26 - njo bible

EZEKIEL 26

¹ Küm terkabuba ita anogo mezüngbuba nung, KIBUBA O kü dangi aru;

²“Nisung chir, Yirusalem anema Tairi aha, Yirusalem süngkhüm raksaogo, kü nem lapokja lir; tang la raksa-a ali nung ni sünga alitsü, ta ashi nungji,

³yamai KIBUBA Tsüngremi ashir, ajiang, Oh Tair, ni na anema lir, tzüyimi koda pei tzüsem adokdaktsür yamaji na anema kin aika atudaktsütsü.

⁴Parnoki Tair jaratem raksatsütsü, aser la mitsatem raksatsütsü; aser ano ni la nungi ali aidokadoktsü, aser la lungpakma tesa kümdaktsütsü.

⁵La tzüyim nung züktsük putaka ayudak asütsü, kechiyong ni aji jembizükogo, ta KIBUBA Tsüngremi ashir; aser kintem asoshi la temakzükba ka akümtsü.

⁶Aser moapu nung lar jalatem nok agi tepsettsü aser parnoki ni KIBUBA ta metettsü.”

⁷Kechiyong yamai KIBUBA Tsüngremi ashir; “Ajiang, Tair madaki Babilon chuba Nebukadnezzar, chubatem madak chuba, anüdoklentip nungi, kortem aser talungtsütem den, aser kor temerangertem den, telok ka aser nisung jenti ni bener arutsü.

⁸Pai ne jalatem moapu nung nok agi tepsettsü, aser na anema pai mitsa yanglutsü, aser na anema tenem mejungketa yanglutsü, aser na anema jong agi tongdanga ayutsü.

⁹Aser ne jaratem anema pai tenungpoktsü süngtem ayutsü, aser pu agi ne mitsa raksatsütsü.

¹⁰Par kor telokti auyi agi na longpangtsü, jara teraksa yimti kati aiba mesüka kodang ner süngkhümi pa aiter; par kor nisung gari aser talungtsü ola jagi ner jaratem anokshitsü.

¹¹Par kortem temupu agi ner yimdong ajak nung pai ajemshitsü, pai ne nübur nok agi tepsettsü, aser ner tashi tait tongshitem ali nung laotsü.

¹²Aser ne rongsen parnoki temakzükba kümdaktsütsü, aser ne shishilempaba rakzükraktemdaktsütsü; aser parnoki ne jaratem raksatsütsü, aser ne ki tajungtem samatsütsü; aser ner lung ner süngtsük, ner li parnoki tzü nung enoktsütsü.

¹³ Aser ne ken atenba ola ni anendaktsütsü; aser ne kongki ola joko mangashidaktsütsü.

¹⁴Aser ni na lungpakma tesa kümdaktsütsü zütsük putaka ayudakji na asütsü. Na joko meyanglutsütsü, kechiyong ni KIBUBAi aji jembizükogo, ta KIBUBA Tsüngremi ashir.”

¹⁵Yamai KIBUBA Tsüngremi Tair dang ashir, Kodang yirua aliba nüngdir, aser nenok rongnung tetepsetba adokdir, nenok laoba agi tzüküm linük manokshitsü ama?

¹⁶ Idangji tzüyim chuba ajak chuba menden nungi alutsü, aser parnoki sobutsü sepzüka ayutsü, aser noksa enokba süoshi luzüka ayutsü; parnoki parnok sasa tatenten agi sü abentsü; parnok ali nung amentsü, aser mapang shia atententsü, aser ne dak süngmangtsü.

¹⁷Aser pa asoshi parnoki mangyimba ken atentsü aser ne dang ashitsü, Oh nüngtugu yimti, na koda sama, aser tzüyim nungi mungui aküm, tzüyim manung na aser ne nübur tashi ita liasü, shirnoki ne tsüngken linük ajak nung tsübudakja liasü!

¹⁸Tang na laoba anogo nung asetkong linüktemi anokshir; tzüyim anasa asetkong linüktemi na süiba nung aoksa süngmanger.

¹⁹Kechiyong yamai KIBUBA Tsüngremi ashir; “Kodang ni na azüng azünga aliba yimti kümdaktsüdir, nisung maliba yimtitem mesüka, kodang ni tzüyim tarokji ne madaki arudaktsüdir, aser tzü tashi tului na nembangtsüdir.

²⁰Idangji alemli nisungtem dangi aser alima telunglen alemli nungi azüngmeyaka alidak kanglai alurtem den, oda ni melidaktsütsü asoshi kanglai airtem den nia na bener aludaktsütsü.

²¹ Ni na tesama kümdaktsütsü, aser na joko malitsü; na bushiaka, na tanaben joko kodanga mangutsü ta KIBUBA Tsüngremi ashir.”