Read njo EZEKIEL 27 Bible Online

EZEKIEL 27 - njo bible

EZEKIEL 27

¹ KIBUBA O tanaben kü dangi aru,

²“Tang na, nisung chir, Tair asoshi mang yimang;

³aser tzüyim süngkhüm lenmang nung amenba, tzüyim küm lima aikalen aliba nisungtem shishilempaba, Tair dang shiang, Yamai KIBUBA Tsüngremi ashir, Oh, Tair, nai shiogo, ni tabensa tobur tajung.

⁴Ne arrtsütem tzüyim tiyong nung lir, na yanglurtemi ne tobur ajungba abensatsüogo.

⁵Parnoki ne süngtsük ajak Senir nungi fir süng agi yanglu, parnoki na asoshi rong tongshi yanglutsü cedar süng Lebanon nungi bener ao.

⁶Bashan sülen süng agi ne rongitsü parnoki yanglu; Kittim asetkong nungi parnoki mitsüktsü süng nung shiti po amenoka atem yanglu.

⁷Ne rong aniba sü Ijip nunger noksa enokba kümpa sü tajung, oda aji na asoshi nisan liasü; Elisha asetkong nungi tanen aser nakrema meremba agi ne akhüm yanglua liasü.

⁸Sidon aser Arvad nung alirtem ne rongirtem liasü, Oh Tair, ne shisa akartem, ne dak liasü, ne rong anirtem parnok liasü.

⁹Gebal tamburtem aser yangji shisa akaba nisungtem ne dak ne rong menabangertem liasü. Tzüyim nung rong ajak anishirtem den ne dak ne shishilempaba melenteptsü liasü.

¹⁰Persia, Lud, aser Put nisungtem ne temeranger telok rongnung temeranger mapa tenzüka liasü, jong aser merang korang ne madak parnoki itaka ayu, parnoki ne sentsüwangshi adokdaktsü.

¹¹Arvad aser Helek jabasotemi meketa ne jara nüka liasü, aser Gammad nisungtem ne mitsa nung liasü; parnok ne jara meketa parnok jong itaka ayu, parnoki na tabensa tobur jungdaktsü.

¹²Ne rongsen jenti tapu ajak aliba yong Tarshisi ne den shishilemba; taribi, merang, tin aser shisa merang agi ne den melentepa shishi.

¹³Yavan, Tubal, aser Mesheki ne den shishitep; parnoki ne den nisung agi aser yongmen yin agi shishitep.

¹⁴Togarma kidongi ne den kor, raraba kor aser gado agi ne den shishitep.

¹⁵Dedan nisungtemi ne den shishitep; asetkong aika ne mapa nung liasü; shiti po aser ebony süng parnoki sempet bener arutsü.

¹⁶Ne rongsen angulen jenti alibayong Edomi ne den shishilemba asü, parnoki ne den emerald, nakrema meremba sentsü, noksa enokba mapa, kümpa sü tanük, koral aser agat senti lung agi shishitep.

¹⁷Yihuda aser Israel limai ne den shishi; parnoki Minnit nungi wheat tsük, mejajem, ninang mojitzü, totzü aser tanebtsü mozü agi shishitep.

¹⁸Ne rongsen tangulen jenti alibayong, aser ne rongsen jenti tapu ajak alibayong Damaskai ne den shishitep; pai ne den Helbon nungi yi aser tezüng temesüng agi shishilemba asü.

¹⁹Vedan aser Yabani ne den ang agi shishitep; merang terenem, süngshi, aser kalamus itemji ne shishilempaba rongnung liasü.

²⁰Dedani asangtsü asoshi kor terongdong nung alemba sü ne dang ayok.

²¹Arabia aser Kedar tongtipur ajak ne mapa nung liasü; parnoki ne dang san chanu, san tepung, aser nabong ayok.

²²Sheba aser Raamai ne den shishitep, parnoki ne den an menemtsü tapu ajak rongnung tajungtiba senti lung shishitep.

²³Haran, Kanne, aser Eden, Sheba, Ashur aser Kitrid ajaki ne den shishi;

²⁴parnoki ne den shishiba rongnung tanen aser noksa enoka yangluba talep talep, aser senti sobutsü süngden nung, lisü agi alener aser cedar süng agi yanglur ne dang ayok.

²⁵ Tarshis rongtemi ne shishilempaba aben. Yamaji na sünga aküm aser khu reta tzüyim tiyong nung aküm.

²⁶Ne rongirtemi na tzü tarok leni anir aru; anüdoklen mopungi tzüyim tiyong nung na raksatsü.

²⁷Ne rongsen, ne shishiba osettem, aser na shishilempaba, ne rongjurtem, ne rongirtem ne rong sentakertem, ne shishirtem, aser ajaklen ne temerangertem, oda ne dak aliba telok ajak, na laoba anogo nung tzüyim telungi aitsü.

²⁸Ne rongirtem ayimtenba ola agi, tzüküm anokshitsü.

²⁹Aser rongirtem aser rongjur ajak, aser tzüyim nung rongir ajak, parnok rong nungi alutsü, aser tzüküm nung noktaktsü;

³⁰parnoki ne madak ola angashidaktsütsü, aser kanga jebteptsü; parnoki pei kolak nung auyi paloktsü, aut nung parnok sasa mezüshitsü.

³¹Na asoshi parnok sasa ku südoktsü, aser anemsü abentsü; parnoki na asoshi temulungjang amsa-a kanga mang yima ajebtsü.

³²Aser parnok jebtepdang, parnoki mangyimba ken agi na asoshi mang yima ashitsü. Tzüyim tiyong nung ola madoki kümdaktsüba ama, Tair ama shiba lir?

³³Kodang ne shishilempaba tzüyim nungi ao, nai nisung jenti südaktsü, nai ne rongsen jenti aser ne shishilempaba agi alima chubatem takar kümdaktsü.

³⁴Tang na tzüyimi tzü tarok nung raksa, ne shishilempaba aser ne telok ajak ne madak tsük.

³⁵Asetkong nung alir ajaki ne tia ngua süngmanger, aser parnok chubatem tetsübutsüka aoksa-a lir, parnok tereprangtsü nung shisabulua lir.

³⁶Nisung rongnung shishirtemi na sensatsür, na tetsübutsü kümogo, aser joko na kodanga malitsü.