Read njo EZEKIEL 28 Bible Online

EZEKIEL 28 - njo bible

EZEKIEL 28

¹KIBUBA O kü dangi aru;

²“Nisung chir, Tair chuba dang shiang, yamai KIBUBA Tsüngremi ashir; kechiaser ne mulungjang asükümadok, aser nai ashir, ‘Ni tsüngrem ka lir, ni tsüngrem menden nung, tzüyim nung amener.’ Aji saka nai ne mulung nung Tsüngrem mesüka bilemaka, na nisung lir, Tsüngrem masü.

³Daniel dang nungi na shisa takaba asü? Ajiang, na nungi kecha miima maka.

⁴Ne shisatsü agi aser ne tangatetba agi nai ne rongsen bena aru, aser hon aser taribi ne terizüngdaki bena aru.

⁵Ne shisatsü tulu agi aser ne shishilempaba agi nai ne rongsen uludaktsü, aser rongsen alibayong na asükümdaktsü;

⁶anungji yamai KIBUBA Tsüngremi ashir, nai ne mulung nung tsüngrem ama kümdaktsü nung,

⁷ajiang, ni ne dangi bendanger tesashi kintem anir arutsü; aser parnoki ne shisatsü tobur ajungba anema parnok nok mekangtsü, aser ne mera aketba sentsü parnoki raksatsütsü.

⁸Parnoki na kanglai anizüktsü aser tzüyim tiyong nung parnoki na lendong ajanga tepsettsü.

⁹Na tepseter madang ano nai, Ni tsüngrem ta shidi ma? Saka yirudaktsüba ket nung na nisung chir dang, tsüngrembo masü.

¹⁰Bendanger ket agi memejeptokba pur tasüba agi na asütsü; kechiyong aji ni jembizükogo, ta KIBUBA Tsüngremi ashir.”

¹¹Ano KIBUBA O kü dangi aru,

¹²“Nisung chir, Tair chuba asoshi mangyimba ken ka bena arung, aser pa dang shiang, yamai KIBUBA Tsüngremi ashir; na teperiba temaitsü, shisatsü agi sünga, tabensa tobur tajung liasü.

¹³Na Tsüngrem tsüki, Eden nung liasü, sentilung shia agi na yangbanga liasü, perem, topaz, diamon, beryl, oniks, jasper, sapfir, emerald, aser garnet: aser ne süoshi nung hon tajung rongsen liasü; na yangluba anogo nung itemji renema liasü.

¹⁴Awabanga aliba mezüja shimtetba cherubji na liasü, aser ni na yutsü anungji Tsüngrem temeshi tenem nung na liasü; mi lung rongnung na tuli aluli ta jaja.

¹⁵Na yangluba anogo nungi, ne dak memeshiba mangu tashi, na pei lenmang nung tabensa liasü.

¹⁶Ne shishilempaba uluba ajanga ne teka yitepba agi süngdaktsü, aser nai temenen mena; anungji Tsüngrem tenem nungi ni na temenendok ama aridok; aser na wabanga aliba cherubi na mi lung rongnungi aridok.

¹⁷Na tobur ajungbayong na asükümadok: na meraketa aliba agi ne shisatsü tamajung kümdaktsü; ni na ali nung ondaktsü, chubatemi reprangtsüsa ni parnok madang toktsü.

¹⁸Ne temenen menaba jenti agi aser na shishilempaba nung ochi mashiba nung nai temeshidak menentsüogo; anungji na nungi ni mi adokdaktsü; iba jagi na meyok, aser shirnoki na repranger, parnok ajaki ngua ni na alima nung aut kümdaktsü.

¹⁹Shirnoki nisung rongnung na metet, parnoki na ngua bangkatsü, na tesamatsü küma lir, aser joko na kodanga malitsü.”

²⁰ KIBUBA O kü dangi aru,

²¹“Nisung chir, ne tejak Sidon tsütsü shiang, aser iba anema shin o jembiang,

²²aser shiang, yamai KIBUBA Tsüngremi ashir. Ajiang, ni na anema lir. Oh Sidon, aser ne dak ni sentsüwangshitsü; aser kodang ni la o bendangdir aser pila-a meshiteta lidir, parnoki ni KIBUBA ta metettsü.

²³Kechiyong ni la dangi tashitak wara aser azü lar yimdong nung yoktsü; aser zübu aketer la madak ajaklen nok yur, o bendangtsü; aser parnoki ni KIBUBA ta metettsü.

²⁴Aser joko Israel kidong asoshi tatutsü ai kecha malitsü, mesüra parnok meketa ajaklen tatalatsür nisungtem rongnung tetupoktsü ai malitsü.”

²⁵Yamai KIBUBA Tsüngremi ashir, “Kodang ni Israel kidong, shirnok prokshia ali parnok anitendir, aser parnok dak kintemi ngua meshiteta lidir, idangji ni Yakob nem agütsüba parnok li nung parnok alitsü;

²⁶parnok iba nung kümzüka alitsü, hau, parnoki ki yanglutsü, aser tsükmenatzü tsüki atsütsü, aser parnok meketa aliba parnok dang sensatsür ajak madang o bendanger külen parnok kümzüka alitsü; aser parnoki ni KIBUBA parnok Tsüngrem ta metettsü.”