Read njo EZEKIEL 29 Bible Online

EZEKIEL 29 - njo bible

EZEKIEL 29

¹ Küm terbuba, ita terbuba, anogo teranabuba nung, KIBUBA O kü dangi aru;

²“Nisung chir, Ijip chuba Farao anema ne tejak shiang; aser pa anema, aser Ijip ajak anema shinang.

³Jembiang, aser shiang, Yamai KIBUBA Tsüngremi ashir: Ajiang, ni na anema lir, Oh Ijip chuba Farao, molu tzürang ayong tiyong nung aliba, shibai Kü ayong Nile kü meyong lir, ni atema ni yanglu ta ashir.

⁴Ne teküm nung poroki enoktsütsü, aser ne ayong nung aliba angotemi, ne tip nung jangtena lidaktsütsü; aser ne tip nung jangtena aliba ne ayong tiyong nungi agitettsü.

⁵Aser ni na, aser ne ayong nung aliba ango ajak, arem nung endoka toktsütsü; na moapu tesa nung tsüktsü; na külemi meshitentsü mesüra mebententsü; ni na alima shiruru nem aser anüng ozü nem chiyungtsü asoshi agütsüogo.

⁶ Idangji Ijip nung alir ajaki, ni KIBUBA ta metettsü, kechiaser na Israel kidong madang, parnok tzütok mechi ama lia arur.

⁷Kodang parnoki ne dak teka agi amet, na süktang, aser parnok tapubang ajak shisatsü; aser kodang parnoki ne dak metalok, na süktang, aser parnok teperem anokshidaktsü.”

⁸Anungji KIBUBA Tsüngremi ashir; “Ajiang, ni ne madak nok ka bener arur, aser na nungi nisung aser arem shiruru leptoktsütsü.

⁹Aser Ijip linükji azüngmeyakdak aser sendoka endokba ka akümtsü; aser parnoki ni KIBUBA ta metettsü, kechiaser pai ashi, Nileji kü meyong, aser aji ni yanglu.

¹⁰Anungji ajiang, ni na anema aser ayongtem anema lir, aser Ijip linükji Migdol nungi Syene tashi oda Ethiopia arrtsü tashi khenyongi sentokadokba aser azüngmeyakdak kümdaktsütsü.

¹¹Nisung shinga tetsüng agi ajanga maotsü, mesüra shiruru tetsüng kecha agia aji ajanga maotsü, mesüra küm lir tashi iba nung kecha malitsü.

¹²Aser Ijip linükji azüngmeyakdak kümdaktsüba linük rongnung azüngmeyaka kümdaktsütsü; aser lar yimtitem azüngmeyaka aliba yimtitem rongnung küm lir azüngmeyaka alitsü. Ni Ijip nungertem kintem rongnung prokshidaktsütsü aser parnok linüktem ajanga prokshitsü.”

¹³Kechiyong yamai KIBUBA Tsüngremi ashir; “Küm lir tatem nung ni Ijip nunger kolensa prokshidakja ali, nisungtem nung anitentsü.

¹⁴Aser ni Ijip tia tanaben yanglushitsütsü, aser Pathros linüki, par soyimi meyipa odaktsütsü, aser idakji parnok tekübok chuba yimli ka kümdaktsütsü.

¹⁵Chuba yimli ajak rongnung aji teküboktiba alitsü, mesüra aji kintem madak temabai joko majungkettsütsü; aser joko kintem madak parnoki yimsü mesüdaktsütsü asoshi ni parnok ajemdaktsütsü.

¹⁶Joko Israel kidongi Ijip dak temulung lema, parnok dangi meyipa temenen menaba bilemteta malitsü, aser parnoki ni KIBUBA Tsüngrem ta metettsü.”

¹⁷Küm metsür-tenetbuba mezüngbuba ita, anogo mezüngnü KIBUBA O kü dangi aru:

¹⁸“Nisung chir, Babilon chuba Nebukadnezzar Tair anema par temeranger telok nem mapa tuluka tenzükdaktsüogo; tekolak shia lemtsü kümdaktsü, aser tapubang shia ajoktoka tesalang kümdaktsü, aji saka pa mesüra par temeranger teloki Tair koba anema raratsü apuso, iba mapa asoshi, iba nungi kecha taa mangu.

¹⁹Anungji yamai KIBUBA Tsüngremi ashir, Ajiang, ni Babilon chuba Nebukadnezzar nem Ijip lima agütsütsü, pai par telok bener oadoktsü, aser par terakzükba osettem agitsü, aser aji tetepsettsü agitsü; aji pa temeranger telok asoshi taa alitsü.

²⁰Pai tenzükba asoshi pai inyakba taa ama ni pa nem Ijip linük agütsüogo, kechiaser parnoki ni asoshi inyak ta KIBUBA Tsüngremi ashir.

²¹“Iba anogo nung ni Israel kidong nungi tezü ka adokdaktsütsü, aser ni parnok rongnung nenok satema jembidaktsütsü, aser parnoki ni KIBUBA ta metettsü.”