Read njo EZEKIEL 3 Bible Online

EZEKIEL 3 - njo bible

EZEKIEL 3

¹ Pai kü dang ashi, “Nisung chir, nai angubaji chiang; iba talep chiang, aser oang, Israel kidong dang jembiang.”

²Anungji ni kü bang lapok, aser pai talepji kü nem chidaktsü.

³Pai kü dang ashi, “Nisung chir, ni ne nem agütsüba talep ya chiang aser ne pok süngdakjang.” Anungji ni aji achi, aser aji kü bang nung ninang mojitzü ama tanang liasü.

⁴Pai kü dang ashi, “Nisung chir, oang, na Israel kidong dangi oang, aser kü otem agi parnok dang jembiang.

⁵Kechiyong oshi tasak aser bendanger oshi ka dangi na yok masü, saka Israel kidong dangi yoker;

⁶nai mangatettsüba oshi tasak aser kin aika dangi meyok. Na parnok dangi yok asübo atangji parnoki ne dang angala.

⁷Saka Israel kidongi angaka mangaka nai parnok dang kü o jembiang; kechiyong Israel kidong ajak tejak taret aser temulungjang temerang.

⁸Ajiang, ni ne tejak parnok tejak anema temerang kümdaktsü, aser ne tenütsü parnok tenütsü anema temerang kümdaktsüogo.

⁹Lungkerak dang nungi temerangba lung ama ni ne tenütsü kümdaktsüogo; parnok tashi mangaba kidong saka parnok tetsübu, mesüra parnok nükrang nung aoksa-a teli.”

¹⁰Ano pai kü dang ashi, “Nisung chir, ni ne dang ashitsüba o ajak ne mulungjang nung agizükang, aser tenarong agi angashiang.

¹¹Aser oang, ne nübur chirtem dang jembiang, aser parnok dang, parnoki anga-aka manga-aka, ‘Yamai KIBUBAi ashi’ ta shiang.”

¹²Idangji tanelai ni ajungket, aser kü sülen ni nanüng ola tulu ka agi, KIBUBA talidak nungi pa sentsüwangshi temoatsüba sang ta ashiba ni angashi.

¹³Taküm aliba shiruru kati ka dak kongshidang adokba ola, aser item anasa talongtsü tetsüng ola, oda nanüng ola tululu ni angashi.

¹⁴Yamaji tanelai ni ajungket aser bener oadok; aser ni kü nela jashiseta ain adoka ao, aser KIBUBA teka kü madak tashi ita liasü.

¹⁵Aser Telahib nung alir tepuokba nisungtem, Kebar ayong anasa parnok alidaki aru, aser parnok den yangji anogo tenet süngmangseta ni mena ali.

¹⁶Anogo tenet lir külen KIBUBA O kü dangi oda aru,

¹⁷“Nisung chir, ni na Israel kidong madak mitkar kümdaktsü; anungji kü o angang, aser parnok nem ni nungi tekümdangtsü agüjang.

¹⁸Tamajunger dang, ‘Atangji na asütsü’ ta ni shira, aser nai pa dang tekümdangtsü magütsüra pa taküm kümzüktsü asoshi nai pa lenmang tamajung nungi tekümdangtsü meshira, iba tamajung nisung pa tai nung asütsü; saka pa zü ni ne ket nungi akangtsü.

¹⁹Aji saka nai tamajunger nem tekümdangtsü agütsüra, aser na tamajungba nungi mesüra pa tamajung lenmang nungi memeyipra, pa pei temenen nung asütsü; saka nabo pei tanela kümzükogo.

²⁰Ano, kodang temeshi nisung pei temeshiba nungi meyipa tai temenen benshidir, aser pa jakdang temetsüdaktsü ka ni yutsüra, pabo asütsü; kechiaser nai pa nem tekümdangtsü magütsü, pai pei menen nung asütsü, aser pa temeshi mapatem koba pai inyak aji mebilemtettsü; saka pa zü ni ne ket nungi akangtsü.

²¹Aji saka, nai temeshi nisung dang pai temenen memenatsüsa tekümdangtsü agütsüra, aser pai temenen mebenshira, atangji pa taküm alitsü, kechiaser pai tekümdangtsü ashiba o anga, aser nai pei tanela kümzükogo.”

²²KIBUBA teka kü madak liasü, aser pai kü dang ashi, “Aramesoang, lenten jagi iang, aser yangji ni ne den jembitsü.”

²³Idangji ni arameso, aser lenten jagi ai; aser ajiang, KIBUBA sentsüwangshi, ni Kebar ayong anasa anguba ama kü madang noktak aser ni kü tejak rembanga lao.

²⁴Idangji tanela kü daki ai, aser kü tsüng agi noktaka yutsü; aser pai kü den jembi, aser kü dang ashi, “Oang, ne kidang kilung nung ne sasa shibangang.”

²⁵Saka na nisung chir, ajiang, parnoki ne madak teka asangtsü, aser item jagi na alentsü, aser parnok rongnung muotettsü;

²⁶aser ne temeli tatsük kümdaktsütsü aser parnok sensamasa masütsü asoshi ne meli tawa nung menaloktsütsü; kechiyong parnok tashi mangaba kidong lir.

²⁷Saka kodang ni ne den jembidir, ni ne bang lapoktsütsü aser nai parnok dang ashitsü, “Yamai KIBUBA Tsüngremi ashir. “Shibai angashir, pai angadakjang; aser shibai manganür, pa nem tangadaktsü; kechiyong parnok tashi mangaba kidong lir.