Read njo EZEKIEL 30 Bible Online

EZEKIEL 30 - njo bible

EZEKIEL 30

¹ KIBUBA O tanaben kü dangi aru;

²Nisung chir, shinang, aser shiang, yamai KIBUBA Tsüngremi ashir, Jebang, Aiatai, tanü ya!

³Kechiyong anogo tatonger, KIBUBA anogo tatonger; mepet asüba anogo, kintem asoshi tesamatsü mapang alitsü.

⁴Aser Ijip madak nok arutsü, aser kodang Ijip nung tetepsetba laodir, Ethiopia nung tejashi alitsü, aser parnok par telokti bener oadoktsü, aser par kimung raksatsütsü.

⁵Ethiopia aser Put, Lud aser Arabia nunger ajak aser Libia aser parnok den külemi alirtem parnok ajak nok agi laotsü.

⁶Yamai KIBUBAi ashir, Shirnoki Ijip ajungketer parnoka laotsü, aser la tashi indang asü akümbaji laotsü, Syene Migdol nungi nok agi laotsü, ta KIBUBA Tsüngremi ashir.

⁷Aser azüngmeyaka aliba linük rongnung, parnok azüngmeyaka akümtsü, aser par yimtitem sendoka tokja, aliba yimti rongnung alitsü.

⁸Aser kodang ni Ijip nung mi senoktsüdir, aser pa yarir ajak samatsüdir, parnoki ni KIBUBA lir ta metettsü.

⁹“Iba anogo nung, mekümdangi aliba Ethiopia madaki aoksatsütsü asoshi kü madang nungi rong nung osang abenertem aotsü; aser Ijip anogo nung ama, parnok madak tekangshitsü alitsü, kechiyong angang, aji arudar.”

¹⁰Yamai KIBUBA Tsüngremi ashir; Babilon chuba Nebukadnezzar ket agi, Ijip teloki ni tatem kümdaktsütsü.

¹¹Pa aser pa nübur pa den, kin rongnung tesashitiba, linükji samatsütsü anir arutsü; aser Ijip anema parnoki nok bena arutsü, aser tetepsetba agi linük süngdaktsütsü.

¹²Aser ni ayongtem kongkonga kümdaktsütsü, aser alimaji nisung tamajunger ket nung yokadoktsü; alima aser iba nung aliba ajak, ni bendanger ket agi azüngmeyaka toktsütsü, ni KIBUBAi ya jembiogo.

¹³Yamai KIBUBA Tsüngremi ashir; ni ano süngyanglutem samatsütsü, aser ni Nemfir nungi süngyanglu noksatem tatem kümdaktsütsü. Aser Ijip lima nung kodanga chuba chir malitsü; aser ni Ijip nung tetsübutsü enoktsütsü.

¹⁴Ni Pathros azüngmeyaka kümdaktsütsü, Zoan nung mi senoktsütsü, aser Thebes nung o bendangtsü.

¹⁵Pelusium madak kü ain adokba meküploktsütsü; tashi tait Ijip, aser Thebes telok lepdoktsü.

¹⁶Ni Ijip nung mi senoktsütsü; Pelusium tekangshi tulu nung alitsü, aser Thebes raksadoktsü; aser iba jaratem raksa-a laotsü.

¹⁷On aser Pibeset asangurtem nok agi laotsü; aser item yimti tepuokdaki aotsü.

¹⁸Kodang ni Ijip yimsüsüba raksatsüdir, Tehafnehes nung ano anogoji tammang alitsü, aser la asü akümba tashi tatembang akümtsü, la asoshibo, mepet kati la akhümbangtsü, aser lar jalatem tepuokdaki aotsü.

¹⁹Yamaji ni Ijip nung obendangtsü aser parnoki ni KIBUBA ta metettsü.

²⁰Küm terkabuba, ita mezüngbuba, anogo tenetbuba nung, KIBUBA O kü dangi aru;

²¹“Nisung chir, ni Ijip chuba Farao tepen raksatsüogo; aser angang, tashi teperi ita nok amtsü asoshi tepen maleptsü, tanebtsü mozü manütsü komo sü agi menaitsü.

²²Anungji KIBUBA Tsüngremi ashir, Ajiang ni Ijip chuba Farao anema lir, aser tepen, tashi taitlenji aser teraksalenjia raksatsütsü, ni nokji pa ket nungi tsükdaktsütsü.

²³Aser ni Ijip nungertem kin rongnung prokshidaktsütsü, aser linüktem ajanga senshidaktsütsü.

²⁴Aser Babilon chuba tepen ni tashi itshidaktsütsü, aser kü nok pa ket nung yutsütsü; saka ni Farao tepen raksatsütsü, aser pai pa tsüngdang tasütsü yiruba nisung anüngba ama anüngtsü.

²⁵Aser ni Babilon chuba tepen mesotsü, aser Farao tepen aludaktsütsü, aser kodang ni Babilon chuba ket nung kü nok yutsüdir, parnoki ni KIBUBA ta metettsü, aser pai aji Ijip lima madak mekangtsü.

²⁶Aser kin rongnung ni Ijip nunger prokshidaktsütsü, aser linük ajonga nung jenshidaktsütsü, aser parnoki ni KIBUBA ta metettsü.”