Read njo EZEKIEL 31 Bible Online

EZEKIEL 31 - njo bible

EZEKIEL 31

¹Küm terkabuba, ita tasembuba, anogo mezüngnü, KIBUBA O kü dangi aru.

²Nisung chir, Ijip chuba Farao aser par telokti dang shiang, na uluba nung na shiba mesüka lir?

³Ajiang, Asiria nungerji Lebanon nung, cedar süng, kongsang tobur tajung, akhüm agütsüba süngsang, aser tar talang, aser pa süngkolak mepet rongnung lir.

⁴Tzütemi ibaji mesü, taroki aji meidaktsü: la ayongtem la tema alidak meketa ayimer; aser lai moapu süngdong ajak dangi ayongnutem yoker.

⁵Anungji moapu nung süngdong ajak dang nungi ibaji tar talangba liasü; aser iba kongsang jenti küma liasü, tzü jenti ayimba agi süngsangji talang aküm.

⁶Anüng ozütem ajaki parnok tesep, iba kongsang nung yanglu, aser iba süngsang kübok moapu shiruru ajaki, pei techanu meputsü, aser iba akhümbok nung kin tulutem ajak ali.

⁷Iba süngsang talang den, uluba nung tobur junga liasü; kechiyong iba teratem tzü jenti anasa lua liasü.

⁸ Tsüngrem tsüki nung cedar süngdongtemi, aji nembangtsü makok; fir süngdongtem iba kongsang ama maliasü, aser süngsadong süngdongtem iba, süngjang ama maliasü; mesüra Tsüngrem tsüki nung, süngdong kecha iba ama tobur ajung maliasü.

⁹Süngsang jenti agi ni aji tobur jungdaktsü; anungji Eden tsüki süngdongtem, Tsüngrem tsüki nung aliba ajaki aji nükshi.

¹⁰Anungji KIBUBA Tsüngremi yamai ashir, “Ibai tar talang kümdaktsü, aser mepet rongnung süngkolaki tudaktsü, aser iba tar alangba asoshi asüakümba yong,

¹¹ni pa kin rongnung tashi tuluba ket nung bendanga agütsütsü; atangji pai pa sayangtsütsü; pa majungba asoshi ni pa aridok.

¹²Aser Bendangertem, kin rongnung tetsübutsü, parnoki aji leptokadokja lir, tenem manung aser lenten nung iba süngsangtem tsüka lir, aser iba kongsangtem ali nung tzü ayimba lenmang ajak agi raksadakja lir; aser alima nisung ajak iba akhüm nungi luadokogo, aser toktsüogo.”

¹³Iba teraksa manung, anüng ozü ajak amungtsü, aser moapu shiruru ajak, iba kongsang manung alitsü.

¹⁴Oda tzü agi mesüa aliba süngdongtem kecha temalen parnok sasa moulutsü, mesüra süngkolak mepet tonga matutsü, aser tzü nungi mesüa aliba süngdongtem kechaia tar talang agi matiteptsü asoshi; kechiyong parnok ajak tasütsü bendanga agütsü, meimchir rongnung ali telungleni, shirnok kanglai alur parnok den ludaktsütsü bendanga agütsütsü.

¹⁵“Yamai KIBUBA Tsüngremi ashir. Pa Sheoli aluba anogo nung ni mangyimtsü ka adokdaktsü; iba asoshi ni tarok nembangtsü, iba tzü noktangtsü aser tzü tulutemji noktangadoktsü aser pa asoshi ni Lebanon mang yimdaktsütsü, aser moapu nung süngdong ajak pa asoshi lula-a akümtsü.

¹⁶Kodang ni pa kanglai alurtem den Sheoli yok, pa laoba ola agi kintem anokshidaktsü. Aser Eden süngdong ajak, teshimtet aser tajungtiba Lebanon süngdongtem, tzü agi mesüa aliba ajak, alima telunglen sünepa alitsü.

¹⁷Shirnok nok agi tepset parnoka iba den Sheoli alutsü, Hau, kintem shirnok iba kübok nung ali parnok samatsü.

¹⁸“Eden süngdong rongnung sentsüwangshi nung aser uluba nung yamai shiba den na mesüktepa lir? Aji saka Eden süngdongtem den alima telungleni na anizüktsü; nok agi tepsetertem den, memejeptokertem den na ontaka alitsü, Ibai Farao aser par telokti ajak, ta KIBUBA Tsüngremi ashir.”