Read njo EZEKIEL 32 Bible Online

EZEKIEL 32 - njo bible

EZEKIEL 32

¹Küm teranabuba ita teranabuba anogo mezüng nü, KIBUBA O kü dangi aru;

²Nisung chir, Ijip chuba Farao asoshi mangyimba ken ka bena arung aser pa dang shiang. Nai na kintem rongnung molusongzü ka mesüka bilemer; aji saka nabo tzüyim nung molu tzürang ka-ang mesüka lir, ne teni telung nungi tashi agi tzü yimdaktsür, ne tetsüngi tzü arakzüdaktsür aser par ayongtem menentsür.

³KIBUBA Tsüngremi yamai ashir, nisung telok jenti dena, ni ne dak sang amungloktsütsü, aser parnoki na kü sang nung anitettsü.

⁴Aser ni na ali nung toktsütsü, ni na moapu tesa nung endokadoktsü, aser anüng ozütemi ne dak metemdaktsütsü, aser alima shiruru ajonga na agi tiptemdaktsütsü.

⁵Aser ne shi ni tenem manung toktsütsü, aser ne tasümang agi lenten süngdaktsütsü.

⁶Ne zü ayimba agi ni alima, tenladak oda tenem tashi tenladaktsütsü, aser na agi ongken tarok süngdaktsütsü.

⁷ Kodang ni na remdaktsüdir, ni anüng nembangtsütsü, aser yangji aliba petinutem tammang kümdaktsütsü; mepet agi ni anü nembangadoktsütsü; itai pei tesangwa mayatsü.

⁸Aser anüng nung sentsüprang tesangwa ajak, ni ne madak tammang kümdaktsütsü, aser ne linük madak ammang kümdaktsütsü, ta KIBUBA Tsüngremi ashir.

⁹Kodang kin rongnung, nenoki memetetba linük nung nenok tesamatsü ni adokdaktsüdir, ni nisung jenti temulungjang makmakshishidaktsütsü.

¹⁰Hau, ni nisung jenti ne dak süngmangdaktsütsü, aser kodang kü nok parnok madang mekangdir, parnok chubatemi na asoshi kanga tsübua alitsü; aser na laoba anogo nung nisung shia pei taküm asoshi parnoki atententsü.

¹¹Kechiyong KIBUBA Tsüngremi yamai ashir, “Babilon chuba nok ne madaki arutsü.

¹²Temeranger noktem agi ne telokti ni laodaktsütsü, parnok ajak kintem tetsübutsü lir; Ijip asüakümba parnoki raksatsütsü, aser yangji telok ajak samatsütsü.

¹³Tzü jenti alidak nungi shiruru ajak ni ano samatsütsü. Nisung tetsüngi süshia, shiruru tetsüngi süshia tanaben item memenendaktsütsü.

¹⁴Idangji ni parnok tzü, totzü ama süsüa mayim tashi süngjemdaktsütsü” ta KIBUBA Tsüngremi ashir.

¹⁵“Kodang ni Ijip lima azüngmeyaka aser teraksa nung toktsüdir, aser yangji sünga aliba ajak azüngteta kümdaktsüdir, kodang yangji alir ajak ni tepsetdir, idangji parnoki ni KIBUBA ta metettsü.”

¹⁶Ibai mangyim ken parnoki atentsüba ken lir; kintem jalatemi iba agi mangyim ken atentsü; kechiyong Ijip, aser lar telokti ajak madak, parnoki mangyim ken atentsü, ta KIBUBAi ashir.

¹⁷Küm teranabuba ita mezüngbuba anogo terpungububa nung KIBUBA O kü dangi aru,

¹⁸“Nisung chir Ijip telokti asoshi jebtepang, aser iba mangyimba ken den parnok, na aser nüngtugu kin jalatem, teküboklen aliba limai, kanglai alurtem den yokang:

¹⁹tobur ajungba nung ne den temetemdangtsü meliaka, luang, aser memejeptoker den liang.

²⁰Nok agi tepseter rongnung parnok laotsü, la nok nem bendanga agüja lir; la aser lar telok ajak atsütokang.

²¹Sheol nungi temeranger tulutibatemi pa aser pa yarirtem indang jembitsü; parnok alua, memejeptokba pur den, nok agi tepsetba pur rongnung alir.

²²“Asiria aser pa medemer ajak yangji lir, pa lepertem pa meketa lir; parnok ajak tepseta, nok agi laodakja lir;

²³parnok lepertem kangla tatem banglak nung yanglua lir, aser pa medemertem pa lep meketa lir, koba agi akümlir lima nung tetsübutsü adokdaktsü.

²⁴“Elam aser lar teloki la lep meketa lir, parnok ajak tepseta, nok agi laoa lir, memejeptoki alima telunglen lua lir, shirnoki akümlir lima nung tetsübutsü adokdaktsü, aser kanglai alurtem den parnok maksü khu bena lir.

²⁵Tepseta alir rongnung la asoshi yipten ka yanglua liasü aser la meketa lar telokti ajak lir; parnok ajak memejeptok, nok agi tepseta liasü; kechiyong akümlir lima nung parnoki tetsübutsü kümdaktsü, aser kanglai alur rongnung parnoki parnok maksü khu aben, tepseta alir parnok rongnung pa tokja lir.

²⁶“Meshek aser Tubal, aser telokti ajak yangji lir, parnok lep meketa par telokti ajak lir, parnok ajak memejeptok, nok agi tepsetba, kechiyong akümlir lima nung tetsübutsü adokdaktsü.

²⁷Laoa aliba memejeptokba temerangertem, shirnok raraba nok o nü den asüyimi lua lir, aser par nok parnok kolak kübok lir, parnok den parnok memejangtsü aser parnok tai menaba parnok teret madak alitsü; kechiyong parnok tashi tulu tetsübutsü akümlir lima nung liasü.

²⁸Saka memejeptoker rongnung na raksatsütsü, aser nok agi tepsetertem den alitsü.

²⁹“Edom, lar chubatem aser lar tongtipur ajak lir, shirnok parnok tashi ajak asoshi nok agi tepseter den tokja lir; memejeptokertem den, aser kanglai alurtem den alitsü.

³⁰“Anüdoklentip tongtipur ajak, aser Sidon nunger ajak yangji lir, parnok tetepsetertem den, parnoki tetsübutsü adokdaktsüba ajak atema parnok akseta lir, aser parnok nok agi tepsetba memejeptokertem den lir, aser kanglai alurtem den parnok maksü khu bena lir.

³¹Kodang Faraoi parnok angu aser par teloki ajak madak temulung süngzüktsü; oda Farao aser par temeranger telok ajak nok agi tepseta lir, ta KIBUBA Tsüngremi ashir.

³²Kechiyong akümlir lima nung pai tetsübutsü adokdaktsü, memejeptoker rongnung, nok agi tepsetertem den pa alitsü ta KIBUBA Tsüngremi ashir.”