Read njo EZEKIEL 33 Bible Online

EZEKIEL 33 - njo bible

EZEKIEL 33

¹KIBUBA O kü dangi aru,

²“Nisung chir, ne nübur chirtem dang jembiang, aser parnok dang shiang. Kodang linük madaki ni nok bener arudir, linük nüburtemi parnok rongnungi nisung kar agia, mitkar sa pa yutsüra;

³kodang linük madak nok aruba pai ngur, pa jangzü apua nüburtem dang tekümdangtsü shira,

⁴idangji shibaisa jangzü ola angashir, saka kümdanga melilir, nok arua pa bener ora, pa züji pa tekolak manung alitsü.

⁵Pai jangzü ola angashi, aser saksalema maliasü; pa zü pa madak alitsü; pai saksalema aliasübo pai taküm kümzüker lila.

⁶Saka mitkari nok aruba ngur jangzü mapura aser nüburtem saksalema alitsü meshira, aser nok arua, parnok rongnungi nisung kar bener ora, pa pei tai menaba asoshi bener oa lir, saka pa zü ni mitkar ket nungi akhangtsü.

⁷“Anungji na, nisung chir, Israel kidong madak ni na mitkar kümdaktsür; anungji kü bang nungi kü o angang, aser parnok nem ni nungi tekümdangtsü agüjang.

⁸Jakla tamajunger dang, Oh jakla tamajung nisung, atangji na asütsü, ta ni shira, aser jakla tamajung nisung dangji pa pei lenmang nungi meyiptsü nai kecha meshira, jakla tamajung nisungji pei tai menaba asoshi asütsü, saka pa zü ni ne ket nungi akangtsü.

⁹Aji saka, nai jakla tamajung nisung dang pa lenmang tamajung nungi meyiptsü kümdanga alitsü shira, aser pai pei lenmang nungi memeyipra; pa pei tai menaba nung asütsü, saka nai ne taküm kümzükogo.”

¹⁰Tang na, nisung chir, Israel kidong dang shiang; Yamai nenoki ashir, “Atangji onok ozüng raksaba aser onok temenen onok madak lir, aser iba asoshi onok lurepa odagi; ajangla asenok koda taküm alitsü?

¹¹Parnok dang shiang, ni taküm ali nungji jakla tamajunger asüba nung ni tepela mali; saka jakla tamajunger pei lenmang nungi meyiper aliba nung nenok meyipang, nenok jakla tamajung lenmang nungi meyipang; kechiba nenok asütsü? ta KIBUBA Tsüngremi ashir.

¹²“Aser na, nisung chir, ne nübur chirtem dang shiang, Temeshi nisung temeshiba agi na ozüng raksaba anogo nung mekümzüktsü; aser jakla tamajung nisung jakla majungba agi, pa jakla majungba nungi kodang meyipdir iba anogo nung pa melaodaktsütsü. Temeshi nisung pa kodang temenen nung tsükdir iba anogo nung pa temeshiba agi pa kümzüktsü makoktsü.

¹³Temeshi nisung dang atangji na taküm alitsü ta shira, pa pei temeshiba nung temulung lemra, aser tai menara, pa temeshi mapa kecha mebilemtettsü, saka pai menaba tai asoshi pa asütsü.

¹⁴Tanaben ni jakla tamajung nisung dang, atangji na asütsü ta kodang shidir, pai pei temenen nungi meyipra, aser kechi tim ozüng aser shitak aji inyakra,

¹⁵jakla tamajung nisung jagi tenangzükba yanglushira, rakzükraktemba meyipa agütsüra, tenteta akaba ozüng nung jajara, tai kecha memenara, atangji pa taküm alitsü pa masütsü.

¹⁶Pai menatenba temenen kecha pa anema mebilemtettsü; kechi tim ozüng aser shitak lir aji pai inyaker; atangji pa taküm alitsü.

¹⁷“Aji saka ne nüburi ashir, KIBUBA lenmang ochi masü, saka parnok lenmangji ochi masü.

¹⁸Kodang temeshi nisungi pa temeshiba nungi meyipdir, aser tai menadir, iba asoshi pa asütsü.

¹⁹Kodang jakla tamajung nisungi pei jakla tamajung nungi meyipdir, aser kechi tim ozüng aser shitak lir aji benshidir, pa iba jagi taküm alitsü.

²⁰Aji saka nenoki ashir, KIBUBAi kasasa mebenshir. Oh Israel kidong, ni nenok nisung shia pei mapa agi o bendangtsü.”

²¹ Aser onok puokba teranabuba küm nung, ita terbuba anogo pungunübuba nung Yirusalem nungi jenbua aoba nisung kar kü dangi arua ashi, “Yimtiji laogo.”

²²Tang yimjenertem atongtsü konung lia KIBUBA teka kü madak liasü; saka anepdang nisungba jagi ni atongba mapang nungjisa pai kü bang lapoktsür liasü; kü bang lapoktsür alidang joko ni suwar ama mali asü.

²³KIBUBA O kü dangi shia aru,

²⁴“Nisung chir, Israel teraksa lima nung alirtemi maneni ashir, Abraham nisung ka dang liasü, aser pai linükji amanga liasü; saka asenokbo aika, asenoki amangtsü asoshi linükji asenok nem agüja lir.

²⁵“Anungji parnok dang shiang, Yamai KIBUBA Tsüngremi ashir, Nenoki shi nung azü dena achir, aser nenok tenük süngyanglu dangi rangloktsür, aser azü tokshi; aser nenoki linükji amangtsü asü?

²⁶Nenoki nenok nok nung noktaker, nenoki tesempatsü inyaker, aser nenoki nisung shiai pei kiyonger kinungtsü menendaktsür, ajangla nenoki linükji amangdi ma?

²⁷Yamai nai parnok dang ashitsüla, yamai KIBUBA Tsüngremi ashir; ni azüngashia shidi, teraksa linük nung alirtemji nok agi laotsü, aser shiba moapu nung lidir pa ni arem shiruru nem meyokdaktsütsü, aser shirnok mitsa nung aser lungpok nung lidir tashitak wara agi asütsü.

²⁸Aser ni linükji azüngmeyakdak aser tesüngmangtsü kümdaktsütsü, aser pa asüakümba tashi anendaktsütsü, aser Israel tenemtem shingai ajanga maotsüsa azüngmeyaka alitsü.

²⁹Parnoki inyaka aliba tesempatsü ajak atema, kodang ni linükji azüngmeyakdak aser tesüngmangtsü ka kümdaktsüdir, idangji parnoki ni KIBUBA ta metettsü.

³⁰“Na asoshibo, Oh nisung chir, ne nüburi ne indang jara anasa aser ki kishi nung, aser kati ka dang, nisung shiai pei adianu dang ashir, ‘Arung, ni ne dang mepishir, KIBUBA nungi kechi o adokdir angang.’

³¹Aser parnok kü nübur ama ne dangi arur, kü nübur parnok ne madang amener, aser parnoki ne otem angashir, saka itemji parnoki meinyaker; kechiyong parnok tebang agi parnoki temeim tulu sayur, saka parnok mulungjang parnok pei tajangzükleni aor.

³²Aser, angang, parnok tsüngdang naji ola tajung akaba ken kanga tajung temeim ken, kongki nung junga temtetba ama lir, kechiyong parnoki ne otem angashir saka itemji parnoki meinyaker.

³³Mapang atongdang aser atangji aji ataloktsü, iba mapang nungji parnoki parnok den ainkar ka liasü ta metettsü.”